បន្ទាប់ពីបញ្ចប់ការប្រកួតបវរកញ្ញាចក្រវាលកម្ពុជាឆ្នាំ២០២៥ ពេជ្រ វត្តីសារ៉ាវឌ្ឍី បានបង្ហោះពីភាពរីករាយនៅស្រុកកំណើតរបស់នាងដោយមិនបាន TOXIC ឡាំប៉ា នឹងលទ្ធផលក្នុងការប្រកួតឡើយ។ កាលពីកន្លងមកនេះ ពេជ្រ វត្តីសារ៉ាវឌ្ឍី បានអះអាងថានាងពេញចិត្តនឹងលទ្ធផលលំដាប់រងទី២របស់ខ្លួននៅក្នុងការប្រកួត Miss Universe Cambodia 2025។
វាមានរយៈពេលជិត១សប្តាហ៍ហើយចាប់តាំងពីរាត្រីថ្ងៃទី ១២ កញ្ញា មកទល់នឹងថ្ងៃទី១៧ ខែកញ្ញា ដែលកម្មវិធីប្រកួតបវរកញ្ញាចក្រវាលកម្ពុជាឆ្នាំ២០២៥ ក្រោមការដឹកនាំរបស់លោក ឆយ ក្នុងឆ្នាំទី២ និងរៀបចំការប្រកួតឆ្នាំទី១ បានរកឃើញម្ចាស់ជ័យលាភីជាបេក្ខនារី ថៃ នារីសុជាតា ហៅ ហ្វីយ៉ាតា។ ទោះយ៉ាងណា លទ្ធផលនេះហាក់នៅតែបង្កឱ្យមានការដ្រាម៉ានៅលើបណ្តាញសង្គមមិនទាន់បញ្ចប់នោះទេ។
យ៉ាងណាមិញ ក្រឡេកមកកាន់ ពេជ្រ វត្តីសារ៉ាវឌ្ឍី វិញគឺបានបង្ហាញភាពសប្បាយចិត្ត រីករាយទោះបីជាមិនមែនជាម្ចាស់មកុដ ហើយជាប់លំដាប់រងទី២ក្នុងការប្រកួត ប៉ុន្តែរូបនាងគឺព្រមទទួលយកការពិតដោយមិន TOXIC ឡាំប៉ា នឹងលទ្ធផលឡើយ។ នៅថ្ងៃទី១៦ ខែកញ្ញា ពេជ្រ វត្តីសារ៉ាវឌ្ឍី បានបង្ហោះវីដេអូពីដំណើរកម្សាន្តនៅខេត្តព្រះសីហនុ ជាស្រុកកំណើតរបស់នាង។ តាមរយៈវីដេអូនោះ លំដាប់រងទី២ បវរកញ្ញាចក្រវាលកម្ពុជាឆ្នាំ២០២៥ បានរាំរែកកម្សាន្តនៅលើទូកដោយគ្មានទុក្ខកង្វល់។
នេះបញ្ជាក់ថា ពេជ្រ វត្តីសារ៉ាវឌ្ឍី ហ៊ានប្រឈមមុខនឹងការពិត មិនថាប្រកួតចាញ់ឬឈ្នះ នាងទទួលយកមិនខុសពីអ្វីដែលនាងបានចេញមកអះអាងនោះទេ។
គូសរម្លឹកផងដែរថា នៅយប់ថ្ងៃទី១៤ ខែកញ្ញា ពេជ្រ វត្តីសារ៉ាវឌ្ឍី បានអះអាងថាការទទួលស្គាល់ការពិត ជារឿងមួយដែលនាងតែងតែប្រកាន់ខ្ជាប់ ហើយយកមកអភិវឌ្ឍខ្លួនបន្ថែមជានិច្ច។ មិនត្រឹមតែប៉ុណ្ណោះ ពេជ្រ វត្តីសារ៉ាវឌ្ឍី ថានេះគ្រាន់តែជាការចាប់ផ្តើមនៃចក្រវាល ហើយនាងរីករាយនឹងការចាប់ផ្តើមមួយនេះ ព្រមទាំងមានមោទនភាព និងរីករាយបំផុតចំពោះតំណែងមួយនេះ៕
