អានសៀវភៅជួយអ្នកទទួលបានសុខភាពល្អ និងមានអាយុវែង

ការអានសៀវភៅអាចមានឥទ្ធិពលជាងអ្វីដែលយើងគិត ពីព្រោះមានការស្រាវជ្រាវជាច្រើនរបស់សហរដ្ឋអាមេរិក និងប្រទេសអង់គ្លេស បង្ហាញថា ការអានសៀវភៅជាប្រចាំនឹងជួយឱ្យមនុស្សចាស់អាយុកាន់តែវែង កាត់បន្ថយការតានតឹងផ្លូវចិត្ត ខួរក្បាលចងចាំបានល្អ ការពារជំងឺវង្វេងវង្វាន់ រាងកាយបានសម្រាក និងកាត់បន្ថយអារម្មណ៍ឯកា ពីព្រោះសៀវភៅដើរតួនាទីជាមិត្ត ។

បើតាមអ្នកព្យាបាលផ្លូវចិត្តនៅទីក្រុង Los Angeles រដ្ឋ California សហរដ្ឋអាមេរិក ដែលបានស្រាវជ្រាវអំពីទំនាក់ទំនងរវាងការអានសៀវភៅ និងអាយុរបស់មនុស្ស គឺនៅពេលអានសៀវភៅ យើងនឹងស្ថិតក្នុងស្ថានភាពមួយដូចការធ្វើសមាធិ ហើយវានឹងជួយការពារផលប៉ះពាល់សុខភាពផ្លូវចិត្ត ។

ការស្រាវជ្រាវមួយទៀតរបស់សាកលវិទ្យាល័យ Yale សហរដ្ឋអាមេរិក ស្តីពីទំនាក់ទំនងរវាងការអានសៀវភៅ និងអាយុរបស់មនុស្ស ដែលការស្រាវជ្រាវនេះចំណាយពេលរហូតដល់១២ឆ្នាំ ដើម្បីតាមដានមនុស្សចាស់អាយុចាប់ពី៥០ឆ្នាំឡើង ចំនួន៣,៦៣៥នាក់ បង្ហាញថា អ្នកអានសៀវភៅជាប្រចាំនឹងមានអាយុវែងជាងមុនជាមធ្យម ចំនួន២៣ខែ បើធៀបជាមួយអ្នកមិនបានអានសោះ ប៉ុន្តែកម្រិតការសិក្សា ប្រាក់ចំណូល ការធ្លាក់ទឹកចិត្ត និងសមត្ថភាព មិនពាក់ព័ន្ធនឹងអាយុវែងទេ ។

សាស្ត្រាចារ្យចិត្តវិទ្យាមកពីសាកលវិទ្យាល័យ York ប្រទេសអង់គ្លេស លើកឡើងថា សៀវភៅអាចជួយកាត់បន្ថយអារម្មណ៍ឯកាបាន ដោយវាដើរតួនាទីជាមិត្តភក្តិរបស់យើង ។ បច្ចុប្បន្ន ភាពឯកាជាកត្តាហានិភ័យធ្ងន់ធ្ងររួមចំណែកដល់ការស្លាប់មុនអាយុ ហើយវាដូចគ្នានឹងការជក់បារី ឬជំងឺធាត់ ខណៈអ្នកអានដែលចូលរួមជាក្រុមនឹងទទួលបានអត្ថប្រយោជន៍កាន់តែច្រើន ឬបង្កើនទំនាក់ទំនងក្នុងសង្គម ។

ការស្រាវជ្រាវផ្សេងទៀតដែលចំណាយពេលរហូតដល់១៤ឆ្នាំ និងផ្សព្វផ្សាយកាលពីឆ្នាំ២០២០ បង្ហាញថា មនុស្សចាស់ដែលបានអានសៀវភៅទៀងទាត់នឹងអាចការពារជំងឺវង្វេងវង្វាន់ ច្រើនជាងអ្នកមិនអានសៀវភៅ ។

ការស្រាវជ្រាវចុងក្រោយ ដែលផ្សព្វផ្សាយក្នុងទស្សនាវដ្តី JAMA Neurology គឺការអាន និងសរសេរ មានទំនាក់ទំនងជាមួយការចងចាំរបស់ខួរក្បាល ការអានដូចគ្នានឹងការអង្គុយសមាធិយ៉ាងស្ងាត់ស្ងៀម ។ វាកាត់បន្ថយភាពតានតឹងផ្លូវចិត្ត និងជួយឱ្យកាន់តែអាយុវែង ពីព្រោះភាពតានតឹងផ្លូវចិត្តធ្វើឱ្យមនុស្សឆាប់ចាស់ រំខានដំណេក ប្រព័ន្ធការពាររាងកាយចុះខ្សោយ និងប៉ះពាល់សរសៃឈាមបេះដូង ។ ហេតុនេះ គួរអានសៀវភៅដើម្បីឱ្យប្រព័ន្ធប្រសាទមានតុល្យភាពឡើងវិញ ជួយជំរុញខួរក្បាល និងរាងកាយបានសម្រាក ៕