ថ្មីៗនេះអ្នកលេងបណ្តាញសង្គមបានជជែកវែកញែកយ៉ាងច្រើនទាក់ទងនឹងការចែករំលែកបទពិសោធន៍ស្នេហាជាពិសេសទៅលើប្រធានបទអំពីសង្សារចាស់។ ស្របពេលរឿងនេះរីកសាយភាពនិងពោរពេញដោយមតិប្រតិកម្ម ទីនីន ស្រាប់តែលើកនូវប្រយោគចាក់ដោតទៅកាន់មិត្តនារី។
ទីនីន បានសរសេរប្រយោលដោយខ្លីប៉ុន្តែមានអត្ថន័យជ្រាលជ្រៅថា «ធ្វើជាមនុស្សស្រី ដែល ប្រុសណាក៏ចង់បាន មិនមែនមនុស្សស្រីដែលប្រុសណាក៏ធ្លាប់បាន»។ នេះជាសារដាស់តឿនដ៏ល្អមួយសម្រាប់យុវវ័យដែលប្រឡូកនូវរឿងស្នេហាវ័យក្មេងពេកមិនទាន់មានការគិតគូរវែងឆ្ងាយបើទោះបីជាសេរីភាពបច្ចុប្បន្នទូលំទូលាយច្រើនក៏ដោយ។
អ្នកជំនួញអនឡាញដ៏មានប្រជាប្រិយភាពរូបនេះក៏បានចែករំលែកជាបន្តទៀតក្នុងអត្ថន័យថា «បុរសអាចរត់គេចពីការមានផ្ទៃពោះ ប៉ុន្តែស្ត្រីមិនអាចធ្វើបានទេ។ ប្រហែលជាអ្នកអាចរំលូតកូនបាន ប៉ុន្តែវានឹងប៉ះពាល់ដល់សុខភាពរបស់អ្នក ប្រសិនបើអ្នកធ្វើវាច្រើនដងពេក ដូច្នេះភ្លក្សដោយប្រាជ្ញា»។
ការលើកឡើងរបស់ ទីនីន មនុស្សភាគច្រើនបានយល់ស្របដោយមានអ្នកមួយចំនួនថែមទាំងរម្លឹកពីកម្មវិធីដែល ទីនីន ធ្លាប់ចូលរួមកម្មវិធីផតខាស់កន្លងមក។ ធ្លាប់ឆ្លងកាត់ការបរាជ័យលើជីវិតគូរហូតអាចមកដល់ចំណុចថ្មីមួយដូចពេលនេះទើប ទីនីន បានរួមចំណែកលើកទឹកចិត្តទៅកាន់ស្ត្រីដទៃទៀតឱ្យរឹងមាំ៕
