រូបភាពកាលពី Liu Yifei មានអាយុ១២ឆ្នាំ ធ្វើឱ្យអ្នកនិយមលេងអ៊ីនធឺណិតភ្ញាក់ផ្អើល

Liu Yifei ជាតារាស្រីម្នាក់ក្នុងអាជីពសិល្បៈចិនអស់រយៈពេល២០ឆ្នាំមកហើយ។ តារាស្រីរូបនេះជារឿយៗត្រូវបានអ្នកគាំទ្រតែងតែការពារពីសំណាក់មហាជនដោយសារតែរូបសម្រស់ស្រស់ស្អាតរបស់នាង។ ថ្មីៗនេះ សម្រស់ធម្មជាតិរបស់តារាស្រីរូបនេះត្រូវបានបញ្ជាក់បន្ថែម នៅពេលដែលរូបថតដ៏កម្រកាលពីសិក្សានៅអាម៉េរិកចែកចាយលើបណ្តាញសង្គម។

យោងតាម QQ អតីតមិត្តរួមថ្នាក់របស់ Liu Yifei បានចែករំលែករូបថតមួយកាលលពីនាងអាយុ ១២ ឆ្នាំ។ រូបថតនេះត្រូវបានគេរាយការណ៍ថាថតនៅខែតុលា ឆ្នាំ១៩៩៩ នៅសហរដ្ឋអាម៉េរិក នៅពេលនោះ Liu Yifei មានភាពស្រស់ស្អាតរួចទៅហើយ ដោយគ្រូរបស់នាងបានពេញចិត្តនាងដោយដាក់នាងនៅចំកណ្តាលសម្រាប់រូបថតក្នុងថ្នាក់។ អ្វីដែលគួរឱ្យកត់សម្គាល់នោះ មិត្តរួមថ្នាក់របស់នាងក៏បានទម្លាយថា Liu Yifei មិនត្រឹមតែជាតារាក្នុងថ្នាក់ប៉ុណ្ណោះទេ ប៉ុន្តែថែមទាំងជាតារាប្រចាំសាលាតាំងពីមធ្យមសិក្សាផងដែរ។ រូបថតនិងព័ត៌មានដែលពីមុនមិនបានផ្សព្វផ្សាយអំឡុងពេល Liu Yifei នៅសហរដ្ឋអាម៉េរិក បានសាយភាយពេញបណ្ដាញសង្គម។

អ្នកនិយមលេងអ៊ីនធឺណិតសរសើរពីភាពទាក់ទាញរបស់តារារូបនេះតាំងពីក្មេង។ Liu Yifei បានផ្លាស់ទៅរស់នៅសហរដ្ឋអាម៉េរិកក្នុងឆ្នាំ១៩៩៧ បន្ទាប់ពីឪពុកម្តាយរបស់នាងបានលែងលះគ្នា។ ម្ដាយរបស់នាងបានរៀបការជាមួយមេធាវីជនជាតិអាម៉េរិកដើមកំណើតចិនដ៏មានស្ដុកស្ដម្ភម្នាក់ ដែលបានចាត់ទុកនាងដូចជាកូនស្រីរបស់ខ្លួន។ លោកបានចុះឈ្មោះ Liu Yifei នៅក្នុងសាលាល្អបំផុត ថែមទាំងជួលសិស្សនៅ Harvard ឱ្យបង្រៀននាងជាភាសាអង់គ្លេសទៀតផង។ ឪពុកទី២របស់តារាស្រីនេះក៏បានគាំទ្រនាងក្នុងការស្វែងរកទេពកោសល្យដូចជាព្យាណូ និងរាំរបាំបាឡេ។ ក្នុងឆ្នាំ ២០០២ Liu Yifei បានត្រឡប់មកប្រទេសចិនវិញ ហើយចូលប្រឡូកក្នុងអាជីពសិល្បៈដោយមានការគាំទ្រពីមហាសេដ្ឋី Chen Jinfei ។

សព្វថ្ងៃនេះ Liu Yifei គឺជាឈ្មោះដ៏ពេញនិយមបំផុតមួយនៅក្នុងទូរទស្សន៍ចិន។ នាងមានរឿងភាគល្បីៗជាច្រើនក្នុងរយៈពេលបួនឆ្នាំកន្លងមកនេះដូចជា «Meet Yourself» និង «The Tale of Rose»។ នៅឯកម្មវិធី Tencent White Book Entertainment Awards នៅថ្ងៃទី២៥ ខែធ្នូ ការសំដែងរបស់ Liu Yifei ជាតួអង្គ Huang Yimei ក្នុងរឿង “The Tale of Rose” បានជាប់ចំណាត់ថ្នាក់កំពូលតារាងសម្រាប់តារាសម្តែង និងរឿងភាគទូរទស្សន៍ដែលពេញនិយមបំផុតក្នុងឆ្នាំ ២០២៤។

ទាក់ទងនឹងជីវិតផ្ទាល់ខ្លួនរបស់នាង Liu Yifei មានពាក្យចចាមអារ៉ាមថាកំពុងមានទំនាក់ទំនងស្នេហាជាមួយ Li Xian ដែលជាតួឯកប្រុសក្នុងរឿង «Meet Yourself»។ ថ្មីៗនេះ អ្នកទាំងពីរបានធ្វើឱ្យមានការរំជើបរំជួលដោយចូលរួមក្នុងកម្មវិធីខួបកំណើតកូនស្រីរបស់ Li Xiang ។ ចំពេលមានពាក្យចចាមអារ៉ាមទាក់ទងនឹងស្នេហា អ្នកទាំងពីរមិនបានធ្វើអត្ថាធិប្បាយលើរឿងនេះឡើយ៕