ទឹកចិត្តខ្មែរជួយខ្មែរ! ក្រុមហ៊ុនមួយនេះ ចុះទិញស្រូវដោយផ្ទាល់ពីកសិករ ៥០០០តោន ជារៀងរាល់ឆ្នាំ

ពលរដ្ឋនៅស្រុកជាំក្សាន្ត ខេត្តព្រះវិហារ រំភើបរកអ្វីប្រៀបផ្ទឹមពុំបាន ក្រោយមានក្រុមហ៊ុនដ៏ធំមួយក្នុងព្រះរាជាណាចក្រកម្ពុជាបានចុះប្រមូលទិញស្រូវពីប្រជាកសិករផ្ទាល់ចំនួន ៥០០០ តោន ហើយមិនមែនតែ ១ឆ្នាំ គឺជារៀងរាល់ឆ្នាំតែម្ដង។ ក្នុងការចុះទិញនេះ គឺចាប់ផ្ដើមធ្វើឡើងដំបូងនៅក្នុងខេត្តព្រះវិហារ ដោយប្រមូលទិញពីបងប្អូនកសិករគ្រួសារកងទ័ព ដោយក្នុង ១ គីឡូ តម្លៃ ១ពាន់រៀល។

គោលបំណងសំខាន់ នៅក្នុងបេសកម្មនេះ គឺដើម្បីជួយដល់តំបន់ដែលមានគ្រួសារកងទ័ពជួរមុខការពារព្រំដែនរស់នៅ ដែលពួកគាត់មានផលវិបាកខ្លាំងលើចំណូល និងការចំណាយចំពេលមានបញ្ហាតានតឹងនេះ។ ជាមួយគ្នានេះ ក៏ដូចជាជួយលើកទឹកចិត្ត និងផ្ដល់ទំនុកចិត្តដល់ប្រជាពលរដ្ឋស្របពេលដែលតម្លៃស្រូវកំពុងធ្លាក់ចុះផងដែរ។

ពលរដ្ឋខេត្តព្រះវិហារបានបង្ហាញអារម្មណ៍ត្រេកអរក្រៃលែង ព្រោះការចុះទិញស្រូវពីពួកគាត់ មិនត្រឹមតែជួយដល់ជីវភាពរបស់ពួកគាត់ប៉ុណ្ណោះទេ ថែមទាំងជាកម្លាំងចិត្តឲ្យពួកគាត់ក្នុងប្រកបរបរស្រែចម្ការ ដែលជាកេរ្តិ៍ពីដូនតាមកបន្តទៀត។

នេះគឺជាគម្រូល្អមួយ និងបានធ្វើឲ្យមានមតិសរសើរជាច្រើនពីប្រជាពលរដ្ឋ ដែលរំពឹង និងស្នើសុំឲ្យមានទង្វើបែបនេះជារៀងរាល់ឆ្នាំ មិនត្រឹមតែតាមតំបន់នោះទេ ពោលគឺស្នើរសុំឲ្យមានការជួយទិញស្រូវពីកសិករគ្រប់ខេត្តដែលពួកគាត់រស់នៅដោយពឹងផ្អែកលើការងារធ្វើស្រែចម្ការ៕