Influencer ប្រេស៊ីលម្នាក់រងការរិះគន់ដូចព្យុះរហូតដល់ចាក់សោរបណ្តាញសង្គមក្រោយរិះគ.ន់ក្រុម BTS

Influencer ជនជាតិប្រេស៊ីល Pietra Bertolacci បានធ្វើឱ្យបណ្តាញសង្គមផ្ទុះកក្រើកយ៉ាងខ្លាំងបន្ទាប់ពីចេញវីដេអូរិះគន់ BTS ក្រោយពីក្រុម K-Pop នេះសម្តែងសម្រាកពាក់កណ្តាលម៉ោងនៃវគ្គផ្តាច់ព្រ័ត្រ World Cup ឆ្នាំ ២០២៦។ Influencer រូបនេះបានហៅ BTS ថា «បុរសដែលមានចរិតស្រីៗ»។ ប្រឈមនឹងការរិះគន់ពីអ្នកគាំទ្រ BTS យ៉ាងចាស់ដៃ Influencer ជនជាតិប្រេស៊ីលបានកំណត់បណ្តាញសង្គមរបស់ខ្លួនជាលក្ខណៈឯកជននិងព្រមានចាត់វិធានការតាមច្បាប់។

ភាពចម្រូងចម្រាសនេះបានកើតឡើងពីការបង្ហោះរបស់ Pietra បន្ទាប់ពីការសម្តែងរបស់ក្រុម BTS ក្នុងអំឡុងពេលសម្រាកពាក់កណ្តាលម៉ោងនៃវគ្គផ្តាច់ព្រ័ត្រ World Cup ឆ្នាំ ២០២៦នៅថ្ងៃទី១៩ ខែកក្កដា។ នាងបានហៅសមាជិក BTS ថា «បុរសដែលមានចរិតស្រីៗ និងមិនសូវចេះគិតគូរ»ហើយបានសម្តែងការព្រួយបារម្ភថា រូបភាពរបស់ក្រុមកំពុងក្លាយជាបទដ្ឋានសម្រាប់យុវវ័យ។

សេចក្តីថ្លែងការណ៍នេះបានទាក់ទាញប្រតិកម្មយ៉ាងខ្លាំងយ៉ាងឆាប់រហ័សពីសហគមន៍អនឡាញប្រេស៊ីល។ មនុស្សជាច្រើនបានអះអាងថា Pietra កំពុងវិនិច្ឆ័យអ្នកដទៃដោយផ្អែកលើគំរូយេនឌ័រ ដោយដាក់គំរូបុរសបែបប្រពៃណីលើសិល្បករ។ អ្នកខ្លះក៏បានបញ្ចេញមតិថា សេចក្តីថ្លែងការណ៍របស់នាងឆ្លុះបញ្ចាំងពីកង្វះការអាណិតអាសូរចំពោះសិល្បករកូរ៉េ និងវប្បធម៌ K-pop។

យោងតាមទិន្នន័យពីក្រុមហ៊ុនវិភាគទិន្នន័យ របស់ប្រេស៊ីល ក្នុងរយៈពេល ២៤ម៉ោងនៃភាពចម្រូងចម្រាសបានផ្ទុះឡើង ចំនួនសរុបនៃការ Like មតិយោបល់ និងការចែករំលែកទាក់ទងនឹងឧប្បត្តិហេតុនេះនៅលើវេទិកាប្រព័ន្ធផ្សព្វផ្សាយសង្គមដូចជា X, Instagram និង Facebook បានលើសពី១លាន។ នៅលើ X តែមួយគណនីប្រហែល ២៣,០០០ បានបង្ហោះអំពីឧប្បត្តិហេតុនេះ ដែលបង្កើតការលើកឡើងជាង ៣៣,០០០ និងចំណាប់អារម្មណ៍ប្រហែល ១១.៤ លាន។ ការបង្ហោះទាំងនេះក៏បានកត់ត្រាអន្តរកម្មជាង ៤៣២,០០០ ផងដែរ។ ទន្ទឹមនឹងនេះ ឈ្មោះរបស់ Pietra Bertolacci ត្រូវបានស្វែងរកជាង ២០,០០០ដងនៅលើ Google ក្នុងរយៈពេលប្រហែល ២០ ម៉ោង។

នៅក្នុងសេចក្តីថ្លែងការណ៍ចុងក្រោយរបស់ Influencer រូបនេះបាននិយាយថា នាងបានប្តូរគណនី Instagram របស់នាងទៅជាឯកជន បន្ទាប់ពីទទួលបានមតិយោបល់ប្រមាថជាច្រើន។ Pietra បានអះអាងថា សេចក្តីថ្លែងការណ៍របស់នាងគឺមានបំណងគ្រាន់តែបង្ហាញពីទស្សនៈរបស់នាងលើនិន្នាការសោភ័ណភាពបច្ចុប្បន្ននៅក្នុងឧស្សាហកម្មកម្សាន្ត ហើយបានបដិសេធចេតនាណាមួយក្នុងការប្រមាថជនជាតិកូរ៉េ ឬវប្បធម៌ K-pop។ Influencer ប្រេស៊ីលរូបនេះក៏បាននិយាយផងដែរថា នាងនឹងស្វែងរកវិធានការផ្លូវច្បាប់ប្រឆាំងនឹងអ្នកដែលយាយី និងគំរាមកំហែងនាងតាមអ៊ីនធឺណិត។

ទោះបីជាបានលុបការបង្ហោះ និងចេញការពន្យល់ក៏ដោយ Pietra Bertolacci នៅតែបន្តប្រឈមមុខនឹងរលកនៃការរិះគន់។ មនុស្សជាច្រើនអះអាងថា ការពន្យល់របស់នាងមិនបានផ្លាស់ប្តូរខ្លឹមសារនៃសេចក្តីថ្លែងការណ៍ដើមរបស់នាងទេ ព្រោះការវិនិច្ឆ័យសិល្បករដោយផ្អែកលើរូបរាង ឬរចនាប័ទ្មរបស់ពួកគេងាយនឹងបង្កើតភាពលំអៀងមិនសមរម្យ។

នេះមិនមែនជាលើកទីមួយទេដែល BTS បានក្លាយជាគោលដៅនៃសេចក្តីថ្លែងការណ៍ចម្រូងចម្រាសនៅបរទេស។ ពេញមួយអាជីពអន្តរជាតិរបស់ពួកគេ ក្រុមនេះត្រូវបានគេចំអកម្តងហើយម្តងទៀតចំពោះរូបរាង ស្ទីលម៉ូតសក់ ការតុបតែងមុខ ឬរូបភាពដែលងាកចេញពីគំរូបុរសប្រពៃណី។ សេចក្តីថ្លែងការណ៍មួយចំនួនពីតារាល្បីៗ និងអ្នកធ្វើបទបង្ហាញនៅអឺរ៉ុប និងសហរដ្ឋអាម៉េរិកត្រូវបានរិះគន់ថាមានការរើសអើងជាតិសាសន៍ ឬរើសអើងចំពោះសិល្បករអាស៊ី។

បើទោះបីជាមានភាពចម្រូងចម្រាសក៏ដោយ BTS នៅតែបន្តរក្សាឥទ្ធិពលយ៉ាងខ្លាំងលើទីផ្សារតន្ត្រីពិភពលោក។ ក្រុមតន្រ្តីនេះបំបែកកំណត់ត្រាជាបន្តបន្ទាប់ក្នុងការលក់ ដំណើរទេសចរណ៍ និងពានរង្វាន់អន្តរជាតិ ខណៈពេលដែលក៏រួមចំណែកដល់ការនាំយក K-pop ទៅកាន់ទស្សនិកជនទូទាំងពិភពលោកកាន់តែទូលំទូលាយផងដែរ៕