ប្រទេសថៃ ៖ សារព័ត៌មានថៃរាយការណ៍ថា ពលរដ្ឋបានប្រទះឃើញរណ្តៅដីមានជម្រៅជ្រៅ ចំនួន៦រណ្តៅ ស្ថិតនៅភូមិមេសុរិន ឃុំខុនយ៉ួម ស្រុកឃុនយ៉ួម ខេត្តមេហុងសន ហើយចៅហ្វាយស្រុកឃុនយ៉ួម បានហាមឃាត់ពលរដ្ឋកុំឱ្យទៅក្បែររណ្តៅទាំងនេះ ដោយសារបារម្ភពីគ្រោះថ្នា.ក់ និងរង់ចាំការស្រាវជ្រាវរកមូលហេតុច្បាស់លាស់ ។ អាជ្ញាធរសន្និដ្ឋានថា ដោយសារប្រទេសថៃទទួលរងឥទ្ធិពលរញ្ជួយដីពីមីយ៉ាន់ម៉ា កាលពីថ្ងៃទី២៨ ខែមីនា កន្លងមក ទើបបណ្តាលឱ្យដីស្រុតក្លាយជារណ្តៅ ។.jpg)
កាលពីថ្ងៃទី៣១ ខែមីនា ឆ្នាំ២០២៥ ចៅហ្វាយស្រុកឃុនយ៉ួម លោក ណារ៉ុងផាត់ ណាតសាប់ បានទទួលសេចក្តីរាយការណ៍ពីការប្រទះឃើញរណ្តៅដីជ្រៅជាច្រើនកន្លែងមានទំហំខុសៗគ្នាក្នុងតំបន់កសិកម្មនៅភូមិមេសុរិន ឃុំឃុនយ៉ួម ស្រុកឃុនយ៉ួម ខេត្តមេហុងសន ហើយលោកក៏បញ្ជូនមន្ត្រីថ្នាក់ស្រុក សហការជាមួយមន្ត្រីថ្នាក់ឃុំ ចុះត្រួតពិនិត្យរណ្តៅដីទាំងនេះ ។ រណ្តៅដីសរុបមាន៦រណ្តៅ ក្នុងនោះមានរណ្តៅធំចំនួន២ និងរណ្តៅតូចចំនួន៤ ក្រោយការពិនិត្យរួច មន្ត្រីក៏បានហាមឃាត់ពលរដ្ឋចូលក្បែររណ្តៅ ពីព្រោះអាចកើតគ្រោះថ្នាក់ និងរង់ចាំការស្រាវជ្រាវបន្តទៀត ។.jpg)
ការប្រទះឃើញរណ្តៅជាច្រើននេះធ្វើឱ្យពលរដ្ឋភ្ញាក់ផ្អើលយ៉ាងខ្លាំង ហើយសន្និដ្ឋានថា វាកើតឡើងដោយសារឥទ្ធិពលរញ្ជួយដីនៅប្រទេសមីយ៉ាន់ម៉ា កាលពីថ្ងៃទី២៨ ខែមីនា កន្លងមក ។ រញ្ជួយដីនេះធ្វើឱ្យប៉ះពាល់ផ្ទៃដីកសិកម្មនៅប្រទេសថៃ ពីព្រោះក្រោយកើតរញ្ជួយដីធ្ងន់ធ្ងរនៅមីយ៉ាន់ម៉ា គឺមានរញ្ជួយដីជាច្រើនលើកក្នុងខេត្តមេហុងសន និងបណ្តាលឱ្យដីស្រុតក្លាយជារណ្តៅ ។
រណ្តៅទាំងនេះកើតឡើងនៅលើដីស្រែរបស់មេភូមិ និងលើដីស្រែរបស់ពលរដ្ឋម្នាក់ទៀត ដែលនៅឆ្ងាយពីគ្នាប្រមាណ៤ម៉ែត្រ ដែលរណ្តៅនីមួយៗមានទទឹង១០ម៉ែត្រ និងជម្រៅ៤ម៉ែត្រ ។ អាជ្ញាធរបានយកខ្សែមកចងដើម្បីការពារមិនឱ្យពលរដ្ឋចូលក្បែរ ដោយសាររណ្តៅមានជម្រៅកាន់តែជ្រៅ ហើយរង់ចាំឱ្យភ្នាក់ងារជំនាញមកត្រួតពិនិត្យ ។ មេភូមិបានជូនដំណឹងទៅអ្នកភូមិឱ្យដឹងអស់ហើយ និងហាមអ្នកភូមិចូលក្បែររណ្តៅដាច់ខាត ដោយសារអាចកើតគ្រោះថ្នាក់ ។ នេះបើតាមមេភូមិមេសុរិន លោក ថាវ៉ាត់ ខាតខាំផូ ។
ពលរដ្ឋក្នុងតំបន់ប្រាប់ថា ពុំធ្លាប់ឃើញរណ្តៅបែបនេះពីមុនមកទេ ប៉ុន្តែក្រោយកើតរញ្ជួយដីនៅមីយ៉ាន់ម៉ា និងមាន Aftershocks ជាច្រើនលើក ស្រាប់តែកើតរណ្តៅទាំងនេះ ។ សំណាងល្អ វាកើតនៅលើដីស្រែ បើកើតនៅទីប្រជុំជនវិញ មុខជាខូចខាតលំនៅឋានពលរដ្ឋមិនខាន ៕
