មន្ទីរពេទ្យមួយនៅថៃ ត្រូវបានផាកពិន័យ ករណីយកក្រដាសព័ត៌អ្នកជំងឺទៅខ្ចប់អាហារតាមផ្លូវ

Ubon Ratchathani៖ មន្ទីរពេទ្យមួយនៅខេត្ត Ubon Ratchathani ប្រទេសថៃ ត្រូវបានផាកពិន័យចំនួន ១,២១ លានបាត ឬ(ប្រហែល ៣៨,៤៦៤ ដុល្លារ) បន្ទាប់ពីមានការលេចធ្លាយថាមន្ទីរពេទ្យនោះបានប្រើប្រាស់ក្រដាសព័ត៌មានអ្នកជំងឺ យកទៅធ្វើជាក្រដាសខ្ចប់អាហារតាមផ្លូវ។ ទោះជាយ៉ាងណា បច្ចុប្បន្នមន្ទីរពេទ្យនោះមិនទាន់ត្រូវបានបញ្ចេញឈ្មោះនៅឡើយនោះទេ។ នេះបើតាមប្រភព បាងកកប៉ុស្តិ៍។

នេះជាករណីមួយ មួយក្នុងចំណោមករណីផ្សេងទៀត ដែលបានរំលោភទិន្នន័យធំៗចំនួនប្រាំ ដែលគណៈកម្មការការពារទិន្នន័យផ្ទាល់ខ្លួន (PDPC) បានប្រកាសកាលពីសប្តាហ៍មុន ដោយក៏មានការផាកពិន័យចំពោះស្ថាប័នផ្សេងទៀតផងដែរ។

ទោះជាយ៉ាងណា បញ្ហានេះត្រូវបានបើកកកាយតាំងពីខែឧសភា ឆ្នាំមុនមកម្ល៉េះ ប៉ុន្តែ ទើបតែប្រកាសនៅឆ្នាំ ២០២៥ នេះ​ប៉ុណ្ណោះ ដោយអ្នកមានឥទ្ធិពលម្នាក់ក្នុងតំបន់ បានបង្ហោះរូបថតក្រដាសព័ត៌មានអ្នកជំងឺនៅក្នុងមន្ទីរពេទ្យមួយ ត្រូវបានគេប្រើសម្រាប់ខ្ចប់អាហារតាមផ្លូវដូចជា ដំឡូងផ្អែម និងចេកចៀន ជាដើម។ អ្វីដែលកាន់តែហួសចិត្តនោះ គឺនៅលើក្រដាស គេឃើញមានព័ត៌មានសរុបរបស់អ្នកជំងឺយ៉ាងច្បាស់លាស់ រួមទាំងឯកសារមួយបានបញ្ជាក់ពីអ្នកជំងឺប្រុសឆ្លងជំងឺរលាកថ្លើមប្រភេទ B ទៀតផង។

យ៉ាងណាមិញ ការស៊ើបអង្កេតរបស់ PDPC បានរកឃើញថា មានឯកសារពេទ្យសម្ងាត់ជាង ១,០០០ ច្បាប់ ត្រូវបានលេចធ្លាយក្នុងដំណើរការបំផ្លាញឯកសារ។ មន្ទីរពេទ្យបានជួលក្រុមហ៊ុនតូចមួយគ្រប់គ្រងដោយគ្រួសារ ដើម្បីធ្វើការបំផ្លាញ ប៉ុន្តែខ្វះការត្រួតពិនិត្យ។ ជំនួសឱ្យការបំផ្លាញ ក្រុមហ៊ុនបានយកឯកសារទៅរក្សាទុកនៅផ្ទះ ហើយមិនបានជូនដំណឹង បន្ទាប់ពីមានការលេចធ្លាយឡើយ។

បើតាម PDPC នេះជាការរំលោភច្បាប់ការពារទិន្នន័យផ្ទាល់ខ្លួន ឆ្នាំ ២០១៩ ដែលកំណត់ឱ្យស្ថាប័នសុខាភិបាលថែរក្សាព័ត៌សម្ងាត់របស់អ្នកជំងឺ។ ក្រុមហ៊ុនដែលបោះចោលឯកសារ ឬគ្រប់គ្រងឯកសារមិនបានត្រឹមត្រូវ នឹងត្រូវផាកពិន័យបន្ថែមចំនួន ១៦,៩៤០ បាត ពីបទមិនប្រុងប្រយ័ត្ន។

ដោយឡែក ករណីនេះបានបង្កឱ្យមានការខកចិត្ត និងការព្រួយបារម្ភពីសាធារណៈជនយ៉ាងខ្លាំង ពិសេសទាក់ទងនឹងសុវត្ថិភាពចំណីអាហារ ព្រោះក្រដាសដែលប្រើសារឡើងវិញអាចមានសារធាតុពុលពីទឹកថ្នាំដែលពុល និងឆ្លងកាត់ដៃមនុស្សជាច្រើន មុននឹងទៅដល់ដៃអ្នកទិញអាហារ៕