គ្រាប់ Chia ទោះបីមានរូបរាងតូចល្អិត (មានពណ៌ស និងខ្មៅ) ប៉ុន្តែវាត្រូវបានគេចាត់ទុកជា អាហារថាមពលមដ៏ខ្លាំងក្លាបំផុតមួយ។ វាសម្បូរទៅដោយជាតិសរសៃ (Fiber) ទាំងប្រភេទរលាយ និងមិនរលាយ មានប្រូតេអ៊ីន អាស៊ីតខ្លាញ់អូមេហ្គា 3 (Omega-3) សារធាតុប្រឆាំងអុកស៊ីតកម្ម និងសារធាតុរ៉ែជាច្រើនប្រភេទ។ តាមពិតទៅ គ្រាប់ Chia មានប្រភពមកពីគ្រួសាររុក្ខជាតិម្យ៉ាងឈ្មោះថា Salvia hispanica ដែលស្ថិតក្នុងអំបូរជីអង្កាម ដែលត្រូវបានជនជាតិ Aztec និង Mayan ប្រើប្រាស់ជាអាហារចម្បងតាំងពីជាង ៥,០០០ ឆ្នាំមុនមកម្ល៉េះ។
លោក Keith Ayoob អ្នកជំនាញអាហារូបត្ថម្ភ និងជាសាស្ត្រាចារ្យនៅមហាវិទ្យាល័យវេជ្ជសាស្ត្រ Albert Einstein បានកត់សម្គាល់ថា គ្រាប់ Chia ផ្ដល់នូវសារធាតុចិញ្ចឹមដែលមនុស្សភាគច្រើនតែងតែខ្វះខាតក្នុងរបបអាហារប្រចាំថ្ងៃ។ គ្រាប់ Chia ត្រឹមតែ ២ ស្លាបព្រាបាយប៉ុណ្ណោះ ផ្ដល់ជាតិសរសៃដល់ទៅ ១០ ក្រាម និងប្រូតេអ៊ីន ៥ ក្រាម។ លើសពីនេះ វាសម្បូរទៅដោយជាតិកាល់ស្យូម, ដែក, ម៉ាញ៉េស្យូម, ប៉ូតាស្យូម រួមទាំង Folate, វីតាមីន A, សេលេញ៉ូម និងស័ង្កសីផងដែរ។
ក្រៅពីផ្ដល់ថាមពលដល់រាងកាយ គ្រាប់ Chia គឺជាប្រភពនៃអាស៊ីតខ្លាញ់ Omega-3 ពីរុក្ខជាតិ ដែលជួយកាត់បន្ថយការរលាក និងបង្កើនសុខភាពសរសៃឈាមបេះដូង ក៏ដូចជាមុខងារខួរក្បាល។ ជាតិសរសៃរលាយក្នុងគ្រាប់នេះ នឹងបង្កើតជាស្រទាប់ជែលនៅពេលប៉ះជាតិទឹក ដែលជួយសម្រួលការបន្ទោរបង់ឱ្យទៀងទាត់ ធ្វើឱ្យមានឆ្អែតបានយូរ និងរក្សាស្ថេរភាពជាតិស្ករក្នុងឈាម។ ជាមួយគ្នានេះ វាក៏ជួយបន្ថយហានិភ័យនៃជំងឺទឹកនោមផ្អែមប្រភេទទី២ មហារីកមួយចំនួន និងបញ្ចុះកូឡេស្តេរ៉ុលអាក្រក់ (LDL) ផងដែរ។.jpg)
យ៉ាងណាមិញ ទោះជាមានអត្ថប្រយោជន៍ដូចគ្នាទៅនឹងគ្រាប់ជី ដែលខ្មែរយើងនិយមលាយជាមួយបង្អែមនោះ ប៉ុន្តែវាក៏មានចំណុចខុសគ្នាដោយសារ គ្រាប់ Chia មិនចាំបាច់ត្រាំទឹកទើបអាចទទួលទានបាននោះទេ គឺយើងអាចទទួលទានវាទាំងស្ងួត និងត្រាំទឹកបានដូចគ្នា។
ទោះជាយ៉ាងណា ដើម្បីទទួលបានអត្ថប្រយោជន៍សម្រាប់ការរំលាយអាហារ អ្នកជំនាញណែនាំឱ្យត្រាំគ្រាប់ Chia ក្នុងទឹក ឬទឹកដោះគោក្នុងរយៈពេលពី ១០ ទៅ ១៥ នាទី រហូតដល់វារីកសឹមទទួលទាន។ នេះជួយឱ្យរាងកាយស្រូបយកជីវជាតិបានងាយស្រួល និងជៀសវាងការហើមពោះ ជាពិសេសសម្រាប់អ្នកដែលមិនទាន់ស៊ាំនឹងរបបអាហារដែលមានជាតិសរសៃខ្ពស់។ ដូចនេះ ការទទួលទាន គ្រាប់ Chia ត្រឹមតែ ១ ស្លាបព្រាបាយក្នុងមួយថ្ងៃ នឹងក្លាយជាចំណែកដ៏សំខាន់ក្នុងការលើកកម្ពស់សុខុមាលភាពទូទៅ និងការពាររាងកាយពីការខូចខាតកោសិកាបានយ៉ាងមានប្រសិទ្ធភាព៕
