វៀតណាម ព្រមានចិនឱ្យបញ្ឈប់ការសាងសង់នៅលើប្រជុំកោះរបស់ខ្លួន

ប្រទេសវៀតណាម និងចិន បានឡើងកម្តៅដាក់គ្នាសារជាថ្មី ក្រោយពីវៀតណាមចោទប្រកាន់ប្រទេសចិន ជុំវិញសកម្មភាពចាក់ដី និងសាងសង់សំណង់ថ្មីៗខុសច្បាប់នៅលើប្រជុំកោះប៉ារ៉ាសែល (Paracel Islands) ក្នុងសមុទ្រចិនខាងត្បូង។

ភាពតានតឹងបានកើនឡើងកម្តៅជាថ្មី បន្ទាប់ពីមានរបាយការណ៍រូបភាពពីផ្កាយរណបរបស់វៀតណាមបង្ហាញថា ចិនបានចាប់ផ្តើមសាងសង់ហេដ្ឋារចនាសម្ព័ន្ធយោធា រួមទាំងផ្លូវរត់យន្តហោះថ្មី នៅលើកោះ Antelope Reef។

ជាការឆ្លើយតប ចិនបានអះអាងថា ប្រជុំកោះប៉ារ៉ាសែល ឬចិនហៅថា ស៊ីហ្សា ឈុនតាវ (Xisha Qundao) គឺជាទឹកដីមិនអាចកាត់ថ្លែងបានរបស់ចិន ដូច្នេះខ្លួនមានសិទ្ធិពេញលេញក្នុងការសាងសង់។

សូមរំលឹកថា វៀតណាមទាមទារយកប្រជុំកោះប៉ារ៉ាសែល (Paracel Islands) មកធ្វើជាកម្មសិទ្ធ ដោយអះអាងថាខ្លួនមានភស្តុតាងប្រវត្តិសាស្ត្រតាំងពីសតវត្សរ៍ទី១៧។

បន្ថែមពីនេះ ប្រទេសវៀតណាមមិនទទួលស្គាល់ និងប្រឆាំងយ៉ាងខ្លាំងក្លាចំពោះគោលនយោបាយ “ខ្សែបន្ទាត់ប្រាំបួនចំណុច” (Nine-dash line) របស់ប្រទេសចិន ដែលបានអះអាងទាមទារដែនអធិបតេយ្យភាពលើស្ទើរតែទាំងស្រុងនៃសមុទ្រចិនខាងត្បូង៕