មាលា ឆ្លើយតបដោយឆ្លាតវៃចំពោះអ្នកលេងបណ្តាញសង្គមថៃដែលចោទថាទទួលឥទ្ធិពលពី Lisa

តារាម៉ូដែល មាលា បានធ្វើឱ្យមានមតិសរសើរបន្ទាប់ពីឆ្លើយតបដោយឆ្លាតវៃ និងប្រកបដោយសេចក្តីថ្លៃថ្នូរទៅកាន់អ្នកលេងបណ្តាញសង្គមថៃមួយចំនួនបញ្ចេញមតិរិះគន់ចោទប្រកាន់លើនាងទាក់ទងនឹងការបង្ហាញពីប្រធានបទផ្កាឈូកដោយសារតែទទួលឥទ្ធិពលពី Lisa សមាជិក BLACKPINK។

នៅល្ងាចថ្ងៃទី១១ ខែកក្កដា តារាម៉ូដែលខ្មែរកាត់បារាំង មាលា បានចេញវីដេអូជាង១នាទីដោយភ្ជាប់មកជាមួយនឹងការបញ្ជាក់ថានាងមកនេះគឺគ្រាន់តែនិយាយការពិត គ្មានការស្អប់ខ្ពើមនោះទេ។ នៅក្នុងវីដេអូគេបានឃើញ មាលា បង្ហាញពីមតិយោបល់អវិជ្ជមានមួយចំនួនពីអ្នកលេងបណ្តាញសង្គមថៃបន្ទាប់ពីនាងបង្ហោះវីដេអូនៅបឹងឈូក។ មតិខ្លះថែមទាំងចោទប្រកាន់ថា មាលា ទទួលឥទ្ធិពលពី Lisa សមាជិក BLACKPINK ទើបបានជាមកថតជាមួយនឹងបឹកឈូកបែបនេះ ទាំងការពិត Lisa ថតជាមួយនឹងបឹងព្រលិតសោះ។

ឆ្លើយតបប្រកបដោយចិត្តត្រជាក់និងការពន្យល់ មាលា បាននិយាយយើងមានបឹងឈូកជាយូរមកហើយ ហើយផ្កាឈូកគឺជាវប្បធម៌ និងកសិកម្មមួយរបស់ប្រទេសកម្ពុជាអស់រយៈពេលជាច្រើនឆ្នាំមកហើយ តើអាចនឹងមានពាក្យថាចម្លងពីប្រទេសណាមួយកើត។ មាលា ថា ថៃនិងខ្មែរ គឺជាប្រទេសជិតខាងនឹងគ្នាហើយវាក៏មិនចម្លែកទេដែលមានភាពស្រដៀងគ្នា ដូចជាបឹងឈូក ប្រាសាទ ថៃក៏មាន ខ្មែរក៏មាន ប៉ុន្តែហេតុអ្វីនៅពេលនាងផុសពីវប្បធម៌ខ្លួនឯងដូចជា ប្រាសាទ បែរជាចោទថាចម្លងប្រាសាទថៃ។

មាលា បានលើកឡើងទៀតថានាងតែងតែទទួលបានខម្មិនថាចម្លង មិនលើកឡើងសូម្បីតែថតជាមួយនឹងផ្កាឈូក ហើយរាល់ពេលដែលនាងថតប្រម៉ូតពីវប្បធម៌ខ្មែរគឺតែងតែទទួលបានមតិស្អប់ខ្ពើមជាច្រើន។ តារាម៉ូដែលរូបនេះថាការបញ្ចេញមតិយោបល់ទាំងនោះនឹងកាន់តែធ្វើឱ្យមានការចាប់អារម្មណ៍ច្រើនមកលើវីដេអូនាងដូច្នេះនាងមានតែអរគុណថែម តែនាងចង់បញ្ជាក់ថានាងគ្រាន់តែប្រម៉ូតពីវប្បធម៌ដ៏ស្រស់ស្អាតរបស់ខ្លួនប៉ុណ្ណោះ មិនមែនជាការចម្លងរបស់អ្នកណាឡើយ។

ការឆ្លើយតបរបស់ មាលា ត្រូវបានទស្សនិកជនជាច្រើនសរសើរថានាងឆ្លាតវៃ មានហេតុ មានផល ដែលសមនឹងភាពថ្លៃថ្នូរជាពិសេសក្នុងនាមជាតារាម៉ូដែលអន្តរជាតិមានអ្នកគាំទ្រច្រើនការតបតបែបនេះមិនជះឥទ្ធិពលអវិជ្ជមានដល់ខ្លួនឯង៕