សង្គ្រាមព័ត៌មាន! ថៃចំណាយថវិកាដ៏សន្ធឹកសន្ធាប់ ដើម្បីគ្រប់គ្រង និងបង្វែរទិសដៅព័ត៌មានព្រំដែនកម្ពុជា

បាងកក៖ រដ្ឋាភិបាលថៃកំពុងបង្ហាញក្តីបារម្ភយ៉ាងខ្លាំង ខ្លាចក្រសែភ្នែកអន្តរជាតិបានដឹងពីការពិតជុំវិញបញ្ហាជម្លោះព្រំដែន ទើបបង្ខំចិត្តជះលុយជិត ៣០ម៉ឺនដុល្លារយ៉ាងបន្ទាន់ ដើម្បីបើកយុទ្ធនាការវាយលុក និងបង្វែរព័ត៌មានតាមប្រព័ន្ធផ្សព្វផ្សាយ។ យុទ្ធសាស្ត្របិទបាំងការពិតបែបឌីជីថលនេះ បានរុញច្រានជម្លោះព្រំដែនដ៏រសើបនេះឱ្យឈានចូលដល់ដំណាក់កាលថ្មីមួយនៃសង្គ្រាមព័ត៌មានឌីជីថល។
 
យោងតាមរបាយការណ៍ស៊ើបអង្កេតផ្ដាច់មុខពីសារព័ត៌មានឈានមុខរបស់ថៃ The Nation បានលាតត្រដាងថា រដ្ឋាភិបាលថៃបានសម្រេចអនុម័តកញ្ចប់ថវិកាបន្ទាន់មួយក្នុងទំហំទឹកប្រាក់រហូតដល់ ៩,៨ លានបាត (ឬប្រហែលជិត ៣០ ម៉ឺនដុល្លារអាម៉េរិក) យ៉ាងប្រញាប់ប្រញាល់។ មូលនិធិអាសន្ននេះ ត្រូវបានផ្ទេរដោយផ្ទាល់ទៅឱ្យ «មជ្ឈមណ្ឌលសម្របសម្រួលព័ត៌មានរួម» (Joint Information Coordination Centre – JIC)។ គោលបំណងចម្បងនៃការជះលុយយ៉ាងគំហុកនេះ គឺដើម្បីគ្រប់គ្រង បង្វែរ និងតម្រង់ទិសដៅនៃទស្សនៈរបស់សាធារណជន ក៏ដូចជាសហគមន៍អន្តរជាតិ ជុំវិញបញ្ហាព្រំដែន និងការចរចាចែករំលែកធនធានធម្មជាតិដែលកំពុងបន្តជាមួយភាគីកម្ពុជា។
 
យុទ្ធសាស្ត្រដែលទទួលបានការឧបត្ថម្ភធនថ្មីរបស់មជ្ឈមណ្ឌល JIC នេះ បង្ហាញពីការចាកចេញយ៉ាងដាច់ស្រឡះពីទម្លាប់ចាស់ៗកាលពីមុន ដែលមន្ត្រីថៃគ្រាន់តែរង់ចាំឆ្លើយតប ឬបកស្រាយពេលមានការចោទប្រកាន់ពីខាងក្រៅ ឬពីខាងប្រព័ន្ធផ្សព្វផ្សាយប៉ុណ្ណោះ។ ផ្ទុយទៅវិញ ពេលនេះពួកគេកំពុងចាប់ផ្ដើម «យុទ្ធនាការព័ត៌មានបែបវាយលុកមុន» (Proactive Information Campaign) ដែលរៀបចំឡើងដើម្បីក្ដោបក្ដាប់ខ្សែញាក់នៃព័ត៌មាន មុនពេលដែលទស្សនៈផ្ទុយ ឬព័ត៌មានពិតពីខាងក្រៅអាចរីករាលដាលបាន។

ផ្នែកមួយដ៏សំខាន់នៃកញ្ចប់ថវិកាយុទ្ធសាស្ត្រនេះ រួមមានការចំណាយលើការនាំអ្នកសារព័ត៌មានបរទេសចុះផ្ទាល់ទៅកាន់តំបន់ព្រំដែន។ តាមរយៈការគ្រប់គ្រងលើអ្វីដែលប្រព័ន្ធផ្សព្វផ្សាយអន្តរជាតិបានឃើញ និងបានឮនៅលើទីតាំងផ្ទាល់ ទីក្រុងបាងកកមានគោលដៅវាយបកទៅលើអ្វីដែលពួកគេហៅថាជាព័ត៌មានមិនពិត និងដើម្បីពង្រឹងការបកស្រាយខាងផ្លូវច្បាប់ និងទឹកដីផ្ទាល់ខ្លួននៅលើឆាកអន្តរជាតិ។

នៅពេលដែលកិច្ចខិតខំប្រឹងប្រែងទាំងនេះចាប់ផ្ដើមលេចរូបរាងឡើង យុទ្ធនាការប្រព័ន្ធផ្សព្វផ្សាយដែលគាំទ្រដោយទឹកប្រាក់ដ៏ច្រើនសន្ធឹកសន្ធាប់នេះ ត្រូវបានគេរំពឹងថានឹងធ្វើឱ្យប៉ះពាល់ដល់របៀបនៃការយល់ឃើញជុំវិញការវិវត្តនៃបញ្ហាព្រំដែននៅក្នុងតំបន់។ អ្នកសង្កេតការណ៍បានកត់សម្គាល់ថា ខណៈពេលដែលប្រទេសថៃព្យាយាមលាបពណ៌សកម្មភាពនេះថាជាការការពារផលប្រយោជន៍ជាតិដ៏សំខាន់ ប៉ុន្តែការពិតវាគឺជាការបង្កើតការវាយលុកផ្នែកប្រព័ន្ធផ្សព្វផ្សាយដ៏ធំមួយ ដែលបណ្ដាញព័ត៌មានរបស់កម្ពុជានឹងត្រូវជួបការលំបាកក្នុងការដោះស្រាយ និងទប់ទល់៕