ល្បីពេញអ៊ីនធឺណិត! Bosco Wong មានទំនាក់ទំនងល្អជាមួយនឹងស្វាមីអតីតមិត្តស្រី Myolie Wu

យោងតាមប្រព័ន្ធផ្សព្វផ្សាយហុងកុង HK01 លោក Philip Leeស្វាមីតារាស្រី Myolie Wu បានធ្វើដំណើរទៅកាន់ទីក្រុងកូឡាឡាំពួរ ប្រទេសម៉ាឡេស៊ី ដើម្បីចូលរួមពិធីមង្គលការរបស់មិត្តភក្តិម្នាក់។ ចៃដន្យ Bosco Wong បាននៅក្នុងទីក្រុងនេះសម្រាប់ព្រឹត្តិការណ៍ផ្លាស់ប្តូរវប្បធម៌ ហើយអ្នកទាំងពីរបានទៅភោជនីយដ្ឋានតែមួយ។ ទោះបីជាដំបូងឡើយ Bosco Wong មិនស្គាល់ Philip ក៏ដោយស្វាមីរបស់ Myolie Wu បានដើរទៅរកលោកមុនគេ ស្វាគមន៍តារាប្រុសនេះយ៉ាងកក់ក្តៅ និងឱបលោក។

សកម្មភាពដ៏រួសរាយរាក់ទាក់នេះបានធ្វើឱ្យអ្នកគាំទ្រជាច្រើនភ្ញាក់ផ្អើលព្រោះ Bosco Wong និង Myolie ធ្លាប់ជាគូស្នេហ៍ដ៏ល្បីល្បាញបំផុតមួយគូរបស់ហុងកុង។ រូបថតនៃការជួបគ្នានេះត្រូវបានចែកចាយយ៉ាងឆាប់រហ័សតាមអ៊ីនធឺណិត ដោយអ្នកលេងអ៊ីនធឺណិតជាច្រើនបានពណ៌នាអំពីពេលវេលានោះថាគួរឱ្យគោរព។ ការឱបគ្នាដ៏ល្បីរវាងលោក Philip Lee និង Bosco Wong ត្រូវបានគេបកស្រាយយ៉ាងទូលំទូលាយថាជាសញ្ញាមួយដែលបង្ហាញថាអ្នកពាក់ព័ន្ធទាំងអស់មានគំនិតចាស់ទុំ។

ការជួបគ្នានេះបានបង្ហាញពីការគោរពគ្នាទៅវិញទៅមករវាងស្វាមី និងអតីតដៃគូរបស់ភរិយា ដែលជាទិដ្ឋភាពមិនធម្មតានៅក្នុងឧស្សាហកម្មកម្សាន្ត។ អ្នកគាំទ្រជាច្រើនបានសរសើរបុរសទាំងពីរសម្រាប់ការដោះស្រាយស្ថានការណ៍ដោយមានទំនុកចិត្ត និងភាពថ្លៃថ្នូរ។

មុនពេលរៀបការជាមួយ Philip Lee, Myolie ធ្លាប់មានទំនាក់ទំនងស្នេហាជាមួយ Bosco Wong អស់រយៈពេល៧ឆ្នាំ។ អ្នកទាំងពីរបានចាប់ផ្តើមទំនាក់ទំនងរបស់ពួកគេនៅឆ្នាំ ២០០៥ បន្ទាប់ពីបានសម្តែងជាមួយគ្នានៅក្នុងរឿងភាគទូរទស្សន៍ TVB «ម្តាយក្មេកកាចប៉ះកូនប្រសារឆ្នាស»( Wars of In-Laws)។ នៅពេលដែលពួកគេបានកសាងអាជីពសម្តែងដ៏ជោគជ័យ ពួកគេក៏បានក្លាយជាគូស្នេហ៍តារាល្បីដែលគួរឱ្យស្រឡាញ់បំផុតមួយគូរបស់ហុងកុង។ ទោះជាយ៉ាងណាក៏ដោយ ទំនាក់ទំនងរបស់ពួកគេត្រូវបានគ្របដណ្ដប់ជាញឹកញាប់ដោយពាក្យចចាមអារ៉ាមដែលភ្ជាប់ Bosco Wong ជាមួយតារាសម្តែងស្រីដទៃទៀត។

ប្រព័ន្ធផ្សព្វផ្សាយហុងកុងបានរាយការណ៍ថា Myolie បានប្រឈមមុខនឹង Bosco Wong ពីបទក្បត់ចិត្តច្រើនដងមុនពេលបញ្ចប់ទំនាក់ទំនងនៅឆ្នាំ ២០១២។ នៅក្នុងខែធ្នូ ឆ្នាំ២០១៥ Myolie បានរៀបការជាមួយអ្នកជំនួញ Philip Lee ។ ចាប់តាំងពីពេលនោះមក គូស្នេហ៍នេះបានបង្កើតគ្រួសារដ៏មានសុភមង្គល ហើយឥឡូវនេះមានកូនប្រុសបីនាក់។ ទន្ទឹមនឹងនេះ Bosco Wong នៅតែមិនទាន់រៀបការនៅអាយុ ៤៦ឆ្នាំ។

ទោះបីជាពួកគេបានបែកបាក់គ្នាក៏ដោយ Myolie តែងតែនិយាយវិជ្ជមានអំពី Bosco Wong។ ពីមុននាងបាននិយាយថាទំនាក់ទំនងរបស់ពួកគេបានបញ្ចប់ដោយសន្តិវិធីដោយគ្មានជម្លោះធំដុំអ្វីឡើយ។ Bosco Wong ក៏បានរក្សាអាកប្បកិរិយាគោរពចំពោះអតីតដៃគូរបស់លោកផងដែរ។ លោកបានបង្ហាញថាពួកគេនៅតែទាក់ទងគ្នាម្តងម្កាល ហើយថាលោកនៅតែបន្តផ្ញើសារជូនពរថ្ងៃកំណើត និងថ្ងៃឈប់សម្រាកទៅកាន់ Myolie និងក្រុមគ្រួសាររបស់នាង៕