នេន ទុំ ថាមិនយកខ្មែរធ្វើជាសត្រូវទេពេលនេះក្រោយច្រៀងឱ្យអ្នកភៀសសឹករំសាយទុក្ខសោកខ្លះហើយរងការវែកញែក

បន្ទាប់ពីបង្ហោះវីដេអូបកស្រាយចម្រៀងឱ្យបងប្អូនស្ថិតនៅក្នុងជំរុំភៀសសឹករំសាយទុក្ខកង្វល់ខ្លះតារាចម្រៀង នេន ទុំ ត្រូវបានគណនីមួយចំនួនតូចបញ្ចេញមតិរិះគន់ដែលបង្ហាញថាមិនទំនង។ ជាការឆ្លើយតប នេនទុំ បានបញ្ជាក់ថាពេលនេះលោកមិនយកខ្មែរធ្វើជាសត្រូវនោះទេហើយលោកនៅតែបន្តការងារដដែល។

កាលពីថ្ងៃទី១៦ ខែធ្នូ តារាចម្រៀង នេន ទុំ បានបង្ហោះវីដេអូមួយដែលលោកបានយកអំណោយជូនដល់បងប្អូនភៀសសឹកដែលរងទុក្ខដោយសារតែការឈ្លានពានរបស់សៀម។ មិនត្រឹមតែផ្តល់អំណោយប៉ុណ្ណោះទេ នេន ទុំ បានយកតន្រ្តីមកព្យាបាលផ្លូវចិត្ត និងឱ្យបងប្អូននៅទីនោះរំសាយទុក្ខសោកខ្លះពីព្រោះលោកឃើញថាម្នាក់ៗគឺពិតជាមានកង្វល់ខ្លាំងណាស់។ ទោះយ៉ាងណា វីដេអូដែលផ្តល់ការសប្បាយរបស់ នេន ទុំ ត្រូវបានអ្នកលេងបណ្តាញសង្គមប៉ុន្មាននាក់បញ្ចេញមតិរិះគន់ចំពោះសកម្មភាពនេះ។

នៅថ្ងៃទី១៨ ខែធ្នូ នេន ទុំ បានចេញវីដេអូមួយជាមួយនឹងចំណងជើងថា «ខ្ញុំមិនយកខ្មែរធ្វើសត្រូវឡើយ តស់ជួយគ្នាបន្តទៀត»។ តារាចម្រៀងរូបនេះបាននិយាយថា មានអ្នកតិះដៀលលោកប៉ុន្តែមានចំនួនតិចនោះទេខណៈក៏មានអ្នកឆាតមកលើកទឹកចិត្តកុំឱ្យគិតច្រើនចំពោះការរិះគន់នេះដោយជំរុញឱ្យធ្វើមូលនិធិបន្ត។ លោក នេន ទុំ បានបញ្ជាក់ថាលោកនឹងមិនឈប់នោះទេហើយក៏មិនយកខ្មែរណាមកធ្វើជាសត្រូវក្នុងពេលនោះទេហើយអ្នកផ្សេងគិតយ៉ាងមិចគិតចុះប៉ុន្តែលោកទៅផ្ទាល់បានដឹងថាទីនោះស្មុគយ៉ាងណា។

ម្ចាស់បទ«លុយខ្មែរ» បន្តទៀតថា នៅកន្លែងភៀសសឹកគឺពោរពេញដោយភាពស្រងូតស្រងាត់ ទឹកមុខស្ងួត ហើយលោកទៅដល់ក៏ស្លុង បាក់ទឹកចិត្តទៅតាមជាមួយដែរ។ ដូច្នេះហើយទើបលោកច្រៀងឱ្យពួកគាត់សប្បាយធូរអារម្មណ៍ខ្លះបើអង្គុយតែទុក្ខធ្វើអ្វីមិនចេញនោះទេ។

ជាមួយគ្នានេះ តារាចម្រៀង នេន ទុំ បានអះអាងដោយម៉ឺងមាត់ថាលុយជំនួយរបស់មហាជននឹងធានាមិនឱ្យបាត់ឡើយគឺនឹងបានមកដល់ដៃបងប្អូនភៀសសឹកនិងនាំអារម្មណ៍ល្អៗឱ្យពួកគាត់ធូរស្បើយជាងនេះ៕