Sports Chosun បានរាយការណ៍ថាតារាចម្រៀង Annie សមាជិកក្រុមចម្រៀងថ្មី Allday Project ត្រូវបានបញ្ជាក់ថានឹងធ្វើជាពិធីការិនីសម្រាប់កម្មវិធីមហោស្រពតន្ត្រីចុងឆ្នាំរបស់ MBC មានឈ្មោះថា «MBC Gayo Daejejeon 2025» ដែលនឹងចាក់ផ្សាយនៅថ្ងៃទី៣១ ខែធ្នូ។ ឆ្នាំនេះ Annie អមដំណើរជាមួយនឹងពិធីករប្រុសពីររូបគឺ Minho សមាជិកSHINee និង Hwang Minhyun ។
នេះជាសកម្មភាពទោលលើកដំបូងរបស់ Annie ចាប់តាំងពីការបង្ហាញខ្លួនដំបូងរបស់នាង។ ប៉ុន្តែអ្វីដែលសាធារណជនចាប់អារម្មណ៍បំផុតនោះគឺ Annie ជំនួស YoonA ដែលនាងបំពេញតួនាទីជាពិធីការិនីក្នុងកម្មវិធីនេះអស់រយៈពេល ១០ ឆ្នាំមកហើយ។ ការចាកចេញរបស់ YoonA ពីមហោស្រពតន្ត្រីចុងឆ្នាំរបស់ MBC ត្រូវបានប្រកាសជាមុន។ ទោះជាយ៉ាងណាក៏ដោយ Annie មិនស្ថិតក្នុងចំណោមឈ្មោះដែលត្រូវបានព្យាករណ៍ថានឹងជំនួសតំណែងជាន់ខ្ពស់របស់នាងទេ។ បើនិយាយពីកេរ្តិ៍ឈ្មោះ YoonA មានបទពិសោធន៍ជាច្រើនឆ្នាំក្នុងការធ្វើជាម្ចាស់ផ្ទះកម្មវិធី ហើយក៏ជាតារាដ៏ល្បីនៅក្នុងឧស្សាហកម្មកម្សាន្តកូរ៉េផងដែរ។ ដូច្នេះហើយ អ្នកគាំទ្ររំពឹងថានឹងមានមុខមាត់ស័ក្តិសមដើម្បីបំពេញតួនាទីពិធីការិនី។
ជាមួយគ្នានេះ Annie ទើបតែបង្ហាញខ្លួនបានតិចជាងកន្លះឆ្នាំប៉ុណ្ណោះ ហើយមិនមានបទពិសោធន៍ជា MC នៃកម្មវិធីណាមួយឡើយ សូម្បីតែនៅលើឆាកតូចក៏ដោយ។
ដូច្នេះហើយ ការត្រូវបានជ្រើសរើសជាពិធីការិនីក្នុងកម្មវិធីមហោស្រពតន្ត្រីដ៏ធំមួយ បានធ្វើឱ្យ Annie ត្រូវគេចំអកនៅលើបណ្ដាញសង្គមជាមួយនឹងឃ្លាថា កូនសំណព្វ ដែលសំដៅលើមនុស្សកើតក្នុងគ្រួសារល្បីល្បាញ និងមានទ្រព្យសម្បត្តិច្រើន តែងតែទទួលបានភាពជោគជ័យក្នុងការងារយ៉ាងឆាប់រហ័ស ដោយសារទំនាក់ទំនង និងបុព្វសិទ្ធិរបស់ឪពុកម្តាយ។
តាមពិតទៅប្រវត្តិ Annie គឺជាប្រធានបទដ៏ក្តៅគគុក ចាប់តាំងពីក្រុម Allday Project ចាប់ផ្តើមដំបូង។ តារាស្រីដែលកើតក្នុងឆ្នាំ ២០០២ គឺជាកូនស្រីរបស់ Chung Yoo Kyung ដែលជាប្រធានអាជីវកម្មហាងទំនិញរបស់ក្រុមហ៊ុន Shinsegae Group ដែលជាចក្រភពចែកចាយទំនិញប្រណីត និងលក់រាយដ៏ធំបំផុតនៅក្នុងប្រទេសកូរ៉េ។ នាងបានគេចាត់ទុកថាជាកូនស្រី Chaebol ជំនាន់ទី ៤ នៃគ្រួសារ Samsung។
ថ្មីៗនេះ ពានរង្វាន់តន្ត្រី MAMA ឆ្នាំ ២០២៥ បានផ្លាស់ប្តូរលក្ខណៈវិនិច្ឆ័យរបស់ខ្លួនដែលបង្កឱ្យមានភាពចម្រូងចម្រាស។ ដោយសារតែយោងទៅតាមចំណាត់ថ្នាក់ចាស់ Allday Project ដែលជាក្រុមចម្រុះនៃបុរស និងស្ត្រី នឹងមិនត្រូវបានគេតែងតាំងនោះទេ។ ប៉ុន្តែយោងទៅតាមលក្ខណៈវិនិច្ឆ័យថ្មី Allday Project ត្រូវបានតែងតាំងរួមជាមួយក្រុមផ្សេងទៀត។ ទស្សនិកជនជឿថាអ្នករៀបចំ MAMA មានភាពលំអៀងចំពោះ Allday Project ដែលផ្តល់ឱកាសឱ្យក្រុមទទួលបានពានរង្វាន់ ព្រោះសមាជិកគឺជាកូនស្រីរបស់ Shinsegae Group ៕
