នៅថ្ងៃទី២៣ ខែតុលា ឆ្នាំ២០២៤នេះ ជាការគំរប់ខួប៣៣ឆ្នាំ នៃកិច្ចព្រមព្រៀងអន្តរជាតិមួយពាក់ព័ន្ធនឹងសង្គ្រាមនៅកម្ពុជា ដែលហៅថា “សន្ធិសញ្ញាសន្តិភាពទីក្រុងប៉ារីសឆ្នាំ”។
សន្ធិសញ្ញាសន្តិភាពទីក្រុងប៉ារីសឆ្នាំ១៩៩១ មាន ១៨ប្រទេស បូករួមទាំងកម្ពុជា ដោយកាលនោះកម្ពុជាបានបែងចែកជា ៤ភាគី គឺ រដ្ឋកម្ពុជា, ហ្វ៊ុនស៊ិនប៉ិច, រណសិរ្សជាតិរំដោះប្រជាពលរដ្ឋខ្មែរ និងខ្មែរក្រហម។
សន្ធិសញ្ញានេះ បង្កើតឡើងដោយមានគោលដៅសំខាន់ៗ៣ ដែលរួមមាន៖
• ទី១ រៀបចំឱ្យប្រទេសកម្ពុជាមានសន្តិភាពឡើងវិញតាមរយៈការអនុវត្ត កិច្ចឈប់បាញ់ និងការរំសាយអាវុធ នៅក្នុងជួរកងទ័ពនៃភាគីជម្លោះខ្មែរទាំងអស់ ព្រមទាំងការដកកងទ័ពវៀតណាម ចេញពីកម្ពុជា
• ទី២ ចាក់គ្រឹះលទ្ធិប្រជាធិបតេយ្យនៅក្នុងប្រទេសកម្ពុជា តាមរយៈការរៀបចំបោះឆ្នោត សភាធម្មនុញ្ញ
• ទី៣ ការពារកម្ពុជា ក្នុងនាមជាប្រទេសពេញសិទ្ធិមួយ តាមរយៈការធានា អធិបតេយ្យ ឯករាជ្យ បូរណភាព និងភាពពុំអាចរំលោភបំពានបាននូវទឹកដី អព្យាក្រឹតភាព និងឯកភាពជាតិរបស់ខ្លួន។
នៅក្នុងការអនុវត្តកិច្ចព្រមព្រៀងនោះ រដ្ឋាភិបាលហត្ថលេខីក៏បានបង្កើតអាជ្ញាធរបណ្តោះអាសន្នរបស់អង្គការសហប្រជាជាតិមួយនៅកម្ពុជាហៅថា “អាជ្ញាធរអន្តរកាលសហប្រជាជាតិនៅកម្ពុជា” United Nations Transitional Authority in Cambodia ដែលមានអក្សរកាត់ថា UNTAC “អ៊ុនតាក់” ដើម្បីរៀបចំកសាងប្រទេសកម្ពុជាឡើងវិញ។
បន្ទាប់មកក៏មាន កិច្ចព្រមព្រៀងសន្ធិសញ្ញានេះ បានឱ្យកម្ពុជា អាចកសាងបាននូវសង្គមរបបរាជាធិបតេយ្យ អាស្រ័យរដ្ឋធម្មនុញ្ញ និងគោរពលទ្ធិប្រជាធិតេយ្យសេរីពហុបក្ស រហូតមកដល់សព្វថ្ងៃ៕
