ថៃប្រកាសបម្រាមគោចរជាបន្ទាន់ ក្រោយក្រុមឧទ្ទាមវា.យប្រ.ហារ ៥១ ទីតាំងក្នុងមួយយប់

ថៃ៖ ក្រុមប្រដាប់អាវុធបើកការវាយប្រហារព្រមគ្នាចំនួន ៥១ កន្លែងពេញមួយយប់ បំផ្ទុះគ្រាប់បែក កាត់ផ្តាច់ប្រព័ន្ធភ្លើង និងដុតបំផ្លាញហាង 7-Eleven ឡើងខ្ទេចខ្ទី ធ្វើឱ្យអាជ្ញាធរត្រូវបង្ខំចិត្តប្រកាសអាសន្នដាក់បម្រាមគោចរ (Curfew) ជាបន្ទាន់ទាំងកណ្តាលអាធ្រាត្រ។
__________________

ត្រឹមតែមួយប៉ព្រិចភ្នែក សំឡេងផ្ទុះគ្រាប់បែក និងអណ្តាតភ្លើងបានឆាបឆោះឡើងព្រមគ្នារហូតដល់ទៅ ៥១ កន្លែង! នេះមិនមែនជាទិដ្ឋភាពក្នុងសាច់រឿងហូលីវូដនោះទេ ប៉ុន្តែវាជាព្រឹត្តិការណ៍ដ៏រន្ធត់មួយដែលបានកើតឡើងពិតៗ បង្កឡើងដោយក្រុមឧទ្ទាមប្រដាប់អាវុធ ធ្វើឱ្យខេត្តចំនួន ៣ នៅភាគខាងត្បូងប្រទេសថៃ ត្រូវធ្លាក់ចូលទៅក្នុងភាពវឹកវរ និងរញ្ជួយផ្អើលពេញមួយយប់ ខណៈអាជ្ញាធរត្រូវបង្ខំចិត្តប្រកាសអាសន្នដាក់បម្រាមគោចរជាបន្ទាន់!

យោងតាមប្រភពព័ត៌មានផ្លូវការ សកម្មភាពវាយប្រហារដ៏គួរឱ្យតក់ស្លុតនេះ បានផ្ទុះឡើងព្រមគ្នានៅចន្លោះម៉ោង ៨:០០ យប់ ដល់ម៉ោង ១២:០០ រំលងអធ្រាត្រ ថ្ងៃទី ២២ ខែសីហា ឆ្នាំ ២០២៦ គ្របដណ្តប់លើខេត្តយ៉ាឡា (Yala) ប៉ាតានី (Pattani) និងណារ៉ាធីវ៉ាត់ (Narathiwat)។ ក្រុមជនល្មើសប្រដាប់អាវុធជាច្រើនក្រុម ដែលមានផែនការច្បាស់លាស់ បានធ្វើសកម្មភាពលបដាក់គ្រាប់បែកកែច្នៃ (IEDs) ទម្ងន់រហូតដល់ ២០ គីឡូក្រាម បំផ្ទុះបង្គោលភ្លើង និងអង់តែនទូរគមនាគមន៍ដើម្បីកាត់ផ្តាច់ទំនាក់ទំនង ព្រមទាំងដុតកង់ឡាន និងចាក់ដែកគោលពេញផ្លូវថ្នល់។ អ្វីដែលគួរឱ្យរន្ធត់បំផុតនោះគឺ នៅក្នុងខេត្តប៉ាតានី មានក្រុមប្រដាប់អាវុធជាង ១០ នាក់ បានសម្រុកចូលប្លន់ និងបាញ់គំរាមកំហែងបុគ្គលិក មុននឹងចាក់សាំងដុតបំផ្លាញហាងទំនិញងាយស្រួល 7-Eleven មួយកន្លែងឱ្យឆេះសន្ធោសន្ធៅ និងបានដុតបំផ្លាញអគារសាលាក្រុងតាលូប៊ាន់ ព្រមទាំងកម្ទេចកាមេរ៉ាសុវត្ថិភាព (CCTV) ចំនួន ១៣ គ្រឿង ដើម្បីបំបាត់ដានថែមទៀតផង។

ជាការឆ្លើយតបទៅនឹងការវាយប្រហារដ៏កាចសាហាវនេះ មេបញ្ជាការកងទ័ពភូមិភាគទី ៤ របស់ថៃ រួមជាមួយអាជ្ញាធរខេត្ត បានប្រកាសដាក់តំបន់កើតហេតុក្នុងស្ថានភាពអាសន្នភ្លាមៗ ដោយក្នុងនោះខេត្តណារ៉ាធីវ៉ាត់ ត្រូវបានដាក់បម្រាមគោចរជាបន្ទាន់ ចាប់ពីម៉ោង ១០:១៥ នាទីយប់ រហូតដល់ម៉ោង ៦:០០ នាទីព្រឹក ដោយហាមឃាត់ប្រជាពលរដ្ឋមិនឱ្យចាកចេញពីផ្ទះសម្បែងដាច់ខាត ដើម្បីសម្រួលដល់ប្រតិបត្តិការរបស់កងកម្លាំងចម្រុះ និងក្រុមអ្នកជំនាញដោះមីន (EOD)។

ហេតុការណ៍ដ៏វឹកវរនេះ បានបណ្តាលឱ្យស្ត្រីស៊ីវិល ២ នាក់រងរបួសដោយសារកម្ទេចគ្រាប់បែកនៅក្នុងខេត្តណារ៉ាធីវ៉ាត់ ខណៈទំហំនៃការខូចខាតទ្រព្យសម្បត្តិរដ្ឋ និងឯកជនត្រូវបានវាយតម្លៃថាមានទំហំធំធេងខ្លាំងណាស់។ ព្រឹត្តិការណ៍វាយប្រហារជាបន្តបន្ទាប់ចំនួន ៥១ កន្លែងក្នុងមួយយប់នេះ មិនត្រឹមតែជាការបំផ្លិចបំផ្លាញទ្រព្យសម្បត្តិ និងហេដ្ឋារចនាសម្ព័ន្ធប៉ុណ្ណោះទេ ប៉ុន្តែវាបានគោះជួងព្រមានសារជាថ្មីអំពីបញ្ហាសន្តិសុខដ៏រ៉ាំរ៉ៃនៅតំបន់ភាគខាងត្បូងប្រទេសថៃ៕