កិច្ចប្រជុំ RBC នៅតែគ្មានផ្លែផ្កា ស្របពេលដែលយោធាថៃបន្តធ្វើសកម្មភាពខុសច្បាប់លើទឹកដីកម្ពុជា

(ភ្នំពេញ) ក្រោយបានកាន់កាប់ផ្នែកខ្លះនៃទឹកដីកម្ពុជាដោយខុសច្បាប់ យោធាថៃកំពុងបង្កើនសកម្មភាពរំលោ.ភបំពា.នដែលមានទាំងការជីកលេណដ្ឋានបន្ថែម, ហ៊ំព័ទ្ធបន្លាលួស និងឈូសឆាយដីផ្ទះប្រជាជនកម្ពុជាដោយមិនខ្លាចញញើតច្បាប់អន្តរជាតិ ស្របពេលដែលកិច្ចប្រជុំ RBC រវាងភាគីទាំងពីរនៅតែពុំអាចស្វែងរកចំណុចកណ្ដាលដើម្បីឈានដល់ការដោះស្រាយបានឡើយ។

យោងសេចក្តីប្រកាសព័ត៌មានរបស់យក្រសួងការពារជាតិ កាលពីថ្ងៃទី២ ខែកុម្ភៈម្សិលមិញនេះបានឲ្យដឹងថា ក្រុមលេខាធិការដ្ឋាននៃគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៤ ភាគីកម្ពុជា និងកងទ័ពភូមិភាគទី២ ភាគីថៃ បានជួបប្រជុំគ្នាសារជាថ្មីនៅច្រកអន្តរជាតិជាំ-សាង៉ាំ ស្រុកអន្លង់វែង ខេត្តឧត្តរមានជ័យ ក្រោមការសង្កេតការណ៍ពីក្រុមអ្នកសង្កេតការណ៍អាស៊ាន (AOT)។

ទោះជាយ៉ាងណា ក្រោយកិច្ចពិភ្សាត្រូវបានបញ្ចប់ ភាគីទាំងពីរមិនទាន់អាចរកឃើញនូវចំណុចកណ្តាលរួមគ្នាណាមួយឡើយ។ ហេតុដូច្នេះហើយ ភាគីទាំងពីរក៏បានឯកភាពគ្នា ដកឃ្លាវិលត្រលប់ទៅទីបញ្ជាការរៀងខ្លួនវិញ ហើយបន្តផ្លាស់ប្តូរឯកសារ និងពិភាក្សាគ្នាឈានដល់ការឯកភាពគ្នានាពេលខាងមុខទើបមានការរៀបចំពិធីចុះហត្ថលេខា និងកិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៤ របស់កម្ពុជា និងកងទ័ពភូមិភាគទី២ របស់ថៃ ។

ងាកចេញពីកិច្ចប្រជុំដែលមិនទទួលបានលទ្ធផលសម្រេច នៅតាមបណ្ដោយព្រំដែនកម្ពុជា ជាពិសេសត្រង់ចំណុចដែលថៃបានដណ្ដើមយកការកាន់កាប់ដោយខុសច្បាប់ឯណោះវិញ យោធាថៃកំពុងបង្វែរស្ថានការណ៍ដោយទាញចំណាប់អារម្មណ៍អន្តរជាតិឲ្យងាកត្រឡប់ទៅលើការប្រយុទ្ធប្រឆាំងនឹងការបោកប្រាស់នៅលើទឹកដីអធិបតេយ្យរបស់កម្ពុជាវិញ ដូចដែលពួកគេបានអះអាងពីមុននិងយកធ្វើជាលេសឈ្លានពានកម្ពុជា។

សកម្មភាពចុងក្រោយបង្អស់របស់ពួកគេ គឺតាមរយៈដឹកនាំមន្ត្រីស៊ើបអង្កេតអាមេរិក FBI និងអនុព័ន្ធយោធាបរទេសពីប្រទេសចំនួន ២០ ទៅមើលសណ្ឋាគារដែលពួកគេចោទថាជាមជ្ឈមណ្ឌលបោកប្រាស់មួយនៅតំបន់អូរស្មាច់ ខេត្តឧត្តរមានជ័យ កាលពីថ្ងៃទី២ ខែកុម្ភៈម្សិលមិញ។

ជុំវិញបញ្ហានេះ លោកបណ្ឌិត គិន ភា នាយកវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានលើកឡើងថា ការនាំមន្ត្រីយោធាបរទេស និងមន្ត្រី FBI អាមេរិកទៅទស្សនាតំបន់ទឹកដីនៃរដ្ឋអធិបតេយ្យមួយទៀតគឺជារឿងខុសច្បាប់ ដោយមិនរាប់បញ្ជូលថាតើទស្សនកិច្ចនេះធ្វើទៅកាន់មជ្ឈមណ្ឌលបោកប្រាស់តាមប្រព័ន្ធអ៊ីនធឺណិតដូចដែលថៃចោទប្រកាន់ឬយ៉ាងណានោះទេ។ លោកបានសង្កត់ធ្ងន់ថា «ប្រទេសថៃគ្មានអំណាចក្នុងការគ្រប់គ្រង ឬនាំប្រតិភូបរទេសចូលធ្វើអ្វីនៅក្នុងទឹកដីកម្ពុជានោះទេ។ នេះគឺជាការរំលោ.ភលើកិច្ចព្រមព្រៀងបទឈប់បាញ់ និងកិច្ចព្រមព្រៀងសន្តិភាពទីក្រុងកូឡាឡាំពួ ព្រមទាំងកិច្ចព្រមព្រៀង ជាច្រើនផ្សេងទៀតដែលភាគីទាំងពីរបានឯកភាពគ្នាក្នុងពេលកន្លងមក។»

ជាមួយគ្នានេះផងដែរ លោកបណ្ឌិត គិន ភា បានជំរុញឱ្យក្រសួងពាក់ព័ន្ធរបស់កម្ពុជា ដូចជាក្រសួងការបរទេស ក្រសួងការពារជាតិ ព្រមទាំងលេខាធិការដ្ឋានគណៈកម្មាធិការព្រំដែន ធ្វើការតវ៉ាជាសាធារណៈចំពោះសកម្មភាពបែបនេះដែលបានធ្វើឡើងដោយប្រទេសថៃ៕