អ្នកនាង ចន ច័ន្ទលក្ខណា លើកទឹកចិត្ត កែវ សុបញ្ញា

អ្នកនាង ចន ច័ន្ទលក្ខណា បានលើកទឹកចិត្តតារាចម្រៀង កែវ សុបញ្ញា ជុំវិញជីវិតអាពាហ៍ពិពាហ៍បរាជ័យ។ មិនឱ្យមានការព្រួយបារម្ភទាក់ទងនឹងបញ្ហានេះ សុបញ្ញា បានបង្ហាញថានាងថ្វាយចិត្តនឹងព្រះធម៌ពេលនេះស្ងប់ស្ងាត់ល្អណាស់។

១៥ឆ្នាំទម្រាំនឹងបានភ្ជាប់ពាក្យ ភ្ជាប់ពាក្យជាង២ឆ្នាំទើបបានដឹកដៃគ្នាចូលរោងការ ប៉ុន្តែពិតជាគួរឱ្យសោកស្តាយណាស់ចំណងអាពាហ៍ពិពាហ៍២ឆ្នាំក៏ឈានដល់ផ្លូវបញ្ចប់ហើយរឿងនេះគឺធ្លាក់ទៅលើតារាចម្រៀង កែវ សុបញ្ញា និងលោក ប៉ាល់ ប៉ោស៊ាង ដែលជាមន្រ្ដីកងរាជអាវុធហត្ថ។ ការប្រេះស្រាំរវាងតារាចម្រៀង កែវ សុបញ្ញា និងអតីតស្វាមី គឺពិតជាធ្វើឱ្យមានការភ្ញាក់ផ្អើលនិងសោកស្តាយយ៉ាងខ្លាំងជាពិសេសគឺតារាចម្រៀងរូបនេះដែលទើបតែបាត់បង់កូនស្រីថ្មីៗនេះជាហេតុធ្វើឱ្យមនុស្សជាច្រើនព្រួយបារម្ភពីសុខភាពផ្លូវចិត្តរបស់ បញ្ញា។

អ្នកនាង ចន ច័ន្ទលក្ខណា អតីតប្រធានសមាគមសិល្បករខ្មែរបានផ្តល់កម្លាំងចិត្ត លើកទឹកចិត្តមកកាន់តារាចម្រៀង កែវ សុបញ្ញា ថា «ស្ងប់ស្ងាត់ គឺ ល្អបំផុតអូន បងជូនពរឱ្យអូនជោគជ័យ ការងារកាន់តែច្រើន លុយហូរចូលដូចទឹក ជីវិតជួបតែភាពរីករាយស្រស់បំព្រង។ រឿងរ៉ាវកំពុងជួបសូមចាត់ទុកជាអតីតកាលហើយប្រែវាជាបទពិសោធន៍ជីវិតដើម្បីស្វែងរកគន្លឹះធ្វើឱ្យខ្លួនឯងមានច្រកចេញដោយសន្តិភាព»។

ជាមួយនឹងការផ្តល់កម្លាំងលើកទឹកចិត្តពីសំណាកអ្នកនាងចន ច័ន្ទលក្ខណា កែវ សុបញ្ញា បានឆ្លើយតបកុំឱ្យ អ្នកនាង ចន ច័ន្ទលក្ខណា ព្រួយបារម្ភពីនាងពីព្រោះពេលនេះនាងថ្វាយចិត្តនឹងព្រះធម៌ហើយ ខណៈបេះដូងពេលនេះស្ងប់ស្ងាត់ល្អណាស់។

គួរឱ្យដឹងថានៅពេលអតីតស្វាមីបានបញ្ជាក់ពីការលែងលះរបស់អ្នកទាំងពីរទៅតាមផ្លូវច្បាប់ តារាចម្រៀង កែវ សុបញ្ញា បានបង្ហោះសារបង្ហាញពីភាពរឹងមាំរបស់ខ្លួន ដួលចេះក្រោករួចហើយបន្តដំណើរទៅមុខទៀត។ តារាចម្រៀងក្នុងទ្រនំហង្សមាសរូបនេះបានអរគុណជាពិសេសទៅកាន់អ្នកមានគុណរបស់ខ្លួនដែលឱបនាងមិនលែង មិនថាធ្លាក់ដល់ចំណុចណាក៏ដោយ៕