ស៊ុយអែតទទួលយកញ្ញត្តិរបស់កម្ពុជា ក្នុងការស្នើសុំផ្អាកការលក់យន្តហោះ Gripen ទៅឲ្យប្រទេសថៃ

ភ្នំពេញ៖ ញត្តិរបស់កម្ពុជាដែលបានផ្ញើទៅកាន់ស៊ុយអែតក្នុងការស្នើសុំឲ្យផ្អាកការលក់អាវុ.ធ ជាពិសេសយន្តហោះចម្បាំង Gripen ឲ្យប្រទេសថៃ ពេលនេះត្រូវបានទទួលយកជាផ្លូវដោយសភាជាតិស៊ុយអែត និងបានបញ្ជូនទៅកាន់សមាជិកនីមួយៗរបស់គណៈកម្មាធិការទទួលបន្ទុកកិច្ចការការពារជាតិ។ នេះបើតាមលោក មូន ពេជ្យ ជាអ្នកផ្ដួចផ្ដើមញ្ញត្តិនេះដោយផ្ទាល់ បានបញ្ជាក់នាព្រឹកថ្ងៃសុក្រ ទី១៨ ខែកញ្ញា។

កាលពីថ្ងៃទី៤ ខែកញ្ញា ឆ្នាំ២០២៥ កន្លងទៅ លោក Moon Pich ឬ ពេជ្យ ចន្រ្ទា ដែលជាកូនខ្មែរបច្ចុប្បន្នរស់នៅ និងបម្រើជាទាហានកងទ័ពជេីងទឹកអាមេរិក ហាត់នៅបណ្ឌិតសភាយោធាកងទ័ពអាមេរិក បានដាក់ញ្ញត្តិមួយច្បាប់ទៅកាន់រដ្ឋាភិបាលស៊ុយអែត បន្ទាប់ពីប្រមូលសម្លេងគាំទ្រសម្រាប់ញ្ញត្តិនេះបានពីមនុស្សចំនួន 26,456 នាក់ ក្នុងការស្នើសុំឲ្យរដ្ឋាភិបាលស៊ុយអែតធ្វើការផ្អាកលក់សព្វាវុ.ធទំនើបៗ និងធនធ្ងន់ដូចជាយន្តហោះចម្បាំង Gripen ទៅឲ្យថៃ ដើម្បីលើកកម្ពស់សន្តិភាព និងសិទ្ធិមនុស្ស ដែលជាគោលការណ៍ចម្បងរបស់ស៊ុយអែតអស់រយៈពេលជាយូរមកហើយ។

លុះមកដល់ថ្ងៃទី១៩ ខែកញ្ញា លោក មូន ពេជ្យ បានបង្ហោះសំណេរមួយនៅលើទំព័រហ្វេសប៊ុក ក្នុងន័យបញ្ជាក់ថា ពេលនេះសភាស៊ុយអែតបានឆ្លើយតបនឹងការដាក់ញ្ញត្តិរបស់កម្ពុជាហើយ ដោយបានទទួលយកញ្ញត្តិនេះយកទៅពិចារណាតាមរយៈសមាជិកនីមួយៗរបស់គណៈកម្មាធិការទទួលបន្ទុកកិច្ចការការពារជាតិស៊ុយអែត។

ទន្ទឹមនឹងនេះ លោកមូន ពេជ្យ បានគូសបញ្ជាក់ថា៖ នេះមិនមែនជាទីបញ្ចប់ឡើយ វាជាការបើកផ្លូវឲ្យយើងបន្តបញ្ចុះបញ្ចូលសមាជិកសភានីមួយៗដែលជាសមាជិកនៃគណៈកម្មាធិការទទួលបន្ទុកកិច្ចការការពារជាតិ។ ប្រសិនបើសមាជិកសភាណាម្នាក់ នៅក្នុងគណៈកម្មាធិការ គាំទ្រញត្តិរបស់ពួកយើង នោះបញ្ហារបស់ពួកយើងនឹងត្រូវលើកយកទៅពិភាក្សានៅឯកិច្ចប្រជុំរបស់សភាជាតិស៊ុយអែត។

នៅក្នុងទំនាក់ទំនងអន្តរជាតិ គេតែងឲ្យតម្លៃដល់ផលប្រយោជន៍របស់ជាតិគេ ជាជាងបញ្ហារបស់ពួកយើង។ ទោះជាយ៉ាងណា ពួកយើងមិនអាចបោះបង់ឡើយ ព្រោះវាទាក់ទងដល់សន្តិសុខជាតិ សេចក្ដីសុខរបស់ប្រជាជន និងអនាគតរបស់ជាតិយើង។ ពេលនេះ ដោយកម្លាំងនៃសាមគ្គីភាព សំឡេងរបស់ពួកយើងបានឮទៅដល់សភាជាតិស៊ុយអែត ហើយកង្វល់របស់ពួកយើងអាចនឹងត្រូវយកទៅពិភាក្សា និងដោះស្រាយ។

ម្យ៉ាងវិញទៀត នៅចុងបញ្ចប់នៃការឆ្លើយតប បានបញ្ជាក់ថា រដ្ឋាភិបាលស៊ុយអែតបានរៀបចំឲ្យមានអធិការកិច្ចទទួលខុសត្រូវ ក្នុងការត្រួតពិនិត្យការប្រើប្រាស់សព្វាវុធរបស់ស៊ុយអែតដែលត្រូវបាននាំចេញ ឲ្យស្របទៅតាមច្បាប់ និងបទប្បញ្ញត្តិ។ នេះមានន័យថា សព្វាវុធរបស់ស៊ុយអែតដែលលក់ទៅឲ្យប្រទេសថៃ នឹងត្រូវស្ថិតក្រោមការត្រួតពិនិត្យក្នុងការប្រើប្រាស់តឹងរ៉ឹងជាមុន។

គួររម្លឹកថា ការដាក់ញ្ញត្តិខាងលើរបស់លោកមូន ពេជ្យ គឺជាសារលិខិតតំណាងប្រជាជន និងប្រទេសកម្ពុជា ក្នុងការអំពាវនាវឲ្យស៊ុយអែតផ្អាកការទិញ-លក់សព្វាវុ.ធទៅឲ្យប្រទេសថៃ ជាពិសេសពាក់ព័ន្ធនឹងប្រភេទយន្តហោះចម្បាំង Gripen ខណៈដែលជម្លោះព្រំដែនរវាងកម្ពុជា-ថៃនៅមិនទាន់ដោះស្រាយបាននៅឡើយ។

ជាងនេះទៅទៀត វាបានបង្ហាញពីមហិច្ចតាចង់ពង្រីកអំណាចកងទ័ពរបស់ថៃ ដើម្បីជាការគំរា.មកំហែ.ងដល់កម្ពុជា ដែលកត្តានេះបានជំរុញឲ្យមានការធ្លាក់ចុះនូវសីលធម៌ សន្តិភាព និងសិទ្ធិមនុស្ស ផ្ទុយពីគោលការណ៍មនុស្សធម៌ដែលប្រទេសស៊ុយអែតតែងវប្រកាន់ខ្ជាប់៕

---