ធ្លាប់តែចាប់ដៃគូគ្នាទទួលបានការស្រលាញ់ចូលចិត្តពីទស្សនិកជនពេលនេះតារាចម្រៀង SK និង Step ត្រូវរងមតិរិះគ.ន់ពីអ្នកលេងបណ្តាញសង្គមទៅលើបទចម្រៀងថ្មីរបស់អ្នកទាំងពីរជាមួយនឹងមតិយោបល់ជាច្រើនថាស្តាប់មិនបាន មិនដឹងចង់ច្រៀងពីអ្វី ចំណែកឯមតិខ្លះទៀតថាធ្វើឱ្យតែបានៗ។
កាលពីពេលថ្មីៗនេះផលិតកម្ម GenMusix បានបញ្ចេញបទថ្មីរបស់ SK និង Step មានចំណងជើងថា «រាំនៅណា?» ដែលទីតាំងនៅក្នុង MV នេះគឺស្ថិតនៅពហុកីឡដ្ឋានមរតកតេជោ។ ប្រភេទនៃបទនេះគឺញាក់កន្ទ្រាក់អារម្មណ៍ដោយមានទាំងក្បាច់រាំទៀតផង។ ទោះជាយ៉ាងណាបទនេះមិនបានធ្វើឱ្យមនុស្សជាច្រើនបានបញ្ចេញមតិរិះគន់ SK និង Step។
អ្នកលេងបណ្តាញសង្គមបានបញ្ចេញមតិថា «បទស្អីទេហា ស្តាប់អត់បានអីម៉ាម៉ាត់, ស្តាប់ដំបូងសម្លេងខាងស្រីស្រដៀងសម្លេង កញ្ញា រ៉ាប៊ី, ពាក្យ ( ប្រាប់ ) និយាយលែងច្បាស់ហើយ, បទចម្រៀងឥឡូវស្ដាប់អត់យល់សោះមិនដឹងមានន័យថាម៉េច, ហឺដឹងចង់ច្រៀងពីអី?ខាងស្រីច្រៀងដូចមិនសូវច្បាស់សោះ, បទអីទេស្ដាប់មិនចូល»។
គណនីផ្សេងទៀតបានបញ្ចេញមតិថា «ឱ្យតែញាក់ចេះតែច្រៀងហើយ, មានអារម្មណ៍ធ្វើឱ្យតែបានៗគ្មានអីចង់ស្ដាប់, មួយបទច្រៀងតាពិនហ្នឹងទេ, ខាងស្រីច្រៀងឱ្យស្ដាប់ឱ្យបានផងលោកអើយ ច្រៀងស្ដាប់អត់បានហ្មង…»។ ដ្បិតថាមានមតិប្រតិកម្មមិនពេញចិត្តច្រើនប៉ុន្តែអ្នកមួយចំនួនក៏បង្ហាញការចូលចិត្តបទនេះដូចគ្នា។
ចាប់តាំងពីប្រឡូកអាជីពសិល្បៈមក SK និង Step ត្រូវបានទស្សនិកជនចាត់ទុកថាជាដៃគូដ៏ស័ក្តិសមបំផុតរាល់ពេលទស្សនាការសម្តែងរបស់អ្នកទាំងពីរពួកគេចូលចិត្តខ្លាំង។ លើសពីនេះទៅទៀតភាពស៊ីចង្វាក់គ្នារបស់អ្នកទាំងពីរនិងសកម្មភាពផ្អែមល្ហែមធ្វើឱ្យអ្នកគាំទ្រជាច្រើនចាត់ទុកថា SK និង Step គឺជាគូស្នេហ៍៕
