កញ្ញា Bo Sokanha ដែលគេដឹងថាជាអ្នកគាំទ្រតារា K-Pop និងជាអ្នកគ្រប់គ្រង តារាចម្រៀង Mina បានបង្ហាញថានាងត្រូវបានគេបោកក្នុងការទិញសំបុត្រប្រគំតន្រ្តី VIP របស់ក្រុមចម្រៀង BLACKPINK ។ ទោះជាយ៉ាងណា អ្នកគ្រប់គ្រងតារារូបនេះបានបញ្ជាក់ ចុងក្រោយថានាងទទួលបានលុយកក់មកវិញ។.png)
នៅយប់ថ្ងៃទី៩ កក្កដា កញ្ញា Bo Sokanha បានបង្ហោះវីដេអូមួយនៅលើបណ្តាញសង្គម ទិកតុកដោយបានបង្ហាញថានាងត្រូវបានគេបោកលុយក្នុងការទិញសំបុត្រប្រគំតន្រ្តី BLACKPINK ។ កញ្ញាបានរៀបរាប់ថា នាងចង់បានសំបុត្រប្រភេទ VIP ទោះជានៅប្រទេសណាក៏បានដែរដោយសារតែនាងទិញមិនបាន។ លុះក្រោយមកនាងក៏បង្ហោះចូលក្នុងក្រុមមួយដើម្បីស្វែងរកទិញបន្តសំបុត្រ BLACKPINK ហើយក៏មានគណនីមួយបង្ហាញថារូបគេទិញពីនេះរួមក៏បន្តទំនាក់ទំនងគ្នាប្រហែលជាមួយម៉ោងនាងក៏សម្រេចចិត្តបាញ់លុយកក់ឱ្យ។
កញ្ញា Bo Sokanha បានបង្ហាញទៀតថា ព្រោះតែការទុកចិត្តជឿថាគេមិនបោកទាំងមានអ្នកប្រាប់នាងថាកុំឱ្យទិញក្តីប៉ុន្តែនាងនៅតែចចេសចង់ទិញប៉ុន្តែក្រោយមកគេរកលេសលើកហេតុផលនេះ ហេតុផលនោះទើបដឹងថាគេបោក។ 
ទោះជាយ៉ាងណា បន្ទាប់ពីដឹងថាគេបោកនាងហើយ អ្នកគ្រប់គ្រងតារារូបនេះបានសួរត្រង់ៗទៅកាន់អ្នកលក់សំបុត្រនោះថាបោកនាងមែន នាងសុំតែលុយកក់វិញទេ ហើយនៅទីបំផុតនាងក៏ទទួលបានលុយកក់មកវិញ។ ជាមួយនឹងវិធីសាស្រ្តបោកជាប្រព័ន្ធដែលមានគណនីហ្វេកប៊ុកមនុស្សតែម្នាក់តែដើរតួជាច្រើននាក់នេះ Sokanha ក៏បានផ្តាំផ្ញើឱ្យបុគ្គលម្នាក់នោះឈប់បន្តបោកប្រាស់អ្នកដទៃបែបនេះ។
គួរបញ្ជាក់ផងដែរថា ជារឿយៗអ្នកគាំទ្រមិនថាក្នុងស្រុកនិងក្រៅស្រុកគឺបានចាញ់បោកជនបោកប្រាស់ទៅលើការទិញសំបុត្រប្រគំតន្រ្តី ហើយពេលនេះអ្នកគាំទ្រកម្ពុជាស្ទើរតែចាញ់បោកគេទៅហើយ។
កាលពីខែមិថុនា ប្រព័ន្ធផ្សព្វផ្សាយកូរ៉េ បានរាយការណ៍ថាបុរសម្នាក់ត្រូវបានគេសង្ស័យថាបានព្យាយាមលក់សំបុត្រប្រគំតន្ត្រី Blackpink ក្លែងក្លាយនៅហាងកាហ្វេមួយក្នុងទីក្រុងសេអ៊ូល។ប៉ូលីសបានធ្វើការតាមដាននៅនឹងកន្លែង ហើយចាប់ខ្លួនបាននៅនឹងកន្លែង។ តាមការស៊ើបអង្កេតបានរកឃើញថា បុរសនោះ បានលក់សំបុត្រប្រគំតន្រ្តីក្លែងក្លាយប្រហែល ៥០០ សន្លឹក តាមរយៈការផ្លាស់ប្តូរសំបុត្រប្រើរួចដោយទទួលបានប្រាក់ប្រហែល ៨០លានវ៉ុន ប្រហែល ៥៨,០០០ ដុល្លារ៕
