ណា សាឌី ទទូចឱ្យអ្នកលេងបណ្តាញសង្គមកុំជាន់ខ្មែរគ្នាឯងក្នុងកាលៈទេសៈនេះ

ពិធីការិនី ណា សាឌី បានទទូចឱ្យសាធារណជនប្រើប្រាស់បណ្តាញសង្គមកុំវាយប្រហារជាន់ខ្មែរគ្នាឯងទោះបីជាមនុស្សម្នាក់នោះពុំទាន់ធ្វើរឿងណាដែលទស្សនិកជនពេញចិត្តក៏ដោយ។ ណា សាឌី ថាក្នុងកាលៈទេសៈនេះខ្មែរត្រូវរួបរួមគ្នាជួយគ្នាទៅតាមសមត្ថភាព មានភាពសាមគ្គីនោះជាអ្វីដែលសៀមមិនមាន។

ដូចប្រិយមិត្តនិយមលេងបណ្តាញសង្គមជ្រាបមកហើយថា ពិធីការិនី ណាសាឌី គឺជាកូនកាត់ខ្មែរ-ថៃ ប៉ុន្តែហ៊ាននិយាយការពិត បង្ហាញគោលជំហរជាមួយកម្ពុជា ខណៈឪពុករបស់នាងដែលជាជនជាតិថៃបានមករស់នៅលើទឹកដីកម្ពុជាជាង៣០ឆ្នាំមកហើយ។ ការចេញវីដេអូរបស់តារាស្រីរូបនេះក៏បានធ្វើឱ្យអ្នកលេងបណ្តាញសង្គមថៃចូលមកវាយប្រហារតាមរយៈការខម្មិនជាច្រើនដូចគ្នា។

បន្ទាប់ពីរៀបរាប់ការពិតនៅក្នុងដំណាក់កាលនេះក្នុងនាមជាកូនកាត់ខ្មែរ-ថៃ ណា សាឌី ក៏បានចេញមុខសុំចិត្តប្រជាជនខ្មែរខឹងស្អប់ជាន់ខ្មែរគ្នាឯងចំពេលដែលថៃកំពុងឈ្លានពានកម្ពុជា។ ណា សាឌី បាននិយាយនៅក្នុងវីដេអូថា «នាងសុំរឿងមួយគឺកុំជាន់ខ្មែរគ្នាឯងក្នុងពេលនេះ ទោះបីជាមនុស្សម្នាក់នោះពុំទាន់ធ្វើរឿងណាដែលមិនទាន់ពេញចិត្តរបស់សាធារណជនក៏កុំជាន់គ្នាពេលនេះដោយទុករឿងនោះមួយឡែកសិន។ ណា សាឌី ថាពេលនេះយើងត្រូវតែជួយជាតិ ចូលរួមជាកម្លាំង រៀបចំខ្ចប់ស្បៀង បរិច្ចាគថវិកាឬអ្វីផ្សេងដោយកុំចាប់កំហុសគ្នាក្នុងពេលនេះគឺមិនត្រូវទេ»។

ណា សាឌី បន្ថែមថាប្រសិនជាខឹងរឿងអ្វីមួយចាំចប់សង្គ្រាមសិននាងមិនចង់ឃើញខ្មែរជាន់គ្នា ប្រៀបធៀបស្អប់គ្នាក្នុងកាលៈទេសៈដែលយើងត្រូវយកឈ្នះអ្វីដែលសៀមមិនមានគឺការសាមគ្គី ស្រលាញ់គ្នាដូច្នេះនាងសូមអង្វរតែម្តងត្រង់ចំណុចនេះ»។

គួរបញ្ជាក់ថាការសម្រេចចិត្តចេញវីដេអូនិយាយជាភាសាអង់គ្លេសដែលបញ្ជាក់ថាកម្ពុជាមិនបានវាយប្រហារមុន រងនូវការវាយប្រហារគ្រប់សព្វពីភាគីថៃធ្វើឱ្យមានផលប៉ះពាល់ជាច្រើននោះ ណា សាឌី បញ្ជាក់ថានាងធូរចិត្តជាងពេលមិនទាន់និយាយ។ ចេញមុខការពារកម្ពុជាដូចនេះ កូនកាត់ថៃរូបនេះបានបោះពាក្យថានាងមិនបានរមិលគុណនោះទេពីព្រោះប្រទេសថៃមិនបានជួយនាងឡើយ៕