តម្លៃស្រូវធ្លាក់ចុះខ្លាំង ខណៈតម្លៃពោតធ្លាក់សល់៤០០រៀល ក៏គ្មានឈ្មួញមកទិញ

តម្លៃស្រូវ និងពោត អំឡុងខែសីហា ឆ្នាំ២០២៥នេះ មានការធ្លាក់ចុះជាខ្លាំង ដោយកសិករបានសម្តែងការអស់សង្ឃឹម ខណៈអ្នកខ្លះត្រូវបង្ខំចិត្តលក់ក្នុងតម្លៃទាប។
នៅតំបន់ខ្លះនៃស្រុកក្រូចឆ្មា ខេត្តត្បូងឃ្មំ តម្លៃពោត ធ្លាក់សល់ត្រឹម៤០០រៀលក្នុងមួយគីឡូ និងតំបន់មួយចំនួនទៀតនៅខេត្តបន្ទាយមានជ័យ ធ្លាក់សល់៣៣០រៀល។

ដោយឡែក ការប្រមូលស្រូវរបស់ប្រជាកសិករ ភូមិត្រមេង ឃុំខ្នាត ស្រុកពួក ខេត្តសៀមរាប ប្រភេទស្រូវអូអឹម បានតម្លៃចន្លោះ៦៨០រៀល ទៅ៧០០រៀល ក្នុងមួយគីឡូតែប៉ុណ្ណោះ។

ថ្វីបើតម្លៃចុះថោកខ្លាំង ក៏ប៉ុន្តែក៏មិនមានអ្នកមកទិញនោះដែរ។ ក្នុងករណីមានឈ្មួញមកទិញ ឈ្មួញបានទម្លាក់តម្លៃ ដែលសឹងតែមិនបានរួចដើមវិញផង តែកសិករគ្មានជម្រើសមានតែបង្ខំចិត្តលក់ ជៀសវាងការខាតបង់ថវិកាច្រើន។

ជុំវិញបញ្ហានេះ កសិករ បានអំពាវនាវឱ្យក្រសួង-ស្ថាប័ន ពាក់ព័ន្ធ មេត្តាជួយអន្តរាគមន៍ ព្រោះដំណាំមានច្រើន តែតម្លៃទាប គ្មានអ្នកទិញ អាចបង្កជាហានិភ័យខ្លាំងសម្រាប់ប្រជាកសិករ៕