រាជធានីភ្នំពេញ ៖ បន្ទាប់ពីកិច្ចប្រជុំគណៈកម្មការចម្រុះព្រំដែន JBC រវាងកម្ពុជា-ថៃ ដែលបានធ្វើឡើងនៅរាជធានីភ្នំពេញ នាថ្ងៃទី១៤-១៥ ខែមិថុនា បានបញ្ចប់ទៅ ភាគីទាំងពីរបានឯកភាពលើរបៀបវិរៈចំនួន ៤ចំណុច ដើម្បីបន្តពិភាក្សា និងជំរុញ ការងារខណ្ឌសីមា និងបោះបង្គោលព្រំដែនគោករវាងប្រទេសទាំងពីរ។.jpg)
កិច្ចប្រជុំពេញអង្គ JBC ដែលដឹកនាំដោយលោក ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន និងជាប្រធានគណៈកម្មការចម្រុះព្រំដែនកម្ពុជា(តំណាងភាគីកម្ពុជា) និង លោក ប្រាសាស ប្រាសាសវិនិច្ឆ័យ (Prasas Prasasvinitchai) ទីប្រឹក្សាក្រសួងការបរទេសថៃ និងជាប្រធានគណៈកម្មការចម្រុះព្រំដែនថៃ (តំណាងភាគីថៃ) បានឯកភាពអនុម័តលើរបៀបវារៈចំនួន៤ ដូចខាងក្រោម៖
១. ពិនិត្យ និងអនុម័តលើកំណត់ហេតុកិច្ចប្រជុំលើកទី៤ របស់អនុគណៈកម្មការបច្ចេកទេសចម្រុះព្រំដែន (JTSC) កម្ពុជា-ថៃ ថៃ-កម្ពុជា ចុះថ្ងៃទី១៤ ខែកក្កដា ឆ្នាំ២០២៤ នៅខេត្តសៀមរាប ព្រះរាជាណាចក្រកម្ពុជា
២. ពិនិត្យ និងពិភាក្សាលើការកែសម្រួល TOR ឆ្នាំ២០០៣ ពាក់ព័ន្ធការផលិតផែនទី អ័រតូហ្វូតូ (ជំហាន២ ក្នុងចំណុច៤ នៃ TOR)
៣. ពិភាក្សា និងអនុម័តលើការបញ្ជូនក្រុមវាស់វែងចម្រុះ ចុះវាស់វែង និងខណ្ឌសីមាព្រំដែន នៅលើដីជាក់ស្តែង នៅចន្លោះទីតាំងពិតប្រាកដនៃបង្គោលព្រំដែនដែលបានឯកភាពគ្នា (កំណាត់ខ្សែព្រំដែនដើរតាមផ្លូវទឹក និងកំណាត់ខ្សែត្រង់)
៤. ពិភាក្សាលើសេចក្តីណែនាំលើការវាស់វែងនៅ Sector 6 (ចំណុច IX នៃកិច្ចប្រជុំ លើកទី៤ និងកិច្ចប្រជុំពិសេសរបស់ JBC ឆ្នាំ២០០៩)។
គួរឲ្យដឹងថា មុននឹងចាប់ផ្ដើមកិច្ចប្រជុំពេញអង្គ ភាគីទាំងពីរបានបើកការប្រជុំចង្អៀតមួយ ដែលមានសមាជិកចូលរួមចំនួន១០នាក់ប៉ុណ្ណោះ ដោយកម្ពុជាចំនួន៥នាក់ និងថៃចំនួន៥នាក់ ដែលនាំឲ្យវាបានអូសបន្លាយពេលវេលានៃកិច្ចប្រជុំពេញអង្គផ្លូវការ។ 
យ៉ាងណាមិញគួរជម្រាបថា កិច្ចប្រជុំគណៈកម្មការចម្រុះព្រំដែន(JBC)កម្ពុជា-ថៃ លើកនេះគឺជាកិច្ចប្រជុំលើកទី៦ ដែលបានប្រព្រឹត្តទៅក្នុងបរិយាកាសមិត្តភាព យោគយល់គ្នា ក្នុងស្មារតីពិភាក្សាបើកចំហទៅវិញទៅមកនិងប្រកបដោយភាពវិជ្ជមាន។ លើសពីនេះ ភាគីទាំងពីរបានឯកភាពគ្នា និងចុះហត្ថលេខាលើការសម្រេចអនុម័តរបៀបវិរៈទាំង៤ចំណុចដូចខាងលើ ហើយភាគីទាំងពីរក៏បានឯកភាពគ្នា ក្នុងការជួបប្រជុំសាជាថ្មីម្ដងទៀតនៅខែកញ្ញា ឆ្នាំ២០២៥ខាងមុខនេះផងដែរ៕
