តារាសម្តែង ឆឹម សក្កដា ត្រូវជាគូដណ្តឹងតារាចម្រៀង ពេជ្រ សោភា បានធ្វើឱ្យអ្នកគាំទ្របានបង្ហាញការព្រួយបារម្ភបន្ទាប់ពីលោកបង្ហោះពាក្យប្លែកៗថែមទាំងរូបភាពនៅលើប្រូហ្វាល់ដាក់រូបពណ៌ខ្មៅទៀត។ លោក សក្កដា ហាក់ដូចជាកំពុងជួបប្រទះស្ថានភាពផ្លូវចិត្តដែលមិនមានស្ថេរភាព។.png)
នៅវេលាម៉ោង១ជាងឈានចូលថ្ងៃទី៨ កក្កដា តារាសម្តែង ឆឹម សក្កដា បានបង្ហោះសំណេរថា «ជីវិតខ្ញុំមានន័យណាស់ មានន័យឆ្អែតគ្រប់គ្រាន់ដោយមិនបាច់មានជីវិតលើផែនដីជាតិក្រោយទៀតឡើយ»។ លោកបានបង្ហោះជាបន្តបន្ទាប់ថា «ធ្លាប់យល់សប្ដិឃើញខ្លួនឯងស្លាប់ អរអើយអរ គិតថាអស់កម្មហើយ! ដឹងខ្លួនឡើងសេដដដែល»។
ជាបន្តទៀត លោក ឆឹម សក្កដា បានបង្ហោះទៀតថា «សើច! ទឹកភ្នែកទុកពេលសម្ដែង» និងប្រយោគមួយទៀតថា «ម៉ោងនេះ គេជិតក្រោកវិញហើយ នៅឡើយអ្នកមិនដេកដូចខ្ញុំ»។ ជាមួយនឹងការបង្ហោះសារក្រៀមក្រំតារាសម្តែងរូបនេះក៏ដាក់រូបប្រូហ្វាល់ពណ៌ខ្មៅថែមទៀត។
ការបង្ហោះសំណេរប្លែកៗខាងលើរបស់លោក ឆឹម សក្កដា ដែលហាក់ដូចជាកំពុងមានជួបប្រទះបញ្ហាវិបតិ្តផ្លូវចិត្តនេះបានធ្វើឱ្យអ្នកគាំទ្រព្រួយបារម្ភ ខណៈតារាសម្តែង ចន ច័ន្ទលក្ខិណា ដែលមានការរាប់អានគ្នាជិតស្និទ្ធ គឺបានចូលទៅខម្មិនបង្ហាញការព្រួយបារម្ភចំពោះតារាសម្តែងរូបនេះដូចគ្នា។
គួរបញ្ជាក់ផងដែរថា កន្លងមកតារាសម្តែង ឆឹម សក្កដា បានបង្ហាញអារម្មណ៍សេដៗរបស់ខ្លួនដូចគ្នាហាក់ដូចជាពេលនេះលោកកំពុងតែតស៊ូជាមួយនឹងផ្លូវចិត្តរបស់ខ្លួន។ ទោះបីជាពេលនេះលោកមិនសូវជាចូលរួមកម្មវិធីសិល្បៈច្រើនក្តីប៉ុន្តែនៅពេលកម្ពុជាមានបញ្ហាជាមួយនឹងថៃ លោកបានចេញមកតតាំងដូចគ្នារហូតធ្វើឱ្យផេករបស់លោកជួបបញ្ហាទៀតផង៕
