ករណីទាហានថៃរំលោ.ភបូកលើស្រ្តីជាពលករខ្មែរ១នាក់បានធ្វើឱ្យសាធារណជនខឹងសម្បារជាសាធារណៈខណៈដែលកម្ពុជានឹងប្ដឹងតវ៉ាទៅអង្គការអន្តរជាតិ។ ការឈឺចាប់នេះក្នុងនាមជាស្រ្តីដូចគ្នា មាន សូនីតា និង កុយ អេនណា ចេញសារថ្កោលទោសចំពោះទង្វើព្រៃផ្សៃរបស់ទាហានថៃ។
នៅថ្ងៃទី១៨ ខែវិច្ឆិកា តារាសម្តែង មាន សូនីតា បានបង្ហោះថា «នាងខ្ញុំ មាន សូនីតា និងកូនខ្មែរគ្រប់រូបសុំប្ដឹង និងស្នើទៅដល់អន្តរជាតិ មេត្តាជួយស្វែងរកយុត្តិធម៌ជូនចំពោះស្រ្តីរងគ្រោះ ដែលនាងទទួលរងការឈឺចាប់យ៉ាងខ្លាំង ដោយមិនត្រឹមតែប៉ះពាល់សុខភាពរាងកាយនោះទេ តែបានប៉ះពាល់សុខភាពផ្លូវចិត្តយ៉ាងធ្ងន់ធ្ងរ។ តើនាងនឹងត្រូវរស់ជាមួយនឹងស្លាកស្នាមនៃការឈឺចាប់នេះដល់ពេលណា? ទង្វើដ៏សាហាវយង់ឃ្នងពីសំណាក់ក្រុមទាហានថៃ ដែលបានប្រព្រឹត្តអំពីហិង្សាធ្វើទារុណកម្មផ្លូវភេទចំពោះបងប្អូនស្ត្រីជនជាតិខ្មែរ នៅពេលពួកនាងធ្វើដំណើរវិលត្រឡប់ចូលមកមាតុប្រទេសវិញ ជាអំពើដ៏ព្រៃផ្សៃដែលយើងជាប្រជាជនកម្ពុជា ពិតជាមិនអាចទទួលយកបានជាដាច់ខាត»។
«ក្នុងនាមជាមនុស្សស្រីដូចគ្នា នាងខ្ញុំ រួមទាំងបងប្អូនខ្មែរទាំងអស់ពិតជាមានការឈឺចាប់ខ្លាំងណាស់ និងសូមថ្កោលទោសចំពោះទង្វើដ៏ព្រៃផ្សៃរបស់ទាហានថៃបានធ្វើមកលើស្ត្រីជនជាតិកម្ពុជារបស់យើង។ នេះជាការប្រមាថដែលមិនចំពោះតែចំពោះស្ត្រីកម្ពុជាប៉ុណ្ណោះទេ ប៉ុន្តែវា ស បញ្ជាក់យ៉ាងច្បាស់ថា ក្រុមទាហានថៃ បានធ្វើការប្រមាថយ៉ាងធ្ងន់ធ្ងរចំពោះសិទ្ធិរបស់ស្រ្តីទូទាំងពិភពលោក»។
បវរកញ្ញា កុយ អេនណា បានបង្ហាញការសោកស្តាយយ៉ាងខ្លាំងបំផុត និងប្រកាសថ្កោលទោសដាច់អហង្ការ ចំពោះទង្វើដ៏សាហាវព្រៃផ្សៃ ឃោរឃៅ អមនុស្សធម៌របស់ក្រុមទាហានឈុតខ្មៅថៃ ដែលបានប្រើប្រាស់អំពើហិង្សាយ៉ាងសាហាវយង់ឃ្នង និងវាយដំ ទាត់ធាក់ ជំរិតទារប្រាក់ គំរាមកំហែងយកទ្រព្យសម្បត្តិ មកលើក្រុមពលករទេសន្តរប្រវេសន៍ខ្មែរចំនួន១៣នាក់។ ក្នុងនោះទាហានឈុតខ្មៅថៃ ៧នាក់ បានប្រព្រឹត្តអំពើថោកទាប ស្មោកគ្រោក (រំលោភបូក)ទៅលើពលករខ្មែរជាស្រ្តី១នាក់ ខណៈដែលពលករខ្មែរទាំង១៣នាក់ ធ្វើដំណើរចេញពីប្រទេសថៃត្រឡប់មកប្រទេសកម្ពុជា កាលពីថ្ងៃទី១៥ ខែវិច្ឆិកា ឆ្នាំ២០២៥ កន្លងទៅ។
តាមរយៈសាររបស់ទូតសុឆន្ទៈនៃក្រសួងកិច្ចការនារី បានឱ្យដឹងទៀតថា គណៈកម្មការសិទ្ធមនុស្សកម្ពុជា បានចាត់ទុកទង្វើយោធាថៃមកលើប្រជាពលរដ្ឋកម្ពុជា មានលក្ខណៈព្រៃផ្សៃ ឃោរឃៅ និងអមនុស្សធម៌ ព្រមទាំងផ្ទុយទាំងស្រុងនឹងច្បាប់សិទ្ធិមនុស្ស និងច្បាប់មនុស្សធម៌អន្តរជាតិ ហើយបានចាត់ទុក « ការរំលោភផ្លូវភេទ គឺជាបទឧក្រិដ្ឋ និងជាការរំលោភសិទ្ធិមនុស្សយ៉ាងធ្ងន់ធ្ងរ ដែលត្រូវផ្តន្ទាទោស ដោយគ្មានការលើកលែង»៕
