មិនថាកងទ័ពជួរមុខឬកងទ័ពជួរក្រោយកំពុងតែសស្រាក់ដៃគ្នាយ៉ាងខ្លាំងក្នុងការសាមគ្គី ពួតដៃគ្នាការពារទឹកដីពីសត្រូវឈ្លានពាន។ ជាមួយនឹងការពារពីកងទ័ពជួរមុខ ប្រជាជនខ្មែរក៏មានជំនឿដោយបានធ្វើពិធីបួងសួងសុំសេចក្តីសុខជួយការពារវីរកងទ័ព និងដាក់បណ្តាសាឱ្យសត្រូវឈ្លានពានវិនាសអន្តរាយ។
នៅក្នុងពិធីកាលពីល្ងាចថ្ងៃទី១២ ខែធ្នូ គេបានឃើញវត្តមានតារាចម្រៀង ណុប បាយ៉ារិទ្ធតារាចម្រៀង គី សាវីន រួមទាំងសាស្រ្តាចារ្យ លោកគ្រូ អ្នកគ្រូ និងនិស្សិតនៃសាកលវិទ្យាល័យភូមិន្ទ និង វិចិត្រសិល្បៈចូលរួមប្រារព្ធពិធីបួងសួងរំលឹកគុណបុណ្យបារមីវត្ថុស័ក្តិសិទ្ធិក្នុងលោកឱ្យជួយប្រោសព្រំពរជ័យដល់វីរកងទ័ពជួររបស់ខ្មែរ ដែលកំពុងឈរជើងការពារទឹកដីនៅសមរភូមិជួរមុខឱ្យទទួលបានជោគជ័យជម្នះគ្រប់សមរភូមិ។ 
មិនត្រឹមតែចូលរួម គី សាវីន ម្ចាស់ពាន Cambodian Idol រដូវកាលទី៥ ក៏បានចូលរួមពោល បួងសួងសុំសេចក្តីសុខជាមួយនឹងសំឡេងយ៉ាងគ្រលួចនៃទេពកោសល្យរបស់ខ្លួនផ្ទាល់ដែលកើតចេញពីអ្នកចម្រៀងបុរាណ។
នៅក្នុងពិធីបួងសួងនេះដែរ នាដការី បានរាំបួងសួង រួមទាំងបង្ហាញពីក្បាច់របាំ និងចម្រៀង បញ្ជាក់ពីភាពអង់អាច និងការលះបងរបស់វីរកងទ័ពដែលលះបង់គ្រួសារអាយុជីវិត ដើម្បីការពារប្រជាជន និងបូរណភាពទឹកដីពីចោរឈ្លានពាន។ ជាមួយនឹងការបួងសួងសុំសេចក្តីសុខជូនដល់វីរកងទ័ព នៅក្នុងពិធីបួងសួងនេះគឺមាន ពាក្យដាក់បណ្តាសាដល់ចោរឈ្លានពានផងដែរ។
គួរជម្រាបជូនថា នេះជាលើកទី២ហើយ ដែលសាកលវិទ្យាល័យភូមិន្ទវិចិត្រសិល្បៈ បានរៀបចំពិធីបួងសួង ដើម្បីសុំសេចក្តីជូនចំពោះកងទ័ពជួរមុខ ដែលកំពុងប្រយុទ្ធតតាំងនឹងសត្រូវ៕
