ជុំវិញរឿងរ៉ាវទុរេនថៃបន្លំថាជាទុរេនខ្មែរបានបង្កឱ្យមានការជជែកវែកញែកយ៉ាងក្តៅគគុកដែលក្លាយទៅជាវិបត្តិទំនុករបស់ប្រជាពលរដ្ឋទៅលើអ្នកលក់ដូរមួយចំនួនដែលរកស៊ីកុហកបោកប្រាស់ខ្មែរគ្នាឯងដើម្បីតែផលប្រយោជន៍ផ្ទាល់ខ្លួន។ ក្នុងនាមជាបុគ្គលសាធារណៈតារារ៉េប King Chi បានពោលពាក្យចំៗទៅកាន់ឈ្មួញធំៗដែលរកស៊ីបន្លំខ្មែរគ្នាឯង។
នៅរសៀលថ្ងៃទី៦ ខែឧសភា ឆ្នាំ២០២៦ King Chi ដែលត្រូវទស្សនិកជនដាក់នាមឱ្យថាស្តេចជួន បានបង្ហោះសំណេរមួយនៅលើបណ្តាញសង្គមហ្វេកប៊ុកថា «ប្រជាពលរដ្ឋយើងគាត់ស្រុះដៃគ្នាណាស់មិនទិញរបស់ចោរថៃទេណាស់តែពួកអស់លោកលោកស្រីឈ្មួញធំៗអ្នកលក់ដូរទេដែលលួចនាំចូលហើយបោកខ្មែរគ្នាឯងថាជារបស់ខ្មែរទៀត»។
ពាក្យសម្តីនេះបានធ្វើឱ្យមានការចាប់អារម្មណ៍យ៉ាងឆាប់រហ័សពីសំណាកទស្សនិកជនដោយមានមនុស្សជាច្រើនបានបង្ហាញការគាំទ្រនូវពាក្យសម្តីរបស់តារារ៉េបរូបនេះ។ មិនខុសពី King Chi ប៉ុន្មាននោះទេអ្នកលេងបណ្តាញសង្គមបានចូលទៅបញ្ចេញមតិយោបល់ថា «បោកតែខ្មែរគ្នាឯង ចង់បានផលចំណេញពេក លែងគិតអីអស់ហើយ មិនទាន់បាន២ឆ្នាំផងឆាប់ភ្លេចម៉េស,ឆ្កែស្រុកមិនឱ្យដៃ ឆ្កែព្រៃក៏មិនហ៊ាននោះដែរបង, មុនមកដល់ដៃឈ្មួញតើអ្នកណាដែលបើកដៃឱ្យនាំចូលបាន, ឈ្មួញថោកទាប រកស៊ីបោកប្រាស់ខ្មែរឯង អាត្មានិយម»។
ជាតារារ៉េបម្នាក់ដែលឈរឈ្មោះបោះសំឡេងក្នុងអាជីពសិល្បៈនិងជាគ្រូបង្វឹកនៅក្នុងកម្មវិធីប្រលងចម្រៀងរ៉េប king Chi ត្រូវបានអ្នកគាំទ្រទទួលស្គាល់ពីទឹកដៃនៃការធ្វើបទចម្រៀងដែលនិយាយទាក់ទងនឹងជីវិតផ្ទាល់ខ្លួន និងបញ្ហាក្នុងសង្គមមួយចំនួន។ ចំណុចពិសេសរបស់ King Chi គឺការលេងពាក្យពេចន៍ចុងជួនរបស់លោកក្នុងបទចម្រៀងរហូតមានអ្នកគាំទ្រដាក់នាមឱ្យលោកថា «ស្តេចជួន» ទៀតផង៕
