រដ្ឋមន្ត្រីក្រសួងកសិកម្ម ពន្យល់ពីមូលហេតុដែលស្រូវធ្លាក់ថ្លៃ

ថ្មីៗនេះ នៅលើបណ្តាញសង្គម គេសង្កេតឃើញមានកសិករហាក់រអ៊ូរទាំងនឹងតម្លៃស្រូវចុះថោកខ្លាំង ដោយតម្លៃស្រូវអូអឹម (OM 54.51) ត្រូវបានឈ្មួញកណ្តាលមកទិញដល់ផ្ទះឱ្យត្រឹម៨០០រៀលក្នុងមួយគីឡូ ខណៈពូជស្រូវ៥៥៥ ឬស្រូវ៨៥ បានត្រឹម៧០០រៀលក្នុងមួយគីឡូ។
ពាក់ព័ន្ធនឹងករណីនេះ រដ្ឋមន្ត្រីក្រសួងកសិកម្ម ឯកឧត្តម ឌិត ទីណា បានបញ្ចេញសារសំឡេងពិសេស ពន្យល់ច្បាស់ៗទៅកាន់កសិករ ដោយលើកឡើងថា៖” បច្ចុប្បន្នស្រូវមិនធ្លាក់ថ្លៃទាំងគ្រប់ប្រភេទនោះទេ ដោយស្រូវវស្សាមិនមានបញ្ហា ដូចស្រូវប្រាំងនោះទេ ព្រោះកសិករចង់ចំណេញច្រើន នាំគ្នាសម្រុកធ្វើជាង៧០មុឺនហិកតា គិតជាទន្និផលប្រមាណជា៥លានតោន ដែលសុទ្ធតែស្រូវប្រភេទអូអឹម (OM 54.51)”។
រដ្ឋមន្ត្រីក្រសួងកសិកម្មរូបនេះ បន្ថែមខថា ៖” សម្រាប់ស្រូវប្រភេទអូអឹមនេះ ពីមុនវៀតណាមត្រូវការច្រើន ដោយហ៊ានឱ្យតម្លៃខ្ពស់ ទើបកសិករនាំគ្នាសម្រុកធ្វើ តែបច្ចុប្បន្នស្រូវប្រភេទនេះ នៅទីផ្សារវៀតណាមមិនសូវត្រូវការទៀតនោះទេ ខណៈមន្រ្តីកសិកម្មធ្លាប់ប្រាប់ឱ្យកសិករផ្លាស់ប្តូរមកដាំប្រភេទស្រូវខ្មែរវិញ តែកិសករមិនព្រម”។
ឯកឧត្តម ឌិត ទីណា ក៏បានសង្កត់ធ្ងន់ថា៖” សម្រាប់តម្លៃស្រូវអូអឹមនេះ នឹងមិនងាយឡើងថ្លៃវិញនោះទេ ព្រោះមិនមែនជាប្រភេទស្រូវក្នុងស្រុក ដែលមានតម្រូវឱ្យការជាប្រចាំថ្ងៃ”។
យ៉ាងណាមិញ ជុំវិញបញ្ហានេះ ក្រសួងកសិកម្ម បាននឹងកំពុងទំនើបកម្មកសិកម្ម ដោយចងក្រងជាសហគមន៍ ដែលតម្រូវឱ្យកសិករ ធ្វើស្រូវចូលគ្នា និងអាចខ្ចីថវិការពីក្រសួង ដែលមានការប្រាក់ទាប ងាយស្រួលសងមកវិញ ៕