សហរដ្ឋអាមេរិក ៖ ក្រោយពីបោះបង់ការសិក្សានៅសាកលវិទ្យាល័យ Harvard លោក Avi Schiffmann អាយុ២១ឆ្នាំ ជនជាតិអាមេរិកបានបង្កើតគេហទំព័រមួយ និងឈ្នះពានរង្វាន់ Webby ដោយធ្វើការតាមដានជំងឺកូវីដ-១៩ ។ ក្រោយមក លោកក៏បានបង្កើតខ្សែក AI មានឈ្មោះថា «Friend» ដែលវាអាចជជែក និងស្តាប់គ្រប់បញ្ហារបស់អ្នកប្រើប្រាស់ ។.png)
លោកបញ្ជាក់ថា លោកផលិតខ្សែក AI «Friend» នេះ គឺសម្រាប់អ្នកដែលចង់មានមិត្តភក្តិជជែកគ្នា និងស្តាប់រាល់បញ្ហាទាំងអស់ ហើយខ្សែកនេះក៏អាចជជែកជាមួយមនុស្សគ្រប់ពេលវេលាផងដែរ ។ វាមានរូបរាងគួរឱ្យស្រឡាញ់, យល់ពីអារម្មណ៍របស់មនុស្ស, ផ្ញើសារ និងអាចឆ្លើយតបសំណួរផ្សេងៗដូចមនុស្ស ។ យើងប្រើប្រាស់វាបានរហូតដល់១៥ម៉ោងពេលសាកថ្មម្តង ហើយវាមានភាពខុសប្លែកពីឧបករណ៍ AI ផ្សេងៗ ដែលអាចដំណើរការ និងធ្វើតាមបញ្ជារបស់អ្នកប្រើប្រាស់តែប៉ុណ្ណោះ ។
ចំណែកវិធីប្រើប្រាស់វិញ គឺគ្រាន់តែចុចលើប៊ូតុងខ្សែក បន្ទាប់មក វានឹងរង់ចាំស្តាប់ការនិយាយទាំងអស់របស់អ្នកប្រើប្រាស់ តាមរយៈមីក្រូហ្វូនបំពាក់នៅផ្នែកខាងក្នុង ។ វាក៏អាចឆ្លើយតបសំណួរទៅអ្នកប្រើប្រាស់ផងដែរ ដោយការផ្ញើសារ និងជូនដំណឹងក្នុងទូរស័ព្ទដៃភ្ជាប់ប្រព័ន្ធ ។ បើទោះខ្សែកនេះពុំមានសមត្ថភាពដូចមនុស្សទាំងអស់ក្តី ប៉ុន្តែវាអាចជជែកជាមួយមនុស្សប្រកបដោយភាពស្និទ្ធស្នាល, ផ្តល់កម្លាំងចិត្ត និងទំនាក់ទំនងគ្រប់ស្ថានការណ៍ ។.png)
អ្នកប្រើប្រាស់អាចសួរសំណួរផ្សេងៗ ហើយពេលខ្លះ វាអាចចាប់ផ្តើមជជែកជាមួយមនុស្សមុននៅពេលសមរម្យ ។ លើសពីនេះ អ្នកប្រើប្រាស់អាចលុបចេញសំឡេងរបស់ខ្លួនបានគ្រប់ពេលវេលាទៀតផង ។.png)
ខ្សែក AI មានពណ៌ស្រស់ស្អាត និងច្រើនប្រភេទ ។ បច្ចុប្បន្ន មានអតិថិជនកុម្ម៉ង់ទិញខ្សែកពីគេហទំព័រ ក្នុងតម្លៃត្រឹមតែ៩៩ដុល្លារអាមេរិកប៉ុណ្ណោះ ហើយលោកនឹងបញ្ជូនវាទៅឱ្យអតិថិជន នៅខែមករា ឆ្នាំ២០២៥ ។ នេះបើតាមការលើកឡើងរបស់លោក Avi Schiffmann ៕
