ឈ្លោះគ្នាតែបងប្អូន អាជី និង ប្អូនស្រីនាំគ្នាមកស្បថនៅព្រះអង្គដងកើបង្កអសន្តិសុខត្រូវសមត្ថ.កិច្ចនាំទៅប៉ុស្តិ៍

ជម្លោះបងប្អូនស្រីបង្កើតមានឪពុកខុសគ្នារវាងអ្នកលក់អនឡាញ តេង ស៊ីណាត ហៅ អាជី និង ប្អូនស្រី តេង ដាណា បានឈានដល់ដំណាល់កាលបបួលគ្នាមកស្បថរកភាពស្អាតស្អំរៀងៗខ្លួន។ ទង្វើនេះបានធ្វើឱ្យអ្នកគាំទ្រអ្នកទាំងពីរមកចោមរោមជុំជិតនៅបរិវេណព្រះអង្គដងកើទាំងយប់ដែលបង្កអសន្តិសុខយ៉ាងខ្លាំងរហូតសមត្ថកិច្ចនាំយកអ្នកទាំងពីរនៅប៉ុស្តិ៍។ ឃើញមានមនុស្សជាច្រើនប្រមូលផ្តុំគ្នាចង់ដឹងពីរឿងក្រុមគ្រួសារគេយ៉ាងច្រើនដូចនេះអ្នកមានឥទ្ធិពលមួយចំនួនបានបង្ហាញការហួសចិត្តយ៉ាងខ្លាំង។

ប្រិយមិត្តមួយចំនួនអាចនឹងដឹងខ្លះៗមកហើយថា អាជី បាននិយាយដោយប្រយោលចោទប្រកាន់ទៅកាន់ប្អូនស្រីរបស់ខ្លួនដែលជាម្ចាស់ប្រេនមួយរូបទុកបំណុលឱ្យនាងដោះស្រាយ នូវទឹកប្រាក់ចំនួន៣០ម៉ឺនដុល្លារ រួមទាំងមានការចោទប្រកាន់ទៅលើរឿងឡេលាយទឹកថែមទៀត។ កាលពីពេលថ្មីៗនេះ ស្រាប់តែជម្លោះបងប្អូនអ្នកទាំងពីររីករាលដានបន្ទាប់ពីចែតាបារាំង និង អាជី មានជម្លោះពាក្យសម្តីហើយ Live នៅលើបណ្តាញសង្គម។

កាលពីយប់ថ្ងៃទី២១ ខែតុលា តេង ដាណា និងស្វាមីដែលមានងារជាឧកញ៉ា បានចេញមកបកស្រាយទាក់ទងនឹងការចោទប្រកាន់រឿងបំណុល៣០ម៉ឺនដុល្លារ ឡេលាយទឹក និងជម្លោះនៅក្នុងគ្រួសាររវាងអ្នកទាំងពីរជាបងប្អូនបង្កើតនឹងគ្នាប៉ុន្តែមានឪពុកខុសគ្នា។ ទន្ទឹមនឹងការ Live របស់ តេង ដាណា និងស្វាមី ភាគី អាជី ក៏បាន live ដូចគ្នា។ និយាយដោយទឹកភ្នែក អាជី ថានាងគ្មានសមត្ថភាពឡើងតុលាការយកឈ្នះខាងឧកញ៉ានោះទេ ប៉ុន្តែបានបបួល ប្អូនស្រី មកស្បថនៅមុខព្រះអង្គដងកើដើម្បីបញ្ជាក់ភាពស្អាតស្អំ។

អាជី បានទៅដល់ទីតាំងមុន ដោយបានទុកពេលរង់ចាំ តេង ដាណា មកស្បថស្បែជាមួយគ្នាហើយនៅទីបំផុត តេង ដាណា និងស្វាមី មិនខ្លាចនឹងការស្បថនេះបានមកដល់ទីតាំងនិងបានស្បថផងដែរ។ រឿងរ៉ាវជម្លោះបងប្អូនក្នុងវិស័យអនឡាញបានបង្កឱ្យអ្នកគាំទ្ររបស់ពួកគេមកចោមរោមជុំជិតមានមនុស្សម្នាកុះករមកមើលការស្បថរបស់ពួកគេដែលធ្វើឱ្យប៉ះពាល់ដល់សណ្ដាប់ធ្នាប់សាធារណៈសង្គម។

ភ្លាមៗនោះកម្លាំងអធិការដ្ឋាននគរបាលខណ្ឌដូនពេញ រួមទាំងកម្លាំងសណ្ដាប់ធ្នាប់ខណ្ឌ បានអញ្ជើញសាម៉ីខ្លួនមកស្នាក់ការប៉ុស្តិ៍នគរបាលជ័យជំនះ មុនក្រោយគ្នាកន្លះម៉ោង ដើម្បីធ្វើការអប់រំណែនាំឱ្យបញ្ឈប់សកម្មភាពនេះ កុំឱ្យបាត់បង់សណ្ដាប់ធ្នាប់នៅម៉ោងជាង១០យប់ថ្ងៃទី២១ ខែតុលា ឆ្នាំ២០២៥នេះ ។

គួរបញ្ជាក់ផងដែរថា ហេតុការណ៍ស្បថនៅមុខព្រះអង្គដងកើនេះគេបាននឹកដល់កាលពី ខែធ្នូ ឆ្នាំ២០២៣ ក៏មានរឿងផ្ទុះកក្រើកយ៉ាងខ្លាំងដូចនេះបន្ទាប់ពីមានអ្នកលក់អនឡាញប៉ុន្មានរូបបបួលគ្នាមកស្បថដើម្បីបញ្ជាក់ពីភាពស្អាតស្អំដូចគ្នា។ អ្វីដែលអ្នកគាំទ្របានឃើញនាពេលបច្ចុប្បន្ននេះមិត្តភាពរបស់អ្នកលក់ឡាញប៉ុន្មានរូបនោះបែកបាក់គ្នាជាច្រើនផ្នែកផងដែរ៕