បង្ហាញស្នេហាជាសាធារណៈជិត២ឆ្នាំ Taylor Swift និង Travis Kelce មានដំណឹងល្អហើយ

នៅលើ Instagram កាលពីថ្ងៃទី ២៦ ខែសីហា Taylor Swift និង Travis Kelce បានធ្វើឱ្យមានការរំជើបរំជួលពេញបណ្តាញសង្គមទូទាំងពិភពលោកនៅពេលដែលពួកគេបានប្រកាសដំណឹងល្អថា «គ្រូភាសាអង់គ្លេសរបស់អ្នក និងគ្រូហាត់ប្រាណរបស់អ្នកបានរៀបការហើយ»។

ការបង្ហោះនេះត្រូវបានអមដោយរូបថតជាច្រើនសន្លឹករបស់ Travis Kelce ស្នើសុំទៅ Taylor Swift នៅក្នុងសួនផ្កា ជាមួយនឹងការពាក់ចិញ្ចៀនពេជ្រនៅលើម្រាមដៃខាងឆ្វេង ។ យោងតាមទស្សនាវដ្តី People បានឱ្យដឹងថា Kelce បានរចនាគ្រឿងអលង្ការជាមួយអ្នករចនា Kindred Lubeck នៃម៉ាកគ្រឿងអលង្ការ Artifex Fine Jewelry ។

មកដល់ពេលនេះការបង្ហោះរបស់ Taylor Swift ទទួលបានការចុច Like ជាង ២០ លាននាក់ ។ ដំណឹងនៃគូស្នេហ៍នេះភ្ជាប់ពាក្យជាគ្នាបានលេចចេញតាមសារព័ត៌មានអន្តរជាតិ និងបណ្តាញសង្គម ។ Caption របស់ពួកគេក៏បានធ្វើឱ្យអ្នកគាំទ្រជាច្រើនសប្បាយចិត្តផងដែរ។

កាលពីពីរសប្តាហ៍មុន Taylor Swift និងមិត្តប្រុសរបស់នាងបានធ្វើចំណងជើងសម្រាប់ការសន្ទនាដ៏ផ្អែមល្ហែមរបស់ពួកគេ ដោយបង្ហាញពីទស្សនៈរបស់ពួកគេលើស្នេហា និងអាជីពនៅលើផតឃែស្ថរបស់ Travis Kelce និងបងប្រុសរបស់ខ្លួន Jason Kelce ក្នុងកម្មវិធី New Heights ។

អ្នកគាំទ្រជាច្រើនបានចែករំលែកឃ្លីបពីបទសម្ភាសន៍ម្ដងទៀត ដោយសរសើររឿងស្នេហារបស់ពួកគេ។ នេះក៏ជាកម្មវិធីសម្រាប់ Taylor Swift ដើម្បីផ្សព្វផ្សាយអាល់ប៊ុមរបស់នាង «The Life of a Showgirl» ដែលគ្រោងនឹងចេញនៅថ្ងៃទី ៣ ខែតុលា។

Taylor Swift និង Travis Kelce បច្ចុប្បន្នជាគូស្នេហ៍ដ៏ល្បីបំផុតមួយនៅក្នុងហូលីវូដ។ រឿងស្នេហារបស់ពួកគេបានចាប់ផ្តើមនៅពេលដែល Travis Kelce ទទួលបានការចាប់អារម្មណ៍ពីតារាចម្រៀង Taylor Swift នៅឯការប្រគំតន្ត្រី Eras Tour ក្នុងខែកក្កដា ឆ្នាំ២០២៣ នៅទីក្រុង Kansas សហរដ្ឋអាម៉េរិក។

ពួកគេបានស្គាល់គ្នាដោយសម្ងាត់ ហើយបានបង្ហាញទំនាក់ទំនងជាសាធារណៈក្នុងខែកញ្ញា ឆ្នាំ២០២៣។ តាំងពីពេលនោះមក អ្នកទាំងពីរតែងបង្ហាញភាព ស្និទ្ធស្នាលពេលចូលរួមកម្មវិធីរបស់គ្នាទៅវិញទៅមក៕