ខេត្តសៀមរាបបានជាប់ឈ្មោះជាទីតាំងដែលឆក់យកបេះដូងភ្ញៀវទេសចរជុំវិញពិភពលោកសារជាថ្មី បន្ទាប់ពីទទួលបានចំណាត់ថ្នាក់ថាជាទីកន្លែងដ៏គួរឲ្យទាក់ទាញ និងត្រូវបានណែនាំដោយក្នុងគេហទំព័រ Tripadvisor ទៅកាន់ពិភពលោកសម្រាប់ឆ្នាំ 2024។.png)
គួរជម្រាបថា Tripadvisor គឺជាវេទិកាទេសចរណ៍ដ៏ល្បី និងពេញនិយមមួយនៅនៅពិភពលោក ដែលវាផ្ដល់ព័ត៌មានទូទៅអំពីទីតាំងដែលគួរឲ្យចាប់អារម្មណ៍ក្នុងការទៅកម្សាន្ត តម្លៃនៃសំបុត្រយន្តហោះ សណ្ឋាគារ ភោជនីយដ្ឋាន កញ្ចប់មគ្គុទេសក៍ទេសចរណ៍ និងសេវាកម្មផ្សេងៗ តាមទីកន្លែងទេសចរណ៍នៅតាមប្រទេសនីមួយៗ។ ជាពិសេស វាត្រូវបានគេទទួលស្គាល់ថាជាមាតិការមួយដែលផ្ដល់នូវព័ត៌មានពិតប្រាកដ និងជាក់លាក់មួយទាក់ទងទីតាំងទេសចរណ៍ ព្រមទាំងទទួលបានការទុកចិត្តពីសំណាក់មនុស្សជាច្រើនលាននាក់នៅជុំវិញពិភពលោក។
ជាក់ស្ដែង ការដាក់តាំងបង្ហាញខេត្តសៀបរាប ថាជាទីតាំងដែលមិនគួររំលងក្នុងការទៅលេងកម្សាន្តនៅលើទំព័រដើមនៃ Tripadvisor នេះ គឺផ្អែកលើចំណុចពិសេសៗដែលមាននៅក្នុងខេត្តនេះរួមមាន៖ ជាទីតាំងប្រវត្តិសាស្រ្តដ៏អស្ចារ្យ មានភាពរស់រវើកនៃវប្បធម៌ និងជាទីកន្លែងដែលអាចផ្ដល់ការកម្សាន្តបានគ្រប់រដូវកាលយ៉ាងសម្បូរបែប។
លើសពីនេះ Tripadvisor បានសរសើខេត្តសៀមរាបថា៖ “នៅទីនេះមានប្រាសាទអង្គរវត្ត ជាសំណង់សាសនាដ៏ធំបំផុតមួយនៅក្នុងពិភពលោក យើងអាចទស្សនាថ្ងៃរះ និងលិចដែលស្រស់ស្អាតបំផុត។ លើសពីនេះ ខេត្តសៀមរាបនឹងផ្ដល់នូវដំណើរទេសចរណ៍វប្បធម៌ និងអរិយធម៌ល្អឯក ដូចជាការស្វែងយល់ពីប្រាសាទបុរាណនានានៅក្នុងក្រុងអង្គរធំ រួមទាំងទទួលយកបទពិសោធនៃជីវិតបែបស៊ីវិល័យនៅក្នុងផ្សាររាត្រីដ៏អ៊ូអរផងដែរ។
នេះគឺជាមោទនភាពមួយ សម្រាប់កម្ពុជាដែលខេត្តមួយរបស់ប្រទេសយើងត្រូវបានណែនាំទៅកាន់ពិភពលោក ជាពិសេសចំពោះមនុស្សដែលមានគម្រោងចង់ធ្វើដំណើរកម្សាន្ត ឲ្យមកសាកល្បងមកលេងកម្សាន្តនៅកម្ពុជាដើម្បីទទួលបានបទពិសោធនៃការកម្សាន្តល្អៗ។ ហើយវាជា កត្តាជំរុញដ៏ល្អមួយក្នុងការផ្សព្វផ្សាយពីតំបន់ទេសចរណ៍ក្នុងស្រុកទៅកាន់អន្តរជាតិ តាមរយៈវេទិកាដែលទូលំទូលាយបែបនេះ៕
