ផ្ដើមចេញពីទំនាស់ពាក្យសម្តីគ្នាយ៉ាងចាស់ដៃលើឆាកឌីជីថល ករណីទាមទារទាំងមិនសមទំនងរបស់ភាគីថៃទៅលើឈុតគ្រងស្បៃខ្មែរ នៅក្នុងវីដេអូចម្រៀងរបស់តារាស្រីល្បីឈ្មោះ Phuong My Chi ពេលនេះបានជំរុញឲ្យអ្នកគាំទ្រវៀតណាមបានឆ្លៀតឱកាសនៃជ័យជម្នះកីឡា យករូបសម្លៀកបំពាក់ប្រពៃណីខ្មែរធ្វើជាអាវុធចិត្តសាស្ត្រមកដង្ហែបង្ហាញជាសាធារណៈ ដើម្បីឆ្លើយតបបកទៅវិញចំៗ។
________________ 
ចាញ់ទាំងបាល់ ចាញ់ទាំងចិត្ត! ក្រោយបរាជ័យយ៉ាងអាម៉ាស់នៅលើវាលស្មៅក្រោមថ្វីជើងក្រុមជម្រើសជាតិវៀតណាម ក្រុមអ្នកជាតិនិយមថៃត្រូវរងនូវការបញ្ឈឺចិត្តចំកណ្តាលបេះដូងបន្ថែមទៀត ក្រោយពេលហ្វូងអ្នកគាំទ្រវៀតណាម និងបងប្អូនខ្មែរកម្ពុជាក្រោមយ៉ាងច្រើនកកកុញ បានរួមគ្នារៀបចំក្បួនដង្ហែជិះម៉ូតូអបអរជ័យជំនះពានរង្វាន់ASEAN Cup 2026 ដោយបានដឹកបង្ហាញរូបម៉ានីកាំងគ្រងឈុតស្បៃប្រពៃណីខ្មែរពណ៌លឿងយ៉ាងស្រស់ស្អាតកាត់ដងផ្លូវ ក្នុងចេតនាឌឺដង និងសងសឹកបកទៅកាន់ភាគីថៃវិញ ជុំវិញទំនាស់មនោគមវិជ្ជាវប្បធម៌នាពេលកន្លងទៅ។
.jpg)
តាមប្រភពពីបណ្ដាញសង្គម សង្គ្រាមចិត្តសាស្ត្រឌីជីថលដ៏រសើបនេះ មានប្រភពដើមហេតុផ្ដើមចេញពីជម្លោះពាក្យសម្តីគ្នាយ៉ាងចាស់ដៃ ជុំវិញវីដេអូចម្រៀង (MV) ថ្មីរបស់តារាចម្រៀងស្រីល្បីឈ្មោះវៀតណាម កញ្ញា Phuong My Chi ដែលបានបញ្ចូល និងបង្ហាញពីសិល្បៈ របាំ និងសម្លៀកបំពាក់ប្រពៃណីខ្មែរយ៉ាងលេចធ្លោ។ ពេលនោះ ក្រុមជាតិនិយមថៃបានចេញមុខមកអះអាងទាំងទទឹងទិសថា ឈុតស្បៃ ដែលបង្ហាញក្នុងវីដេអូនោះ គឺជារបស់ថៃទៅវិញ ព្រមទាំងបានប្រើប្រាស់ពាក្យសម្តីរិះគន់វាយប្រហារយ៉ាងអគតិលើតារាចម្រៀងវៀតណាមរូបនោះ ដែលទង្វើនេះបានធ្វើឱ្យប្រជាជនវៀតណាម ជាពិសេសអ្នកគាំទ្ររបស់នាងផ្ទុះការមិនពេញចិត្តយ៉ាងខ្លាំង។
.jpg)
ដើម្បីឆ្លើយតបទៅនឹងការរំលោភបំពាន និងការចង់ក្រសោបយកវប្បធម៌ខ្មែរពីសំណាក់ភាគីថៃ យុវជនវៀតណាម រួមទាំងបងប្អូនខ្មែរកម្ពុជាក្រោម បានឆ្លៀតឱកាសដែលក្រុមបាល់ទាត់វៀតណាមឈ្នះថៃ យករូបឈុតស្បៃខ្មែរមកដង្ហែក្នុងក្បួនអបអរសាទរតែម្តង។ យុទ្ធសាស្ត្រ «បញ្ឈឺចិត្ត» នេះ ធ្វើឡើងដើម្បីចាក់ដោតឱ្យក្រុមជាតិនិយមថៃបានមើលឃើញច្បាស់ភ្នែកថា ថៃត្រូវបរាជ័យទាំងស្រុង ពោលគឺមិនត្រឹមតែចាញ់ពិន្ទុបាល់ទាត់នៅលើទីលានប្រកួតនោះទេ ប៉ុន្តែសូម្បីតែមនោគមវិជ្ជាវប្បធម៌ដែលថៃព្យាយាមលួចចម្លង និងទាមទារយកឈុតស្បៃខ្មែរធ្វើជារបស់ខ្លួននោះ ក៏ត្រូវអ្នកគាំទ្រវៀតណាមយកមកបង្ហាញដើម្បីជម្រុញឱ្យថៃដឹងខ្លួន និងទទួលស្គាល់តថភាពពិតប្រាកដក្នុងតំបន់ផងដែរ។
ព្រឹត្តិការណ៍ហែក្បួនដ៏ប្លែកភ្នែកនេះ គឺជាការឆ្លុះបញ្ចាំងពីសង្គ្រាមចិត្តសាស្ត្រជំនាន់ថ្មីនៅលើបណ្តាញសង្គម ដែលកីឡា និងវប្បធម៌ត្រូវបានយកមកប្រើប្រាស់ជាអាវុធការទូតឌីជីថលដើម្បីឆ្លើយតបគ្នាយ៉ាងមុតស្រួច។ ការដែលពលរដ្ឋវៀតណាមរួមកម្លាំងគ្នាលើកតម្កើងឈុតស្បៃខ្មែរ ដើម្បីវាយបកការអះអាងខុសឆ្គងរបស់ថៃ មិនត្រឹមតែជួយការពារភាពស្អាតស្អំនៃអត្តសញ្ញាណវប្បធម៌ខ្មែរនៅលើឆាកអន្តរជាតិប៉ុណ្ណោះទេ ប៉ុន្តែវាបានក្លាយជាមេរៀនចាក់ដោតមួយព្រមានដល់ក្រុមជាតិនិយមថៃ ឱ្យបញ្ឈប់ចរិតចង់វាយប្រហារ និងចង់លួចចម្លងវប្បធម៌បរទេសតាមអំពើចិត្តតទៅទៀតឡើយ៕
