ចំនួនអ្នកស្លា.ប់ក្នុងសង្គ្រា.មស៊ីវិលនៅមីយ៉ាន់ម៉ា បានហក់ឡើងហួស ១សែននាក់!

ខណៈពេលដែលពិភពលោកកំពុងផ្តោតអារម្មណ៍ខ្លាំងទៅលើសង្គ្រា.មនៅតំបន់មជ្ឈិមបូព៌ា តើដឹងទេថា ប្រទេសជិតខាងយើងក្នុងតំបន់អាស៊ាន គឺមីយ៉ាន់ម៉ា កំពុងតែធ្លាក់ក្នុងសមុទ្រឈា.មយ៉ាងជ្រៅ ដោយមានមនុស្សរហូតដល់ជាង ១សែននាក់ហើយ បានបាត់បង់ជីវិ.ត?

យោងតាមរបាយការណ៍ចុងក្រោយពីអង្គការឃ្លាំមើលជម្លោះលើពិភពលោក (ACLED) ចំនួនអ្នកស្លាប់នៅក្នុងសង្គ្រាមស៊ីវិលនៅមីយ៉ាន់ម៉ា បានកើនឡើងដល់ ១០០,១១៤ នាក់ហើយ ក្នុងរយៈពេលជាង ៥ឆ្នាំចុងក្រោយនេះ គិតចាប់តាំងពីការធ្វើរដ្ឋប្រហារយោធាកាលពីខែកុម្ភៈ ឆ្នាំ២០២១ មក។

ការស្លាប់យ៉ាងគំហុកនេះ រាប់បញ្ចូលទាំងកងទ័ព និងជនស៊ីវិល ស្របពេលដែលយោធាមីយ៉ាន់ម៉ាបានប្រើប្រាស់យន្តហោះចម្បាំង និងដ្រូនទម្លាក់គ្រាប់បែកលើតំបន់ស៊ីវិល ព្រមទាំងដុតបំផ្លាញភូមិកររបស់អ្នកស្រុកជាបន្តបន្ទាប់។
ក្រោយការបង្ក្រាបយ៉ាងចាស់ដៃពីសំណាក់យោធា សកម្មជន និងយុវជនជាច្រើនបានសម្រេចចិត្តចូលព្រៃបង្កើតក្រុមប្រដាប់អាវុធការពារប្រជាជន ឬ PDF ដោយសហការជាមួយកងកម្លាំងជនជាតិភាគតិច ដើម្បីវាយបកទៅលើរដ្ឋាភិបាលវិញ។

បច្ចុប្បន្ន ប្រទេសមីយ៉ាន់ម៉ាស្ថិតនៅក្រោមការគ្រប់គ្រងរបស់លោក មិន អ៊ុងឡាំង ដែលបានប្រែក្លាយខ្លួនជាប្រធានាធិបតី តាមរយៈការបោះឆ្នោតមួយដែលត្រូវបានអង្គការអន្តរជាតិចាត់ទុកថាជា «ការបោកប្រាស់» ពីព្រោះមានការរឹតបន្តឹង និងហាមឃាត់គណបក្សរបស់លោកស្រី អង់សាន ស៊ូជី មិនឱ្យចូលរួម។

វិបត្តិសង្គ្រាមនេះបានរុញច្រានពលរដ្ឋមីយ៉ាន់ម៉ាជាង ៣លាន ៧សែននាក់ ឱ្យបោះបង់ផ្ទះសម្បែងភៀសខ្លួនទៅក្រៅប្រទេស។ អង្គការសហប្រជាជាតិបានព្រមានថា បច្ចុប្បន្ននេះ ពលរដ្ឋមីយ៉ាន់ម៉ាម្នាក់ ក្នុងចំណោម ៥នាក់ កំពុងប្រឈមមុខនឹងការអត់ឃ្លាន និងខ្វះខាតស្បៀងអាហារយ៉ាងធ្ងន់ធ្ងរ។ តើប្រិយមិត្តយល់យ៉ាងណាដែរចំពោះវិបត្តិសង្គ្រាមស៊ីវិលដ៏រ៉ាំរ៉ៃនៅមីយ៉ាន់ម៉ាមួយនេះ?