ធនាគារជាតិនៃកម្ពុជា នឹងដាក់ឱ្យចរាចរក្រដាស់ប្រាក់ថ្មី ២០មុឺនរៀល

នៅថ្ងៃទី២៩ ខែតុលា ឆ្នាំ២០២៤ខាងមុខនេះ គឺជាព្រះរាជពិធីបុណ្យខួបលើកទី២០ នៃការយាងគ្រងព្រះបរមសិរីរាជសម្បត្តិរបស់ព្រះមហាក្សត្រ ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ក្រោយពីព្រះអង្គត្រូវបានក្រុមប្រឹក្សារាជសម្បត្តិដែលមានសមាសភាព៩អង្គ/រូប ជ្រើសតាំងជាព្រះមហាក្សត្របន្តពីព្រះបិតាដែលបានដាក់រាជ្យពីរាជបល្ល័ង្ក នៅថ្ងៃទី៧ តុលា ២០០៤ ដោយហេតុផលព្រះរាជសុខភាព។

ដើម្បីជាការអបអរខូលើកទី២០នេះ ធនាគារជាតិនៃកម្ពុជា បានចេញផ្សាយធនប័ត្រអនុស្សាវរីយ៍ប្រភេទ ២សែនរៀល ដោយនឹងដាក់ឱ្យចរាចរ នៅទូទាំងព្រះរាជាណាចក្រកម្ពុជា។

លក្ខណៈទូទៅនៃក្រដាស២០មុឺនរៀលនេះ មានបណ្ដោយ ១៧០មម ទទឹង ៧៦មម ពណ៌ចម្បងគឺពណ៍ត្នោត ពណ៍ទឹកក្រូច និងពណ៌ផ្កាឈូក។

ផ្ទៃខាងមុខ ត្រូវបានរំលេចឡើងនូវព្រះឆាយាល័ក្ខណ៍ ព្រះករុណា ព្រះបាទសម្តេច ព្រះបរមនាថ នរោត្តមសីហមុនី រួមជាមួយព្រះវររាជមាតា ដែលផ្ទៃខាងក្រោយត្រូវបានតែងលំអដោយក្បាច់ចម្លាក់ជាប្រពៃណី ព្រមជាមួយអក្សរ ” ពីរសែនរៀល ” នៅខាងក្រោម និងមានរូបចម្លាក់នាគមួយគូនៅប្រាសាទបន្ទាយសំរ៉ែក្នុងខេត្តសៀមរាប។

ផ្ទៃខាងខ្នង បានរំលេចឡើងនូវ ព្រះឆាយាល័ក្ខណ៍ព្រះករុណា ព្រះបាទ សម្តេចព្រះបរមនាថ នរោត្តមសីហមុនីព្រះមហាក្សត្រ  ទ្រង់គ្រឿង ព្រះមហាក្សត្រ និងមានអក្សរ “ ពីរសែនរៀល ” ជិតពាក្យអបអរសាទរខួប២០ឆ្នាំ នៃការគ្រងរាជ្យសម្បត្តិ ព្រះបាទ សម្តេចព្រះបរមនាថ នរោត្តមសីហមុនី៕