ប្រទេសជប៉ុន ៖ កាលពីថ្ងៃទី២ ខែវិច្ឆិកា ឆ្នាំ២០២៤ សារព័ត៌មានបរទេសរាយការណ៍ថា អាជ្ញាធរជប៉ុនបានអំពាវនាវឱ្យពលរដ្ឋជាង២សែននាក់ ដែលរស់នៅទីក្រុងភាគខាងលិចជម្លៀសចេញពីលំនៅឋានជាបន្ទាន់ ពីព្រោះបារម្ភពីឥទ្ធិពលខ្យល់ព្យុះទីហ្វុងឈ្មោះ «Kong Rey» បណ្តាលឱ្យភ្លៀងធ្លាក់ខ្លាំង និងបាក់ដីជាច្រើនកន្លែង ។
ការិយាល័យឧតុនិយមជប៉ុនប្រកាសថា អាកាសធាតុក្តៅហើយសើម នឹងបណ្តាលឱ្យមានភ្លៀងធ្លាក់ខ្លាំង ព្រមទាំងមានខ្យល់ព្យុះក្នុងតំបន់ភាគខាងលិចប្រទេស ។ វាបណ្តាលមកពីឥទ្ធិពលខ្យល់ព្យុះទីហ្វុងឈ្មោះ «Kong Rey» ហើយនៅថ្ងៃទី២ ខែវិច្ឆិកា កន្លងមក មានសម្ពាធទាបក្នុងតំបន់នេះ ។.png)
អាជ្ញាធរទីក្រុង Matsuyama ក្នុងខេត្ត Ehime បានជូនដំណឹង និងស្នើឱ្យពលរដ្ឋចំនួន១៨៩.៥៥២នាក់ រស់នៅក្នុងតំបន់ចំនួន១០ ជម្លៀសទៅកាន់តំបន់មានសុវត្ថិភាពជាបន្ទាន់ ។ បើទោះជាអាជ្ញាធរទីក្រុងនេះពុំបានបញ្ជាឱ្យពលរដ្ឋជម្លៀសពីលំនៅឋានក្តី ប៉ុន្តែអាជ្ញាធរជប៉ុនតែងតែជូនដំណឹងឱ្យពលរដ្ឋប្រុងប្រយ័ត្នគ្រោះថ្នាក់ធម្មជាតិ ។
កាលពីថ្ងៃទី២ ខែវិច្ឆិកា កន្លងមក ការិយាល័យឧតុនិយមប្រកាសថា នឹងមានគ្រោះទឹកជំនន់ និងបាក់ដីជាច្រើនកន្លែងក្នុងតំបន់ភាគខាងលិច និងភាគខាងកើតប្រទេសជប៉ុន ។ ក្រៅពីនេះ ភ្លៀងធ្លាក់ខ្លាំងនឹងបណ្តាលឱ្យរថភ្លើងល្បឿនលឿនតភ្ជាប់ពីទីក្រុងតូក្យូ ជាមួយខេត្ត Fukuoka បិទដំណើរការជាបណ្តោះអាសន្ន កាលពីថ្ងៃទី២ ខែវិច្ឆិកា ។
កម្រិតទឹកទន្លេក្នុងខេត្ត Yamaguchi, ខេត្ត Shimane និងទីក្រុងតូក្យូ បានកើនឡើងខ្ពស់អាចបណ្តាលឱ្យកើតទឹកជំនន់ ខណៈកម្រិតទន្លេកូណូកាវ៉ាក់ នៅខេត្ត Shimane ក៏បានកើនឡើងខ្លាំងផងដែរ ។ អាជ្ញាធរជប៉ុនសន្និដ្ឋានថា នឹងមានបរិមាណទឹកភ្លៀងរហូតដល់១៥០មីល្លីម៉ែត្រក្នុងតំបន់ថូកូ និង១២០មីល្លីម៉ែត្រក្នុងតំបន់ឃិងគិ និងតំបន់ឈិកូគុ រីឯតំបន់ខាន់តូ ឃូឈិន នឹងមានបរិមាណទឹកភ្លៀង១០០មីល្លីម៉ែត្រ ។
គួរបញ្ជាក់ថា ខ្យល់ព្យុះទីហ្វុង «Kong Rey» បានបោកបក់មកលើកោះតៃវ៉ាន់ កាលពីថ្ងៃទី៣១ ខែតុលា កន្លងមក ហើយជាខ្យល់ព្យុះមានកម្លាំងខ្លាំងបំផុត ដែលតៃវ៉ាន់ធ្លាប់ជួបប្រទះក្នុងរយៈពេលជាង៣០ឆ្នាំមកនេះ ។ វាបណ្តាលឱ្យពលរដ្ឋតៃវ៉ាន់ស្លាប់៣នាក់ និងរងរបួស៦៩០នាក់ និងដាច់ចរន្តអគ្គិសនីក្នុងលំនៅឋានពលរដ្ឋ ចំនួន៩៥៧.០៦១ខ្នង ក្នុងនោះលំនៅឋាន ២៧.៧៨១ខ្នង គ្មានអគ្គិសនីប្រើប្រាស់រហូតមកដល់ថ្ងៃទី២ ខែវិច្ឆិកា ៕
