តុលាការថៃចេញដីកាចា.ប់ខ្លួនប្រធានអង្គការ Miss Universe អ្នកស្រី Jakkaphong ពីបទក្លែងប.ន្លំប្រាក់វិនិយោគ៣០លានបាត

ប្រទេសថៃ ៖ កាលពីថ្ងៃទី២៥ ខែវិច្ឆិកា ឆ្នាំ២០២៥ តុលាការសង្កាត់ព្រះណាខនតាយ នៅផ្លូវចារឺនគ្រុង តំបន់បាងខរឡេម ទីក្រុងបាងកក បានចេញដីកាចា.ប់ខ្លួនអ្នកស្រី Jakkaphong Jakrajutatip ប្រធានអង្គការ Miss Universe និងជាអតីតនាយិកាក្រុមហ៊ុន JKN Global Group ដោយសារអ្នកស្រីមិនបង្ហាញខ្លួនក្នុងសំណុំរឿងក្លែងបន្លំប្រាក់វិនិយោគចំនួន៣០លានបាត (ស្មើប្រមាណ ៩៣ម៉ឺនដុល្លារ) ។

តុលាការបានកំណត់ពេលអានសាលក្រមក្នុងសំណុំរឿងដែលមានដើមបណ្តឹង គឺលោក Raweewat Maschamadol (ជាកូនប្រុសរបស់លោក Rawi Maschamadol ប្រធានគណបក្ស New Palangdharma) ។ ដើមបណ្តឹងបានដាក់ពាក្យប្តឹងប្រឆាំងនឹងក្រុមហ៊ុន JKN Global Group និងប្តឹងអ្នកស្រី Jakkaphong Jakrajutatip (ឬ Ann Jakkaphong ជាស្ត្រីកែភេ.ទ) ពីបទសហការគ្នាក្លែងបន្លំប្រាក់វិនិយោគ ។

លោក Raweewat ដើមបណ្តឹងបានចោទប្រកាន់ថា កាលពីថ្ងៃទី២៤ ខែកក្កដា និងថ្ងៃទី៨ ខែសីហា ឆ្នាំ២០២៣ អ្នកស្រី Jakkaphong បានឃុបឃិតគ្នាជាមួយក្រុមហ៊ុន JKN Global Group បោកប្រាស់ដើមបណ្តឹង និងលាក់បាំងការពិត ដោយបបួលឱ្យដើមបណ្តឹងបណ្តាក់ទុនទិញមូលបត្របំណុលរបស់ក្រុមហ៊ុន JKN Global Group ។

ដើមបណ្តឹងបញ្ជាក់ថា អ្នកស្រី Jakkaphong បានដឹងយ៉ាងច្បាស់ពីស្ថានភាពហិរញ្ញវត្ថុរបស់ក្រុមហ៊ុនមិនអាចសងបំណងតាមពេលវេលាកំណត់ទេ ប៉ុន្តែអ្នកស្រីនៅតែបោកប្រាស់ឱ្យដើមបណ្តឹងបណ្តាក់ទុនទិញមូលបត្របំណុលរបស់ក្រុមហ៊ុន ស្មើទឹកប្រាក់ចំនួន៣០លានបាត (ឬប្រមាណ ៩៣ម៉ឺនដុល្លារ) ។ ដើមបណ្តឹងរងផលប៉ះពាល់យ៉ាងខ្លាំង ទើបសម្រេចចិត្តប្តឹងក្រុមហ៊ុននេះ និងប្តឹងអ្នកស្រី Jakkaphong ដើម្បីឱ្យតុលាការកាត់ក្តីតាមច្បាប់ ហើយតុលាការក៏បានស៊ើបអង្កេតពិចារណាសំណុំរឿង និងសួរចម្លើយសាក្សី ។

បន្ទាប់ពីពិនិត្យភស្តុតាងរួចរាល់ តុលាការបានកំណត់ពេលបើកសវនាការនៅថ្ងៃទី២៥ ខែវិច្ឆិកា ឆ្នាំ២០២៥ ប៉ុន្តែពេលដល់ថ្ងៃកំណត់ ស្រាប់តែអ្នកស្រី Jakkaphong មិនមកតុលាការ និងមិនប្រាប់ពីមូលហេតុនៃការពន្យារពេលមកតុលាការ ។ តុលាការសន្និដ្ឋានថា ចុងចោទមានចេតនារត់គេចខ្លួន ទើបចេញដីកាចាប់ខ្លួនអ្នកស្រី Jakkaphong និងបង្គាប់ឱ្យផាកពិន័យអ្នកធានា ដោយសារមិនអាចនាំខ្លួនចុងចោទមកតុលាការតាមពេលកំណត់ ដែលចាត់ទុកថា បំពានការសន្យាធានាចុងចោទ ។ តុលាការកំណត់ពេលបើកសវនាការជាថ្មី នាវេលាម៉ោង៩និង៣០ព្រឹក ថ្ងៃទី២៦ ខែធ្នូ ឆ្នាំ២០២៥ ។

បើតាមពាក្យចចាមអារ៉ាម អ្នកស្រី Jakkaphong បានគេចខ្លួនទៅក្រៅប្រទេសជាមួយប្រាក់រាប់លានដុល្លារ ហើយអ្នកស្រីអាចនឹងមិនវិលត្រឡប់មកប្រទេសថៃវិញដើម្បីចូលសវនាការតាមការកំណត់របស់តុលាការទេ ដោយសារមិនខ្លាចច្បាប់ថៃ ។

គួរបញ្ជាក់ថា អ្នកស្រី Jakkaphong Jakrajutatip មានឈ្មោះហៅក្រៅថា «Ann» អាយុ៤៦ឆ្នាំ គឺជាជំនួញស្ត្រីកែភេ.ទ ជ.នជាតិថៃកាត់ចិន ។ បច្ចុប្បន្ន អ្នកស្រីមានតួនាទីជាប្រធានអង្គការ Miss Universe និងជាអតីតនាយិកាក្រុមហ៊ុន JKN Global Group ៕