Grace Chan បវរកញ្ញាហុងកុង និងជាតារាសម្តែង ភរិយារបស់តារាសម្តែង TVB Kevin Cheng បានច្រានចោលពាក្យចចាមអារ៉ាមអំពីការលែងលះនាពេលថ្មីៗនេះ ដោយសង្កត់ធ្ងន់ថា អាពាហ៍ពិពាហ៍របស់ពួកគេនៅតែរឹងមាំ និងមានសុភមង្គល។
ក្នុងព្រឹត្តិការណ៍មួយកាលពីពេលថ្មីៗកន្លងមក Grace បាន សារភាពថា នាងមិនបានដឹងពីពាក្យចចាមអារ៉ាមនេះថានាងនឹងលែងលះនោះទេ ដោយបានចាត់ទុកការអះអាងចំណងអាពាហ៍របស់នាងនិងស្វាមីមានភាពរង្គោះរង្គើកើតមកពីមនុស្សដែលចង់បង្ករឿង។ «ប្រហែលជាមនុស្សទាំងនោះចង់បង្កើតអ្វីមួយដើម្បីនិយាយ។ វាមិនពិតទេ។ ខ្ញុំបាននៅក្នុងឧស្សាហកម្មនេះអស់រយៈពេល ១១ ឆ្នាំមកហើយ តើអ្វីដែលខ្ញុំមិនបានឃើញ ឬបានឮ?»។
គេហទំព័រមួយចំនួនថ្មីៗនេះបានចោទប្រកាន់ថាគូស្នេហ៍មួយគូនេះកំពុងឈានដល់ដំណាក់កាលនៃការលែងលះ ដោយសំអាងលើការអះអាងថាតារាសម្តែង Kevin បាន «បង្ហាញពណ៌ពិតរបស់លោក»។ Kevin Cheng មានអាយុ៥៥ឆ្នាំជាតារាសម្តែងកើតនៅសហរដ្ឋអាម៉េរិកដែលគ្រប់គ្រងដោយ TVB ទទួលបានភាពល្បីល្បាញជាមួយនឹងតួនាទីជាច្រើនរឿង។ លោកបានឈ្នះពានរង្វាន់តារាសម្តែងល្អបំផុតនៅ TVB Anniversary Awards ក្នុងឆ្នាំ ២០១១ សម្រាប់តួនាទីរបស់លោកនៅក្នុងរឿង «មេធាវីចិត្តធម៌» (Ghetto Justice) ។
Grace Chan មានអាយុ ៣៣ ឆ្នាំ ជាតារាសម្តែងមានដើមកំណើតកាណាដា និងជាពិធីការិនី TVB បានឈ្នះមកុដបវរកញ្ញាហុងកុងក្នុងឆ្នាំ២០១៣ មុនពេលក្លាយជាតារាសម្តែង។
គូស្នេហ៍មួយគូនេះបានជួបគ្នាក្នុងឆ្នាំ ២០១៤ អំឡុងពេលថតរឿងរៀងខ្លួនរឿងពីរផ្សេងគ្នាហើយចាប់ផ្ដើមមានទំនាក់ទំនងស្នេហាមួយឆ្នាំក្រោយមកបន្ទាប់ពីបានរួមសម្តែងក្នុងរឿង «ព្រាយជញ្ជក់ឈាម»ឬ (Blue Veins)។ ទោះបីជាមានការបារម្ភពីឪពុកម្តាយខ្លះអំពីគម្លាតអាយុ ២២ ឆ្នាំរបស់ពួកគេក៏ដោយ ក៏ពួកគេបានរៀបការនៅឆ្នាំ២០១៨ ក្នុងពិធីមង្គលការដែលធ្វើឡើងនៅកោះបាលី។ បច្ចុប្បន្នអ្នកទាំងពីរមានកូនប្រុសបីនាក់៕
