កុមារប្រើប្រាស់ទូរស័ព្ទដៃមុនអាយុ១៣ឆ្នាំ នឹងប៉ះពាល់សុខភាពផ្លូវចិត្តខ្លាំងពេលពេញវ័យ

ឪពុក-ម្តាយជាច្រើនបណ្តោយឱ្យកូនៗប្រើប្រាស់ទូរស័ព្ទដៃលេងបណ្តាញសង្គមតាំងពីមុនអាយុ១៣ឆ្នាំ ដោយពុំបានគិតពីផលប៉ះពាល់សុខភាពផ្លូវចិត្តរបស់កូនឡើយ ដោយសារយល់ថា កូនខ្លួននឹងឆ្លាតពេលធំឡើង និងអាចរៀនសូត្រពីបច្ចេកវិទ្យា ឬចំណេះដឹងផ្សេងៗដោយខ្លួនឯង ។ ប៉ុន្តែបើតាមការស្រាវជ្រាវចុងក្រោយបង្ហាញថា កុមារប្រើប្រាស់ទូរស័ព្ទដៃមុនអាយុ១៣ឆ្នាំ នឹងប៉ះពាល់សុខភាពផ្លូចិត្តខ្លាំងពេលពេញវ័យ ។

យោងតាមការស្រាវជ្រាវចុងក្រោយរបស់អ្នកស្រាវជ្រាវនៅទូទាំងពិភពលោក កុមារប្រើប្រាស់ទូរស័ព្ទដៃមុនអាយុ១៣ឆ្នាំ នឹងប៉ះពាល់សុខភាពផ្លូវចិត្តខ្លាំងពេលពេញវ័យ បើធៀបនឹងកុមារដែលប្រើប្រាស់ទូរស័ព្ទដៃក្រោយអាយុ១៣ឆ្នាំ ។ លើសពីនេះ ពួកគេប្រឈមនឹងការធុញថប់ ជំងឺធ្លាក់ទឹកចិត្ត ចង់ធ្វើអត្តឃា.ត និងមើលមិនឃើញតម្លៃរបស់ខ្លួន ។

ការស្រាវជ្រាវផ្សព្វផ្សាយក្នុង Journal of Human Development and Capabilities ដែលវិភាគទិន្នន័យរបស់មនុស្សអាយុចាប់ពី១៨ឆ្នាំ ទៅ២៤ឆ្នាំ ស្មើជាង១សែននាក់ បង្ហាញថា កុមារដែលចាប់ផ្តើមប្រើប្រាស់ទូរស័ព្ទដៃ ឬស្មាតហ្វូនតាំងពីអាយុតិច គឺប្រឈមនឹងបញ្ហាផ្លូវចិត្ត និងអាកប្បកិរិយា ។ ក្រៅពីនេះ ការប្រើប្រាស់ស្មាតហ្វូនបណ្តាលឱ្យគេងមិនគ្រប់គ្រាន់, រងការគំរាមកំហែងតាមអ៊ីនធើរណេត និងខ្វះការទំនាក់ទំនងជាមួយក្រុមគ្រួសារ ។

ទោះជាការស្រាវជ្រាវនេះមិនអាចបញ្ជាក់ពីស្មាតហ្វូន គឺជាមូលហេតុចម្បងធ្វើប៉ះពាល់ផ្លូវចិត្ត ប៉ុន្តែគ្រូពេទ្យ និងអ្នកស្រាវជ្រាវ ដាស់តឿនថា ការបណ្តោយឱ្យកុមារលេងស្មាតហ្វូនឆាប់រហ័សពេក ជាពិសេស គ្មានការគ្រប់គ្រងពីឪពុក-ម្តាយ ឬឱ្យមើលអ្វីតាមចិត្តក្នុងបណ្តាញសង្គមតាំងពីអាយុតិច នឹងធ្វើឱ្យពួកគេកាន់តែប្រឈមនឹងជំងឺផ្លូវចិត្តរយៈពេលវែង ។

ក្រៅពីនេះ នៅមានផលប៉ះពាល់ជាច្រើនទៀតដោយសារការប្រើប្រាស់ស្មាតហ្វូនមុនអាយុ១៣ឆ្នាំ ដូចជា ៖

-ការអភិវឌ្ឍខួរក្បាល និងអារម្មណ៍ ៖ បាត់បង់សមាធិ អារម្មណ៍ឆេវឆាវ និងឆាប់មួរម៉ៅ
-រាងកាយ ៖ ឈឺភ្នែក ឈឺក កើតជំងឺធាត់ និងសម្រាកមិនគ្រប់គ្រាន់
-ការអភិវឌ្ឍសង្គម ៖ ខ្វះទំនាក់ទំនងជាមួយអ្នកដទៃ និងជំនាញប្រើប្រាស់ភាសាយឺតយ៉ាវ ។

ឪពុក-ម្តាយគួរតែកំណត់ពេលវេលាការប្រើប្រាស់ស្មាតហ្វូនរបស់កូនៗ និងដាក់លក្ខខណ្ឌដល់ពួកគេ ដូចជា ៖ ប្រើប្រាស់ស្មាតហ្វូនបន្ទាប់ពីធ្វើកិច្ចការសាលារួចរាល់ ហាមប្រើប្រាស់ស្មាតហ្វូនមុនគេង និងមិនបណ្តោយឱ្យមើលអ្វីតាមចិត្ត ៕