កម្ពុជា គ្រោងទិញថាមពលអគ្គិសនីស្អាតពីប្រទេសជិតខាង៦០០មេហ្គាវ៉ាត់

ថ្លែងក្នុងកម្មវិធីសប្តាហ៍ថាមពលអន្តរជាតិសិង្ហបុរី (SIEW) ឆ្នាំ២០២៤ រដ្ឋមន្ត្រីក្រសួងថាមពល ឯកឧត្តម កែវ រតនៈ លើកឡើងថា៖”កម្ពុជាកំពុងសម្លឹងឃើញការបង្កើនការនាំចូលថាមពលស្អាតពីប្រទេសក្បែរខាងដូចជា ឡាវ វៀតណាម និងថៃ ច្រើនជាង៦០០មេហ្គាវ៉ាត់”។

នៅក្នុងនោះ កម្ពុជា គ្រោងនាំចូលថាមពលពន្លឺព្រះអាទិត្យ និងវារីអគ្គិសនីមានអនុភាព៣០០ មេហ្គាវ៉ាត់ពីប្រទេសឡាវ ៣០០មេហ្គាវ៉ាត់ពីវៀតណាម និង១០០ មេហ្គាវ៉ាត់ពីប្រទេសថៃ។

ការនាំចូលអគ្គិសនីជាយុទ្ធសាស្ត្រមួយសម្រាប់កម្ពុជា ដោយសារតម្រូវការកើនឡើង ហើយតាមរយៈប្រភពអគ្គិសនីពីប្រទេសជិតខាង ទើបកម្ពុជាអាចដោះស្រាយបញ្ហាខ្វះខាតបានយ៉ាងឆាប់រហ័ស។

បច្ចុប្បន្ន កម្ពុជាបាននាំចូលថាមពលអគ្គិសនីសរុបពីប្រទេសជិតខាង ១០៣០មេហ្គាវ៉ាត់ ដែលស្មើនឹង១ភាគ៤ នៃថាមពលប្រើប្រាស់សរុបនៅក្នុងប្រទេស។

ហេតុដូចនេះ ការបញ្ជាទិញថាមពលអគ្គិសនីជាង៦០០មេហ្គាវ៉ាត់បន្ថែមពីប្រទេសជិតខាង បង្ហាញអំពីការពង្រីក ការផ្គត់ផ្គង់ថាមពលស្អាតនៅកម្ពុជា ដោយមិនពឹងផ្អែកតែវារីអគ្គិសនីក្នុងស្រុកឡើយ ពីព្រោះនៅរដូវប្រាំងអាចនឹងមានអស្ថិរភាពអគ្គិសនី។

គួរបញ្ជាក់ថា ថ្វីបើកម្ពុជាគ្រោងនឹងបញ្ជាទិញពីប្រទេសជិតខាង ក៏ប៉ុន្តែរដ្ឋាភិបាលក៏បានចំណាយថវិការ៥,៧ពាន់លានដុល្លារផងដែរ សម្រាប់ពង្រឹងការផ្គត់ផ្គង់ថាមពលក្នុងស្រុកចំនួន២៣កន្លែង៕