រដ្ឋសម្រេចបង្កើតភូមិថ្មីមួយដាក់ឈ្មោះ “ភូមិប៊ុនរ៉ានីសែនជ័យដំណាក់ទ្រយឹង”

តាមសំណើររបស់រដ្ឋបាលខេត្តពោធិ៍សាត់ ឯកឧត្តម ឧបនាយករដ្ឋមន្ដ្រី ស សុខា រដ្ឋមន្ដ្រីក្រសួងមហាផ្ទៃ នៅថ្ងៃទី០៥ ខែវិច្ឆិកា ឆ្នាំ២០២៤នេះ ចេញប្រកាសស្ដីពីការបង្កើតភូមិប៊ុនរ៉ានីសែនជ័យដំណាក់ទ្រយឹង។

ភូមិនេះ មានទីតាំងស្ថិតនៅក្នុងភូមិសាស្ត្រឃុំព្រងិល ស្រុកភ្នំក្រវាញ ខេត្តពោធិ៍សាត់ ដែលបានបំបែកចេញពីភូមិសាយ ឃុំព្រងិល ស្រុកភ្នំក្រវាញ ខេត្តពោធិ៍សាត់។

ភូមិប៊ុនរ៉ានីសែនជ័យដំណាក់ត្រយឹង គឺជាភូមិថ្មីមួយដែលត្រូវបានសម្ដេចតេជោ ហ៊ុន សែន បានផ្ដល់ដីសម្បទានសង្គមកិច្ចប្រមាណជាង ៩០០ហិកតា ដើម្បីបែកចែកជូនអតីតយុទ្ធជន និងគ្រួសារអតីតយុទ្ធជនសរុបចំនួន ៦២៨គ្រួសារបានរស់នៅ។

ភូមិនេះ មានលក្ខណៈអំណោយផលក្នុងការរស់នៅ ដោយមានខ្សែទឹកធម្មជាតិចំនួន ៨ខ្សែ ហូរធ្លាក់ពីតំបន់ភ្នំនៅជុំវិញ ដែលគ្រប់គ្រាន់សម្រាប់ប្រជាជនប្រើប្រាស់ជាប្រចាំ។

គួរបញ្ជាក់ថា បច្ចុប្បន្ន កម្ពុជាមានរាជធានីខេត្តចំនួន២៥, ស្រុក ក្រុង ខណ្ឌសរុបចំនួន២០៩, ឃុំ សង្កាត់ចំនួន១៦៥២ និងភូមិសរុបចំនួន១៤៥៧៧៕

---