តារាចម្រៀង កែវ សុបញ្ញា វីរៈ និច្ច ថាន់ នឿថង និងអ្នកសិល្បៈមួយចំនួនទៀតបានគាំទ្រការលើកឡើងរបស់តារាចម្រៀង នាង ដាវីន ដែលបានលើកឡើងអំពីតម្លៃខ្លួននៃអាជីពការងារទាញទីផ្សារធ្លាក់ចុះដោយប្រើភាសាថា «ជួយម្តង» ។ ទោះបីជាការលើកឡើងរបស់ខ្លួនអាចនឹងត្រូវប្រឈមការបិទទីផ្សារ នាង ដាវីន មិនខ្លាចនោះទេដោយចេញមកដាស់តឿនដល់អ្នកសិល្បៈឯទៀត។
នៅយប់ថ្ងៃទី៨ មករា តារាចម្រៀង នាង ដាវីន បានបង្ហោះនៅលើបណ្តាញសង្គមថា «សារដាស់តឿនទៅកាន់បងប្អូនសិល្បៈទាំងអស់ ….ចង់ឱ្យវិស័យសិល្បៈរីកចម្រើន ? ចុះហេតុអីទាញទីផ្សារពួកខ្ញុំទម្លាក់ចុះ ហើយប្រើភាសាជួយបងម្តង តែជួយយូរទៅ ដូចអត់ឡើងលើសោះ មានតែទាញចុះក្រោមរហូត ហើយទៅដើរនិយាយថាចេះចុះ ធ្វើចឹងដើម្បីអី ? អ្នកចង់ចំណេញ ចុះហេតុអីមិនឱ្យពួកខ្ញុំចំណេញខ្លះវិញ ? ឱ! វិស័យសិល្បៈខ្ញុំអើយ ថ្ងៃមុខទៅជាយ៉ាងណាបើនៅតែបែបនេះ »។
TOP4 រូបនេះបានបន្តទៀតថា «រឿងនេះវាយូរហើយតែគ្មានអ្នកណាហ៊ានព្រោះខ្លាចគេបិទទីផ្សារ ចឹងទុកខ្ញុំអ្នកនិយាយចឹង សូមផ្តាំទៅបងៗប្អូនៗអ្នកចម្រៀងទាំងអស់ថា បើនៅតែធ្វើបែបនោះ អ្នកដែលខាតគឺជាអ្នក បើគេមិនចំណេញគេមិនធ្វើទេត្រូវចាំ ស្អប់ខ្ញុំក៏ស្អប់ចុះពាក្យពិតរាងពិបាកទទួលយកបន្តិចតែក៏អាចជួយគេបានច្រើនខ្ញុំក៏សប្បាយចិត្ត»។
ខ្លឹមសារខាងលើនេះរបស់ នាង ដាវីន បានធ្វើឱ្យអ្នកសិល្បៈជាច្រើនរូបបង្ហាញការគាំទ្រនូវអ្វីដែលតារាចម្រៀងរូបនេះនិយាយព្រោះបានជួបហេតុការណ៍ដូចគ្នា។ តារាចម្រៀង កែវ សុបញ្ញា បានសរសេរថា «បងជួបឆ្អែតហើយពៅមាស ពាក្យក្នុងចិត្តបងក៏ប្អូននិយាយ មកអស់ដែរ ។ តារាចម្រៀង វីរៈ និច្ច ថា «Support ur idea» ។ ងាកទៅកាន់តារាចម្រៀង ថាន់ នឿថង ម្ចាស់បទ ផ្លូវណាទៅផ្ទះម៉ែក្មេក បានលើកឡើងថា «ជួយបងម្តងមធ្យម ងំពេលហៅតួច្រៀងម្តងៗនិយាយបន្ទាបតម្លៃតួធំល្បីៗ សុទ្ធតែអូនឯងច្រៀងតម្លៃប៉ុណ្ណេះបានហើយ ព្រោះតួ ( ក )គេល្បីខ្លាំងផង គាត់យកតែប៉ុណ្ណឹង ចឹងអូនឯងយកដូចគាត់ដែរទៅ ស្បថ ឮផ្ទាល់ៗ ឃើញផ្ទាល់ៗ»។ 
មិនត្រឹមតែតារាល្បីៗខាងលើនេះប៉ុណ្ណោះទេ ប៉ុន្តែមានអ្នកសិល្បៈជាច្រើនទៀតក៏បានគាំទ្រ យល់ស្របនូវអ្វីដែល នាង ដាវីន បានលើកឡើងផងដែរ៕
