ផលិតករ ហ៊ុយ យ៉ាឡេង ប្រកាសលក់ក្រលៀនមួយចំហៀងយកលុយផលិតភាពយន្តខ្មែរ

ផលិតករភាពយន្តលោក ហ៊ុយ យ៉ាឡេង បានប្រកាសនៅលើបណ្តាញសង្គមផ្ទាល់ខ្លួនដោយលោកសុខចិត្តលក់ក្រលៀនមួយចំហៀងដើម្បីយកលុយនោះមកផលិតភាពយន្តថ្មី។ លោកក៏បង្ហាញដែរថាបើលោកមិនបានផលិតភាពយន្តស្មើនឹងលោកស្លាប់។ ជារឿយៗផលិតកររឿង «ដើម្បីកូន» តែងតែប្រកាសលក់នេះលក់នោះដើម្បីយកថវិកាមកផលិតភាពយន្តជាហេតុបង្កឱ្យលោកទទួលរងនូវភាពចម្រូងចម្រាស។

នៅថ្ងៃទី២ មិថុនា លោក ហ៊ុយ យ៉ាឡេង បានបង្ហោះនៅលើបណ្តាញសង្គមរបស់ខ្លួនថា « ជីវិតខ្ញុំបើមិនបានផលិតភាពយន្តស្មើនិងស្លាប់ខ្ញុំសូមប្រកាសលក់ក្រលៀនខ្លួនខ្ញុំមួយចំហៀងជូនបងប្អូនដើម្បីបានថវិការថតភាពយន្ត»។លោកបានបញ្ជាក់ថាលោកត្រូវការថវិកាចំនួន៦ ម៉ឺនដុល្លារដើម្បីថតភាពយន្តរឿងព្រះរស់ដែលនិយាយពីគុណរបស់មាតាបិតា»។

លោក ហ៊ុយ យ៉ាឡេង បានបញ្ជាក់យ៉ាងដូច្នេះថា «យើងខ្ញុំអស់អ្វីលក់ហើយសង្ឃឹមបងប្អូនជួយម្នាក់បន្តិចៗដើម្បីឱ្យខ្ញុំបាទបានថវិកាថតហើយខ្ញុំនឹងបរិច្ចាគក្រលៀនមួយចំហៀងទៅបងប្អូនដែលខ្វះខាតហើយត្រូវការសង្ឃឹមបងប្អូនដែលបានទស្សនាភាពយន្តរបស់ខ្ញុំទាំងអស់ជួយខ្ញុំហើយខ្ញុំនឹងសងគុណទៅបងប្អូនដែលជួយខ្ញុំវិញដោយទស្សនាភាពយន្តរបស់ខ្ញុំដោយមិនគិតថ្លៃពេញមួយជីវិតហើយខ្ញុំនិងខំប្រឹងផលិតភាពយន្តខ្មែរដើម្បីផ្សព្វផ្សាយទៅក្រៅប្រទេស»។

ផលិតកររូបនេះបានបញ្ជាក់ថាពេលនេះលោកកំពុងធ្វើការជាមួយមិត្តចិនដើម្បីយកភាពយន្តរឿងដើម្បីកូនចាក់ផ្សាយនៅទូរទស្សន៍ចិនCCTC 6 ដោយសង្ឃឹមថានឹងបានជោគជ័យ។

មែនទែនទៅនេះមិនមែនជាលើកទី១នោះទេដែលផលិតករភាពយន្តខ្មែររូបនេះបានប្រកាសលក់នេះលក់នោះនៅលើបណ្តាញសង្គមរបស់ខ្លួនដើម្បីយកថវិកានោះមកផលិតភាពយន្តខ្មែរបន្ទាប់ពីស្នាដៃរបស់លោកប៉ុន្មានឆ្នាំចុងក្រោយនេះមិនទទួលបានភាពជោគជ័យនៅលើទីផ្សារ។ ការត្អូញត្អែរនិងប្រកាសលក់របស់របររហូតឈានដល់សរីរាង្គខ្លួនឯងនេះទស្សនិកជនមួយចំនួនក៏ធ្លាប់បានបញ្ចេញមតិវែកញែកចំពោះលោក ហ៊ុយ យ៉ាឡេង ផងដែរនាកន្លងមកនេះ៕