អាជី ដែលជាអ្នកលក់អនឡាញបានបង្ហាញការអន់ចិត្តរបស់ខ្លួនយ៉ាងខ្លាំងទៅកាន់តារាចម្រៀង ជី ដេវីត និង ទេព បូព្រឹក្ស ក្រោយពីអ្នកទាំងពីរប្រកាសថាប្រសិនជាមានផលិតផលខ្មែរណាចង់ដាក់ក្នុងម៉ាតអាចទាក់ទងទៅបានប៉ុន្តែនាងព្យាយាមទាក់ទងទៅបែរជាមិនមានការឆ្លើយតបទៅវិញ។
នៅយប់ថ្ងៃទី១៤ ខែសីហា អាជី បានបង្ហោះវីដេអូមួយដោយបានដាក់ចំណងជើងថា «ឬមកពីខ្ញុំក្រមែនទេ» ។ អ្នកលក់អនឡាញរូបនេះបានហៅតារាចម្រៀង ជី ដេវីត និង ទេព បូព្រឹក្ស ថា«អាយដល» ព្រមទាំងបង្ហាញការអន់ចិត្តរបស់ខ្លួនយ៉ាងខ្លាំងដោយសារតែតារាចម្រៀងទាំងពីររូបធ្លាប់បានប្រកាសថា កូនខ្មែរណាមាន Local Brand បើចង់យកដាក់ក្នុងម៉ាតអាចទាក់ទងទៅបានប៉ុន្តែពេលនាងទាក់ទងទៅគ្មានការឆ្លើយតបឡើយ។
អាជី លើកឡើងថានាងបានឆាតទៅកាន់គណនីផ្ទាល់ខ្លួនរបស់ ទេព បូព្រឹក្ស ហើយគិតថាតារាចម្រៀងរូបនេះគ្មានពេលក្នុងការឆ្លើយតបនាង ទើបបានជាខំទាក់ទងទៅកាន់ផេក Ditway mart តាមការប្រកាសប៉ុន្តែនៅតែមិនទទួលបានការឆ្លើយតបដដែល។ អ្នកលក់អនឡាញរូបនេះបន្តដោយក្តីសង្ឃឹមថាពេលនាងចេញវីដេអូ ឬ ឆាតទៅអ្នកទាំងពីរនឹងមិនមានការរើសអើងនាងពីព្រោះ ជី ដេវីត បាននិយាយក្នុងវីដេអូច្បាស់ណាស់ថា «កុំក្រែងចិត្ត» អាចទាក់ទងទៅលឿនៗបានប្រសិនជាមាន Local Brand ។
ភ្ជាប់ជាមួយនឹងការអន់ចិត្តនេះ អាជី បានបន្ថែមថានាងមិនដឹង ជី ដេវីត ទេព បូព្រឹក្ស ស្អប់ ឬរើសអើងនាងរឿងអីនោះទេបានជាមិនឆ្លើយតបនាងសោះ។ អាជី ក៏បានបង្ហាញថានាងស្រលាញ់ចូលចិត្តតារាចម្រៀងទាំងពីររូបនេះលេងបទចម្រៀងសឹងតែគ្រប់បទនៅពេលបទណាចាក់ដោតផ្លូវចិត្តប៉ុន្តែអ្វីដែលទទួលបានមកវិញគឺជាអារម្មណ៍អន់ចិត្ត។ 
ការលើកឡើងរបស់ អាជី ទទួលបានមតិប្រតិកម្មចម្រុះពីអ្នកលេងបណ្តាញសង្គម។ គិតត្រឹមម៉ោង៣រសៀលថ្ងៃទី១៥ ខែសីហា តារាចម្រៀង ជី ដេវីត និង ទេព បូព្រឹក្ស ពុំទាន់ចេញមកនិយាយទាក់ទងនឹងរឿងនេះឡើយ៕
