ថ្លៃកប់ពពក! ប៊ិក​របស់លោក លី ក្វាន់យូ ត្រូវបាន​លក់ដេញថ្លៃក្នុងតម្លៃ ៣៦ម៉ឺនដុល្លារអាមេរិក

ប៊ិកទឹកម៉ាក Montblanc Meisterstuck No. 146 របស់លោក លី ក្វាន់យូ បិតាស្ថាបនិកប្រទេសសិង្ហបុរី ត្រូវបានគេដេញថ្លៃលក់ក្នុងតម្លៃរហូតដល់ ៣៦០,០០០ ដុល្លារអាមេរិក ក្រោយការដេញថ្លៃដណ្តើមគ្នាយ៉ាងស្វិតស្វាញរហូតដល់ ១១១ លើក។
_____________
តម្លៃប្រហែលភូមិគ្រឹះ! ប៊ិកទឹកចាស់មួយដើមដែលជាវត្ថុប្រើប្រាស់ផ្ទាល់ខ្លួនរបស់លោក លី ក្វាន់យូ បិតាស្ថាបនិកប្រទេសសិង្ហបុរី ត្រូវបានគេយកទៅដាក់លក់ដេញថ្លៃជាសាធារណៈ ដោយមានការដណ្តើមគ្នាយ៉ាងស្វិតស្វាញ រហូតហក់ឡើងថ្លៃកប់ពពកដល់ទៅ ៣៦០,០០០ ដុល្លារអាមេរិក ដែលជាតម្លៃមួយដ៏មហាសាល និងខ្ពស់ជាងការប៉ាន់ស្មានដំបូងរហូតដល់ទៅជិត ១០ដង។

យោងតាមការចុះផ្សាយរបស់សារព័ត៌មានអន្តរជាតិ South China Morning Post (SCMP) បានឱ្យដឹងថា វត្ថុប្រវត្តិសាស្ត្រនេះគឺជាប៊ិកទឹកមានតម្លៃ (Fountain Pen) ម៉ាក Montblanc Meisterstuck No. 146 ដែលធ្វើឡើងពីប្រាក់សុទ្ធ ស្រោបពណ៌មាស និងមានក្បាលប៊ិកធ្វើពីមាស ១៤K ព្រមទាំងមានចារឹកឈ្មោះ «SM Lee Kuan Yew» ថែមទៀតផង។ ប៊ិកនេះត្រូវបានទិញឡើងដំបូងនៅក្នុងកម្មវិធីសប្បុរសធម៌រៃអង្គាសប្រាក់មួយ កាលពីខែកក្កដា ឆ្នាំ២០០៣ ក្នុងតម្លៃត្រឹមតែ ៥,០០០ ដុល្លារសិង្ហបុរីប៉ុណ្ណោះ នៅក្នុងអំឡុងពេលដែលលោក លី ក្វាន់យូ កំពុងកាន់តំណែងជាទេសរដ្ឋមន្ត្រី នៃប្រទេសសិង្ហបុរី។
​
នៅក្នុងការដេញថ្លៃនាពេលថ្មីៗនេះ ក្នុងកម្មវិធី Interiors & Collectibles របស់ផ្ទះដេញថ្លៃ Hotlotz គ្រាប់ប៊ិចទឹកនេះបានទាក់ទាញការចូលរួមដេញថ្លៃដណ្តើមគ្នាយ៉ាងស្វិតស្វាញរហូតដល់ទៅ ១១១ លើក។ ក្រោយការប្រកួតប្រជែងតម្លៃយ៉ាងក្តៅគគុក តម្លៃលក់សរុបចុងក្រោយរួមបញ្ចូលទាំងកម្រៃជើងសារ (Buyer’s Premium) បានហក់ឡើងរហូតដល់ទៅ ៣៦០,០០០ ដុល្លារអាមេរិក។ ក្រៅពីប៊ិកប្រវត្តិសាស្ត្រនេះ នៅក្នុងកម្មវិធីដេញថ្លៃដដែល ក៏មានការដេញថ្លៃវត្ថុសិល្បៈល្បីៗផ្សេងទៀត ដូចជាផ្ទាំងគំនូរប្រេងឆ្នាំ១៩៧៦ របស់លោក Chua Mia Tee លក់បានក្នុងតម្លៃ ២០៧,៤០០ ដុល្លារសិង្ហបុរី និងថូដីឥដ្ឋរបស់លោក Iskandar Jalil លក់បានក្នុងតម្លៃ ១២,៣៥០ ដុល្លារសិង្ហបុរីផងដែរ។
​
ជារួមមក ជោគជ័យនៃការដេញថ្លៃប៊ិកទឹករបស់លោក លី ក្វាន់យូ ក្នុងតម្លៃដ៏មហាសាល ៣៦ម៉ឺនដុល្លារអាមេរិកនេះ គឺស្តែងឱ្យឃើញពីតម្លៃប្រវត្តិសាស្ត្រដ៏មិនអាចកាត់ថ្លៃបានរបស់ថ្នាក់ដឹកនាំឆ្នើមរូបនេះ។ វត្ថុអនុស្សាវរីយ៍ផ្ទាល់ខ្លួនរបស់លោក មិនត្រឹមតែជាសម្ភារៈប្រើប្រាស់ធម្មតានោះទេ ប៉ុន្តែវាជាមរតកនៃការចងចាំដ៏មានតម្លៃ ដែលធ្វើឱ្យមនុស្សជំនាន់ក្រោយ និងអ្នកប្រមូលទិញវត្ថុបុរាណជុំវិញពិភពលោក ហ៊ានចំណាយប្រាក់រាប់សែនដុល្លារដើម្បីបានក្លាយជាម្ចាស់កម្មសិទ្ធិ៕