ទោះពេលនេះរូបរាងកាយកំពុងតែប្រកួតតំណាងប្រទេសនៅលើឆាកអន្តរជាតិក្តី ប៉ុន្តែបវរកញ្ញា ផន ស្រីពី និង ដេត ស្រីនាឌ នៅតែព្រួយបារម្ភពីសុខទុក្ខប្រទេសជាតិអារម្មណ៍ស្ទើរតែមិននៅក្នុងខ្លួន។ មិនត្រឹមតែប៉ុណ្ណោះ ផន ស្រីពី Miss Cosmo Cambodia 2025 បានប្រកាសបង្វែរថវិកាពីការ vote របស់ខ្លួនទៅជាជំនួយជូនប្រជាជនខ្មែរដែលកំពុងជួបទុក្ខលំបាក។
នៅវេលាម៉ោងជាង១២យប់ឈានចូលថ្ងៃទី៩ ខែធ្នូ ផន ស្រីពី បានបង្ហោះនៅលើបណ្តាញសង្គមថា «ថវិកាដែលបានមកពីបងប្អូនសម្រាប់ការvote ខ្ញុំសុំមិនចំណាយទៅលើការVoteនោះទេ ថវិកាទាំងនេះនាងខ្ញុំនឹងទុកជាជំនួយសម្រាប់បងប្អូនខ្មែរយើងដែលកំពុងជួបទុក្ខលំបាក»។ បវរកញ្ញារូបនេះបានបញ្ជាក់ទៀតថា ថវិកានោះមិនច្រើនទេតែជាផ្នែកតូចមួយដើម្បីបង្ហាញពីការរួបរួមសាមគ្គីរបស់ជាតិខ្មែរ។
ជាមួយនឹងការព្រួយបារម្ភពីសុខទុក្ខប្រជាពលរដ្ឋខ្មែរ ខណៈដែលខ្លួនកំពុងបំពេញភារកិច្ចតំណាងជាតិនៅលើទឹកដីប្រទេសវៀតណាម អ្នកគាំទ្រក៏បានលើកទឹកចិត្តទៅដល់ ផន ស្រីពី ឱ្យបន្តដំណើរទៅមុខទៀតស្របពេលការប្រកួតផ្តាច់ព្រ័ត្រមកដល់នាពេលឆាប់ៗខាងមុខនេះ។ 
កាលពីពេលថ្មីៗនេះ ផន ស្រីពី បានបង្ហាញខ្លួនជាមួយនឹងសំលៀកបំពាក់ប្រពៃណីខ្មែរដោយយកលំនាំតាមហ្លូងយាយធ្វើឱ្យមានការចាប់អារម្មណ៍យ៉ាងខ្លាំងពីសំណាកអ្នកតាមដានវិស័យបវរកញ្ញា។ វគ្គផ្តាច់ព្រ័ត្រនៃកម្មវិធី Miss Cosmo 2025 នឹងប្រព្រឹត្តិទៅនៅថ្ងៃទី២០ ខែធ្នូ នេះ៕
