ទំនប់អាងទឹកជ្រោយប្រស់ ជាទំនប់ដែលមិនអាចខ្វះបាន និងមានសារៈសំខាន់បំផុតសម្រាប់អ្នកខេត្តកោះកុង ដែលមានទីតាំងស្ថិតនៅក្នុងឃុំជ្រោយប្រស់ ស្រុកកោះកុង។
ទំនប់អាងទឹកនេះ មានលទ្ធភាពស្តុកទឹកបានប្រមាណ ៤លានម៉ែត្រគូប និងមានតួនាទីស្ទាក់ទឹកសាបហូរមកពីជ្រលងភ្នំ ដើម្បីស្រោចស្រពបន្ថែមលើផ្ទៃដីកសិកម្មប្រមាណ ២៧៥ហិកតា។
បច្ចុប្បន្ន ទំនប់អាងទឹកនេះ កំពុងត្រូវបានអជ្ញាធរជួសជុលឡើងវិញ ក្រោយពីអំឡុងខែសីហា និងខែកញ្ញា ឆ្នាំ២០២៣កន្លងទៅនេះ ទំនប់នេះបានទទួលរងនូវឥទ្ធិពលជំនន់ទឹកភ្លៀងរដូវវស្សា ដែលបណ្តាលឱ្យជើងទេរទំនប់ និងជើងទេរសំណង់ទ្វារទឹកលើទំនប់ជាច្រើនកន្លែងត្រូវទឹកហូរច្រោះដាច់។
ក្រោយស្តារឡើងវិញរួចរាល់តាមលក្ខណៈបច្ចេកទេស ពលរដ្ឋ២ភូមិ នៃឃុំជ្រោយប្រស់ ស្រុកកោះកុង ខេត្តកោះកុងនឹងទទួលបានទំនប់អាងទឹកតម្កល់ទឹកសាបទុកសម្រាប់ប្រើប្រាស់ប្រចាំថ្ងៃ និងស្រោចស្រពបន្ថែមលើផ្ទៃដីបង្កបង្កើនផលកសិកម្មរដូវស្រូវវស្សាចំនួន ២៧៥ហិកតា រដូវប្រាំងចំនួន ៣០ហិកតា និងដំណាំរួមផ្សំចំនួន ៣០ហិកតា។
លើសពីនេះទៅទៀត តួទំនប់បានក្លាយជាផ្លូវសម្រាប់ធ្វើដំណើរនៅតាមបណ្តោយជើងភ្នំទៅកាន់ទីប្រជុំជនបានយ៉ាងងាយ៕
