ជប៉ុនអបអរសាទរចំពោះកិច្ចព្រមព្រៀងឈប់បា.ញ់រវាងកម្ពុជា-ថៃ រួមទាំងសរសើរសហរដ្ឋអាមេរិក ចិន និងម៉ាឡេស៊ី

នៅថ្ងៃទី២៩ ខែកក្កដា ឆ្នាំ២០២៥ រដ្ឋមន្ត្រីក្រសួងការបរទេសជប៉ុនបានចេញសេចក្តីថ្លែងការណ៍អបអរសាទរដែលកម្ពុជា-ថៃបានសម្រេចកិច្ចព្រមព្រៀងលើបទឈប់បា.ញ់ ហើយជប៉ុនបានសរសើរសហរដ្ឋអាមេរិក ចិន និងម៉ាឡេស៊ី ដែលជំរុញការចរចារវាងប្រទេសទាំងពីរដោយជោគជ័យ ។ ជប៉ុនមើលឃើញថា កម្ពុជា និងថៃ មានសារៈសំខាន់បំផុតចំពោះសន្តិភាព និងការអភិវឌ្ឍប្រកបដោយនិរន្តរភាពនៅទូទាំងតំបន់ ។

ស្ថានទូតជប៉ុនប្រចាំប្រទេសថៃបានបង្ហោះសេចក្តីថ្លែងការណ៍ក្នុងហ្វេសប៊ុកផ្លូវការឈ្មោះ «Embassy of Japan in Thailand» នៅថ្ងៃទី២៩ ខែកក្កដា ស្តីពីកិច្ចព្រមព្រៀងលើបទឈប់បាញ់បន្ទាន់ដោយឥតលក្ខខណ្ឌរវាងកម្ពុជា និងថៃ ដោយរដ្ឋមន្ត្រីក្រសួងការបរទេសជប៉ុន លោក អិវ៉ាយ៉ាក ថាខេឈិ បញ្ជាក់ដូចខាងក្រោមនេះ ៖

១-រដ្ឋាភិបាលជប៉ុនដឹងច្បាស់អំពីសារៈសំខាន់នៃទំនាក់ទំនងសហប្រតិបត្តិការល្អរវាងកម្ពុជា និងថៃ ដែលមានសារៈសំខាន់យ៉ាងខ្លាំងដល់សុខសន្តិភាព និងការអភិវឌ្ឍប្រកបដោយនិរន្តរភាពនៅទូទាំងតំបន់ ។ ហេតុនេះ រដ្ឋាភិបាលជប៉ុនបានព្យាយាមជំរុញឱ្យប្រទេសទាំងពីរកាត់បន្ថយភាពតានតឹង ។

២-រដ្ឋាភិបាលជប៉ុនរីករាយយ៉ាងខ្លាំងដែលកម្ពុជា និងថៃបានព្រមព្រៀងគ្នាប្រកាសឈប់បាញ់បន្ទាន់ដោយឥតលក្ខខណ្ឌ និងសូមសរសើរប្រទេសម៉ាឡេស៊ី ដែលបានធ្វើជាម្ចាស់ផ្ទះរៀបចំកិច្ចចរចាពិសេសនេះ ។ ជប៉ុនក៏សូមសរសើរអាមេរិក និងមន្ត្រីពាក់ព័ន្ធការទូតដែលបានប្រឹងប្រែងអស់ពីសមត្ថភាពដើម្បីឱ្យការចរចាលើកនេះទទួលបានជោគជ័យ ។

៣-រដ្ឋាភិបាលជប៉ុននឹងព្យាយាមជំរុញឱ្យកម្ពុជា និងថៃកាត់បន្ថយភាពតានតឹង រួមទាំងគាំទ្រកិច្ចព្រមព្រៀងឈប់បាញ់បញ្ចប់ដោយជោគជ័យ ដោយជប៉ុននឹងសហការជាមួយប្រទេសពាក់ព័ន្ធ ។

គួរបញ្ជាក់ថា ក្រោយពីបទឈប់បាញ់បន្ទាន់ដោយឥតលក្ខខណ្ឌរវាងកម្ពុជា និងថៃចូលជាធរមាន ឃើញថាមានការអបអរសាទរជាបន្តបន្ទាប់ពីប្រទេសនានា ដូចជា ៖ អាមេរិក ចិន បារាំង ជប៉ុន អង់គ្លេស និងសហភាពអឺរ៉ុប ៕